ރަޝިއާ ސިފައިން ޔޫކުރެއިންއާއި ދެކޮޅަށް ދެމުންދާ އުދުވާނީ ހަމަލާތަކާއި ދެކޮޅުހަދާ، އަދި ޔޫކުރެއިންގެ ރައްޔިތުންނާއެކު ވާކަން ހާމަ ކުރުމުގެ ގޮތުން، ދުނިޔޭގެ ބައެއް ގައުމުތަކުގައިވާ މުހިންމު ބިނާތައް ޔުކުރެއިން ގައުމީ ދިދައިގެ ކުލަ ކަމުގައިވާ ރީނދުލާއި ނުލުން ދިއްލާލައިފިއެވެ.
މިގޮތުން ބްރަސަލްގައި އޮންނަ ސިންކުއަންޓަނަޔަރ ޕާރކު ނުލާއި ރީނދުލުން ދިއްލާލާފައިވަނީ، ބެލްޖިއަމްގައި، ބުރާސްފަތި ދުވަހު، ޔޫކުރެއިން ރަޝިއާ ކްރައިސިސްއާއި ގުޅިގެން ޔޫރަޕިއަން ޔޫނިއަންގެ އެމަރޖެންސީ ސަމިޓް ކުރިޔަށް ދަމުންދިޔަ ވަގުތުއެވެ. މި ބައްދަލުވުމަށްފަހު، ޔޫރަޕްގެ ލީޑަރުންވަނީ ރަޝިއާއީ ދެކޮޅަށް އަޅާނޭ ދަތިކުުރުމުގެ ފިޔަވަޅުތައް އިއުލާން ކޮށްފައެވެ.
މީގެ އިތުރުން އިޓަލީގެ ތާރީޚި ސިޓީ ރޯމްގެ އެންމެ މުހިންމު ބިނާ ކަމުގައިވާ ޗޮލިސިއަމް ބިނާވެސް ރޭވަނީ ޔޫކުރެއިން ދިދައިގެ ކުލައިން ދިއްލާލާފައެވެ.
މީގެއިތުރުން އޮސްޓްރޭލިއާގެ މެލްބަންގެ ފްލިންޑާރސް ސްޓްރީޓް ސްޓޭޝަންވެސް ވަނީ ޔޫކުރެއިންގެ ރައްޔިތުންނާއެކު ތިބިކަން ހާމަކޮށް ދިނުމުގެ ގޮތުން ޔޫކުރެއިންގެ ދިދައިގެ ކުލައިން ދިއްލާލާފައެވެ. އޮސްޓްރޭލިއާގެ ބޮޑުވަޒީރު ސްކޮޓް މޮރިސަންވަނީ، ރަޝިއާއިން ޔޫކުރެއިން އަށް އުދުވާނީ ހަމާލާ ދިން ދިނުން އެއީ ބޮޑުވެގެންވާ ޖަރީމާއެއްގެ ގޮތުގައި ސިފަކޮށްފައެވެ. އަދި އޮސްޓްރޭލިއާއިން ވަނީ ރަޝިއާއި ދެކޮޅަށް ދަތިކުރުމުގެ ފިޔަވަޅުވެސް އަޅާފައެވެ.
