އަވައްޓެރި ބެލަރޫސްގައި މަޝްވަރާ ކުރުމަށް ރަޝިއާއިން ހުށަހެޅި ހުށަހެޅުން ގަބޫލުނުކޮށް ރައްދުކުރުމަށްފަހު، ބެލަރޫސްއާއި ޔޫކުރެއިން ބޯޑަރު ކައިރީގައި ރަޝިއާއިއެކީ މަޝްވަރާގެ މޭޒަށް ދިއުމަށް ޔޫކުރެއިންގެ ރައީސް ވޮލޮޑޮލިރ ޒެލެންްކީ ނިންވަައިފިއެވެ.
ޔޫކުރެެއިންއިން ރަޝިއާއެކީ މަޝްވަރާގެ މޭޒަށް ދިއުމަށް އެއްބަސްވެފައިވަނީ، އެގައުމުން ޔޫކުރެއިންއަށް އަރާ ދޭންފެށި އުދުވާނީ ހަމަލާތަކަށްފަހު، އެގައުމުގެ ވެރިރަށް ހިފުމަށް ރަޝިއާއިން ވަރުގަދަ އަސްކަރީ ހަމަލާތައް ދެމުންދާ ވަގުތެއްގައެވެ. އަދި ރަޝިއާގެ އުދުވާން ހުއްޓުވުމުގެ ގޮތުން، ދުނިޔޭގެ 50 އަށްވުރެ ގިނަ ގައުމަކުން ރަޝިއާއާއި ދެކޮޅަށް އެކި ގޮތްގޮތުން އިގްތިސާދީގޮތުން ވަރުގަދަ ދަތިކުރުމުގެ ފިޔަވަޅުތައް އަޅާފައި ވަނިކޮށެވެ.
ޔޫކުރެއިން ހާމަ ކޮށްފައިވާ ގޮތުގައި، ޔޫކުރެއިންއާއި އިންވެގެން އޮތް ބެލަރޫސްގައި މަޝްވަރާތައް ކުރިޔަށް ގެންދިއުމަށް އެގައުމުން ދެކޮޅު ހަދާފައިވަނީ، އެގައުމުގެ ސަރަހައްދު ޔޫކުރެއިންއަށް ހަމަލާ ދިނުމަށް ބޭނުން ކޮށްފައި ވުމާއި ގުޅިގެން ކަމުގައެވެ. އެހެންނަމަވެސް އޭގެ ބަދަލުގައި، ބެލަރޫސްގެ ބޯޑަރު ކަރީގައި މަޝްވަރާތައް ބޭއްވުމަށް ރަޝިއާއިން ހުށަހެޅި ހުށަހެޅުމަށް ޔޫކުރެއިންގެ ރައީސް ޒެލެންސްކީވަނީ އެއްބަސް ވެވަޑައިގެންފައެވެ.
ޔޫކުރެއިންއިން ހާމަ ކޮށްފައިވާ ގޮތުގައި، މި މަޝްވަރާތަކަށް ދާ ޔޫކުރެއިންގެ ޑެލިގޭޝަންގެ ސަލާމަތާއި ރައްކާތެރިކަމުގެ ޔަގީންކަން ބެލަރޫސްގެ ރައީސް ލުކަޝެންކޯ ވަނީ ދެއްވާފައެވެ.
ޔޫކުރެއިންއާއެކީ މަޝްވަރާއަށް ދިއުމަށް ރަޝިއާއިން އެއްބަސްވެފައި ވާއިރު، ޔޫކުރެއިންއަށް ހަމަލާދޭން ފެށިތާ 4 ދުވަސް ފާއިތުވެގެން ދިޔައިރުވެސް، ކުރިން އުއްމީދު ކޮށްފައިވާ ވަރުގެ ކުރިއެރުންތަކެއް ރަޝިއާގެ އަސްކަރިއްޔާއަށް ލިބިގެން ގޮސްފައެއް ނުވެއެވެ. އަދި ދުނިޔޭގެ ގައުމުތަކުގެ އިންޓެލިޖެންސް އޭޖެންސީތަކުން ފާއިތުވި 4 ދުވަސް ތެރޭގައި ޔޫކުރެއިންގެ ވެރިރަށް ރަޝިއާއިން ހިފާނެކަމަށް ލަފާ ކޮށްފައިވި ނަމަވެސް، ޔޫކުރެއިންގެ އަސްކަރިއްޔާގެ ފަރާތުން ރަޝިއާގެ އަސްކަރިއްޔާއަށްވަނީ އާދަޔާއި ޚިލާފު ވަރުގަދަ ރައްދު ހަމަލާތަކެއް ދީފައެވެ.
އަދި މި ހަމަލާތަކުގެ ނަތީޖާއެއްގެ ގޮތުން، ހަގުރާމައަށް 4 ދުވަސް ފާއިތުވެގެންދިޔަ ނަމަވެސް، ޔޫކުރެއިންގެ އެއްވެސް ސިޓީއެއް ރަޝިއާގެ ފައުޖުތަކުގެ ބާރުގެދަށަށް އަދި ގެންދެވިފައެއް ނުވެއެވެ.
މި ހަގުރާމާގައި، ޔޫކުރެއިންގެ ރައީސް ދައްކަވާފައިވާ ލީޑަރޝިޕަށް ދުނިޔޭގެ އެތައް ބައެއްގެ ތައުރީފުވަނީ ލިބިގެން ގޮސްފައެވެ.
ޔޫކުރެއިންއިން ހަގުރާމައިގެ ހާލަތު ރިޕޯޓު ކުރަމުންދާ ނޫސްވެރިން މައުލޫމާތު ދެމުންދާ ގޮތުގައި، މިވަގުތު ބަދަލު ކުރެވެމުންދާ ހަމަލާތަކަށް ވަނީ މަޑު ޖެހުމެއް އައިސްފައެވެ. އަދި ބެވޭގޮތުގައި، ހަމަލާތަކަށް މަޑުޖެހުމެއް އައިސްފައިވަނީ، މަޝްވަރާތަކަށް ފުރުސަތު ދިނުމުގެ ގޮތުންނެވެ.
