ދާދި އަވަހަށް އެންއާރުއެމްގެ (ނަޝީދު ރިފީމް މޫވްމަންޓް) ނަމުގައި ސިޔާސީ ޕާޓިއެއް އުފައްދަން ހުށައަޅާފާނެކަމަށް ވިދާޅުވެ އެމްޑީޕީގެ ކުރީގެ ޗެއަރޕާސަން އަދި މަޖިލީހުގެ ކުރީގެ ނާއިބު ރައީސް މޫސާ މަނިކު ރައީސް ނަޝީދަށް ފާޑުވިދާޅުވެއްޖެއެވެ.

މޫސަ މަނިކު މިހެން ވިދާޅުވީ، އެމްޑީޕީގެ އެތެރޭގައި ޚިޔާލުތަފާތުވުން އުފެދި މަޖިލީހުގެ މެންބަރުން އެއް މެންބަރަކު އަނެއް މެންބަރަކަށް ފާޑުވިދާޅުވަމުން ގެންދަވާ ދަނޑިވަޅެއްގައެވެ. ރައީސް ނަޝިދުގެ ފެކްޝަނާއި ރައީސް ޞާލިޙްގެ ފެކްޝަންގެ ވާދަވެރިކަންވެސް ވަނީ ބޮޑުވެފައެވެ.

މިކަމާއި ގުޅިގެން ރައީސް ނަޝީދަށް ފާޑުވިދާޅުވެ މޫސަ ވިދާޅުވީ ދާދި އަވަހަށް އެންއާރުއެމްގެ ނަމުގައި ސިޔާސީ ޕާޓިއެއް އުފައްދަން ހުށައަޅާފާނެކަމަށެވެ.

ދާދި އަވަހަށް އާޕާޓީއެއް އުފައްދަން ހުށަހަށާފާނެ. NRM.

— Moosa Maniku (Reeko) (@ReekoMoosa) March 1, 2022

މޫސަ މިހެން ވިދާޅުވެފައިވާއިރު ރައީސް މައުމޫން ވަނީ އެމްއާރުއެމް (މައުމޫން ރިފޯމް މޫވްމަންޓް)ގެ ނަމުގައި ސިޔާސީ ޕާޓިއެއް އުފައްދާފައެވެ. އެމަނިކުފާނު އެންމެ ފުރަތަމަ އުފެއްދެވީ ވެރިކަމުގައި ހުންނަވައިގެން ޑީއާރުޕީއެވެ. މައުމޫންގެ ލީޑަރޝިޕްގައި އެޕާޓީން ވަރަށް ގިނަ ކާމިޔާބީތައް ހާސިލުކޮށްފައިވެއެވެ. ނަމަވެސް ޑީއާރުޕީގެ އެތެރޭގައި އުފެދުނު ޚިޔާލުތަފާތުވުންތަކާއެކު އެޕާޓީ ދެބައިވެ ރައީސް މައުމޫން އިސްވެ ހުންނަވާ އުފެއްދެވީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)އެވެ. އަދި އޭގެ ފަހުން އެޕާޓީގެ ތެރޭގައި އޭރުގެ ރައީސް އަދި ރައީސް މައުމޫންގެ ކޮއްކޯފުޅު ޔާމީން ޢަބްދުލް ޤައްޔޫމާއި ދެމެދު ޚިޔާލުތަފާތުވުންތައް އުފެދި ރައީސް މައުމޫނު ވަނީ ޕީޕީއެމްގެ ރައީސްކަމުން ވަނީ ދުރުކުރައްވާފައެވެ. އޭގެ ފަހުން ރައީސް މައުމޫން އުފައްދަވާފައި ވަނީ މައުމޫން ރިފޯމް މޫވްމަންޓް (އެމްއާރުއެމް) އެވެ. އެމްއާރުއެމްއަކީ މިސަރުކާރުގެ ކޯލިޝަންގެ ބައިވެރިއެކެވެ.