ރަޝިޔާ އަދި ބެލަރޫސްގައި ހިންގަމުންދާ މެޑިސިން ކޯސްތަކުގެ ކްލާސްތައް އޮންލައިންކޮށް ހިންގަން ޖެހޭ ޙާލަތެއް އަދި ނެތް ކަމަށް އެޔުނިވަރސިޓީތަކުން ބުނެފިއެވެ.
ރާއްޖޭގެ ފޮރިން މިނިސްޓްރީން ބުނެފައިވަނީ ބެލަރޫސްގެ ޔުނިވަރސިޓީތަކުން ބަރލިންގައި ހުންނަ ދިވެހި އެމްބަސީއަށް މައުލޫމާތު ދީފައިވާ ގޮތުގައި ދަރިވަރުންގެ ކިޔެވުން އޮންލައިންކޮށް ކުރިއަށް ގެންދެވޭނީ އެގައުމުގެ ހެލްތު މިނިސްޓްރީ އަދި އެޑިއުކޭޝަން މިނިސްޓްރީއިން ނިންމައިގެންކަމަށާއި، ކައިރި މުސްތަޤްބަލެއްގައި ކްލާސްތައް އޮންލައިންކުރުމުގެ ވިސްނުމެއް ބެލަރޫސް ސަރުކާރުގެ ނެތް ކަމަށެވެ.
އަދި ދަރިވަރުން ބެލަރޫސްގައި ތިބޭ އިރު ދަރިވަރުންގެ ސަލާމަތާއި ރައްކާތެރިކަން ޔުނިވަރސިޓީތަކުން ޔަގީންކޮށްދޭކަމަށްވެސް ޔުނިވަރސިޓީތަކުން ދިވެހި ސަރުކާރަށް އަންގާފައިވާކަމަށެވެ. ރަޝިޔާގެ ޔުނިވަރސިޓީތަކުންވެސް ވަނީ ދިވެހި ދަރިވަރުން ތިބި ސަރަހައްދުތަކަށް ނުރައްކަލެއް އޮތްކަމަށް ނުފެންނާތީ ކިޔެވުން އޮންލައިންކޮށް ކުރިއަށް ގެންދަން ނުފެންނަކަމަށް ބުނެފައެވެ.
ބެލަރޫސް އާއި ރަޝިއާ ގައި ވަރަށް ގިނަ ދިވެހި ދަރިވަރުން ޑޮކްޓަރުކަން ކިޔަވަމުން ގެންދެއެވެ. ރަޝިޔާ އިން ޔޫކްރޭނާއި ދެކޮޅަށް ހަނގުރާމަ ފަށައި، އެސަރަހައްދުގެ ހާލަތު ގޯސްވެފައިވާތީ ޔޫކްރެއިންގެ އިވާނޯ ފްރެންކްވިސްކްގައި މެޑިސިން ކިޔަވަމުން ދިޔަ ބައެއް ދަރިވަރުން ވަނީ ރާއްޖެ އައިސްފައެވެ.
ރަޝިއާއާއި ޔޫކްރެއިންގެ މަޞްރަހު ގޯސްވެ ހަނގުރާމަ އިޢުލާން ކުރުމާ ގުޅިގެން އެ ޤައުމުގައި ކިޔަވަން ތިބި ދަރިވަރުންނަށް އެހީތެރިވުމުގެ ގޮތުން ހަޔަރ އެޑިއުކޭޝަން މިނިސްޓްރީން ވަނީ ގަޑިއިރެއްގެ ތެރޭގައި ބޭންކާ ވާހަކަ ދައްކައިގެން އެ ތަނުގައި ތިބި ދަރިވަރުންގެ އެކައުންޓް ލިމިޓްވެސް އިތުރުކޮށްދީފައެވެ. އަދި މިހާރުވެސް އެ ޤައުމުގައި ތިބި ދިވެހިންނަށް އެހީތެރިކަން ފޯރުކޮށްދިނުމަށް އަންނަނީ މަސައްކަތްކުރަމުްނނެވެ.
ކޮމެންޓު ފޮނުވާ