ބޮލީވުޑްގެ ބަތަލާ އަދި މިހާރު ހޮލީވުޑްގައި ފިޔަހަޖަހަމުންދާ ޕްރިޔަންކާ ޗޯޕްރާ އޭނާގެ ފިރިމީހާ އަދި ލަވަކިޔުންތެރިޔާ ނިކް ޖޮނަސްއާ ދެ މަފިރިންނަކީ ގިނަބަޔަކު ފާހަގަކުރާ ޖޯޑެކެވެ. އެއްބަޔަކު އެ މީހުން ފާހަގަކުރަނީ ނަމޫނާއެއްގެ ގޮތުގައެވެ. އަނެއްބަޔަކު އެ މީހުން ވަރަށް ލޯބި ދެމަފިރިއެއްގެ ގޮތުގައި ފާހަގަކުރެއެވެ.
2017 ވަނަ އަހަރު ތެރޭގައި ލޯބީގެ ގޮތުން ގުޅިގެން އުޅުމަށްފަހު، 2018 ވަނަ އަހަރު ތެރޭގައި މި ދެމަފިރިން ވަނީ ކައިވެނިކޮށްފައެވެ. އެކަމަކު އިނގޭ ހެއްޔެވެ؟. ޕްރިޔަންކާ އެއްވެސް ވަރަކަށް ކައިވެނި ކުރަން ބޭނުން ނުވި ދުވަސްވަރެއް ދިޔަ އެވެ.
އެކަމާއި ގުޅޭގޮތުން ޕީޕަލް މެގަޒިންއަށް ދިން އިންޓަވިއުއެއްގައި ޕްރިޔަންކާ ބުނީ، އޭނާގެ ހަޔާތުގައި ކައިވެންޏާއި ގުޅޭގޮތުން ވަރަށް އަންކޮންފޮޓަބަލް ހިޔާލު ތަކެއް އައި ކަމަށެވެ.
އަދި ކައިވެނީގެ ހިޔާލު ދޫކޮށްލުމާއި ގުޅޭގޮތުން އިތުރަށް އޭނާ ބުނީ، ކުޑައިރު، އޭނާ އަންބެއްގެ ގޮތުގައި އުޅޭނެ ގޮތުގެ ހިޔާލުތައް އައި ކަމަށެވެ. ނަމަވެސް އޭނާގެ އުމުރުން 20 އަހަރަށް އެރި ފަހުން އެ ހިޔާލު ތައް ބަދަލުވެ، އެހެން ކަންކަމާއި ޝާމިލުވެ އުޅެން ފެށި ކަމަށް ބުންޏެވެ.
އަދި ފަހުން ނިކްއާއި ދިމަވިއިރު، އެއީ ކައިވެނި ކުރަން އެންމެ ރަނގަޅު މީހާކަން އެނގިގެން ގޮސްފައިވާ ކަމަށް ޕްރިޔަންކާ ބުނެފައި ވެއެވެ. މަސައްކަތުގެ ގޮތުން ޕްރިޔަންކާ ދެން އެންމެ އަވަހަށް ފެނިގެން ދާނީ މެޓްރިކްސް 4 އިންނެވެ. އޭގެ އިތުރުން، އޭނާ ވަނީ އިތުރު ހޮލީވުޑް ޕްރޮޖެކްޓަކަށްވެސް ސޮއިކޮށްފައެވެ.
