އިނގިރޭސިވިލާތާއި ގުޅުން ހުރި ހުރިހާ ފްލައިޓްތަކެއްވެސް ރަޝިއާގެ ވައިގެ ސަރަހައްދު ބޭނުންކުރުން އެގައުމުން މަނާކޮށްފިއެވެ.
އިނގިރޭސި ފްލައިޓްތަކާއި އަދި އިނގިރޭސިވިލާތާއި ގުޅުންހުރި ހުރިހާ ފްލައިޓެއްވެސް ރަޝިއާގެ ވައިގެ ސަރަހައްދު ބޭނުންކުރުން ރަޝިއާއިން މަނާކޮށްފައި މިވަނީ، ރަޝިއާއިން ޔޫކުރެއިންއަށް އުދުވާނީ ހަމަލާ ދިނުމާއި ގުޅިގެން، އެގައުމާ ދެކޮޅަށް އަޅަމުންދާ ދަތިކުރުމުގެ ފިޔަވަޅުތަކުގެ ތެރެއިން، ރަޝިއާގެ އެއަރލައިނެއް ކަމުގައިވާ އޭރޯފްލޮޓްގެ ބޯޓެއް އިނގިރޭސިވިލާތަށް ތިރިކުރުން އެގައުމުން މަނާ ކުރުމާއި ގުޅިގެންނެވެ.
"އިނގިރޭސިވިލާތުގައި ރަޖިސްޓްރީ ކޮށްފައިވާ، ނުވަތަ އިނގިރޭސި ކުންފުންޏަކުން އޮޕަރޭޓް ކުރާ ނުވަތަ ގުޅުން އޮތް އެއްވެސް އެއަރލައިނެއްގެ ފްލައިޓެއް ރަޝިއާގެ ވައިގެ ސަރަހައްދު ބޭނުންކުރުން މިހާރުވަނީ މަނާކުރެވިފައި،" ރަޝިއަން އޭވިއޭޝަން އޮތޯރިޓީން ބުނެފައި ވެއެވެ.
މިއީ އިނގިރޭސި އޭވިއޭޝަން އޮތޯރިޓީތަކުން އަޅާފައިވާ ބަލައި ނުގަނެވޭނެ ފިޔަވަޅުތަކުގެ ރައްދުގައި އަޅާފައިވާ ފިޔަވަޅުތަކެއް،" ރަޝިއަން އޭވިއޭޝަން އޮތޯރިޓީން ބުނެފައި ވެއެވެ.
ރަޝިއާއިން ޔޫކުރެއިންއަށް އަރާ އެގައުމަށް އުދުވާނީ ހަމަލާ ދޭން ފެށުމާއި ގުޅިގެން އިނގިރޭސިވިލާތުންވަނީ ރަޝިއާއި ދެކޮޅަށް އިގްތިސާދީގޮތުން ދަތިކުރުމުގެ ވަރުގަދަ ފިޔަވަޅުތަކެއް އަޅާފައެވެ.
މިގޮތުން، އިނގރޭސިވިލާތުން ވަނީ ރަޝިއާގެ 3 މަހުޖަނަކާއި އަދި 5 ބޭންކަކާއި ދެކޮޅަށް ދަތިކުރުމުގެ ފިޔަވަޅު އަޅާފައެވެ.
އިނގިރޭސި ގާނޫނުހަދާ މަޖިލިސް، ހައުސް އޮފް ކޮމޮންސްގައި ވާހަކަ ދައްކަވަމުން އިނގިރޭސި ބޮޑުވަޒީރު ބޮރިސް ޖޯންސަން އަންގާރަ ދުވަހު ވިދާޅުވެފައިވަނީ، ރަޝިއާއި ދެކޮޅަށް ފުރަތަމައަށް އެޅުމަށް ހަމަޖެހިފައިވާ އިގްތިސާތީ ދަތިކުރުކުގެ ފިޔަވަޅުތަކުގެ ތެރޭގައި ހިމެނެނީ، އެގައުމުގެ ރޮއްސިޔާ ބޭންކު، އައިއެސް ބޭންކު، ޖެނެރަލް ބޭންކު، ޕްރޮމްސުވިޔަޒް ބޭންކުގެ އިތުރުން ބްލެކް ސީ ބޭންކާއި ދެކޮޅަށް އިގްތިސާދީގޮތުން ދަތިކުރުމުގެ ފިޔަވަޅު އެޅުމެވެ.
އަދި މީގެއިތުރުން ރަޝިއާގެ 3 މަހުޖަނަކާއި ދެކޮޅަށްވެސް ދަތިކުރުމުގެ ފިޔަވަޅުތައް އެޅުމަށް ނިންމާފައިވާކަންވެސް ބޮރިސް ޖޯންސަން ވަނި އިއުލާން ކުރައްވާފައެވެ. މި 3 މުއްސަދި މަހުޖަނުންނަކީ، ގެނެޑީ ޓިމްކެންކޯ އާއި، ބޮރިސް ރޮޓެމްބާރގްއާއި، އަދި އިގޯރ ރޮޓެމްބާރގްއެވެ. އިނގިރޭސިވިލާތުން ހާމަ ކޮށްފައިވާ ގޮތުގައި، އިނގިރޭސިވިލާތުގައި ހުރި މި 3 މަހުޖަނުންގެ އެސެޓްތައް ފްރީޒް ކުރުމުގެ އިތުރުން، މި ފަރާތްތަކަށް އިނގިރޭސިވިލާތަށް ދަތުރުކުރުންވެސް ވަނީ މަނާ ކުރެވިފައެވެ.
އަދި މީގެ އިތުރުން، މި މަހުޖަނުންނާއި ވިޔަފާރީގެ އެއްވެސް ގުޅުމެއް ހިންގުންވެސް އަދި އެނޫން އެފަދަ އެއްވެސް މުއާމަލާތެއް ކުރުންވެސް އިނގިރޭސި ރައްޔިތުންނަށާއި އަދި އެގައުމުގެ ކުންފުނިތަކަށް ވަަނީ މަނާ ކުރެވިފައެވެ.
އިނގިރޭސި ބޮޑުވަޒީރު ބޮރިސް ޖޯންސަން ވިދާޅުވި ގޮތުގައި، ރަޝިއާއި ދެކޮޅަށް އިގްތިސާދީ ދަތިކުރުމުގެ ފިޔަވަޅު އަޅަން މަޖުބޫރުވީ، ރަޝިއާގެ ރައީސަށް އޭނާގެ މަގުސަދުތައް މަޝްވަރާގެ މަގު ބޭނުންކޮށްގެ ހާސިލް ކުރުމަށް އެތައް ފުރުސަތެއްދީ އެމަގު އިޚްތިޔާރު ނުކުރުމާއި ގުޅިގެން ކަމުގައެވެ.
