ޅ. ކުރެންދޫ ކައުންސިލްގެ ރައީސްގެ މަގާމަށް ވާދަކުރާ އިދިކޮޅު ޕީޕީއެމް ކެނޑިޑޭޓްގެ ކެމްޕެއިންނަށް ޕީޕީއެމް ޓީމު އެރަށަށް ދިއުމުން ހޫނު މަރުހަބާއެއް ކިޔައިފިއެވެ.
ޕީޕީއެމްގެ ފަރާތުން މިއިންތިޚާބުގައި ވާދަކުރަނީ އިސްމާއިލް މަދީހުއެވެ. އޭނާއަކީ މީގެ ކުރިންވެސް ކުރެންދޫ ކައުންސިލް ރައީސްކަމުގެ މަޤާމު ފުރުއްވި ބޭފުޅެކެވެ. އިއްޔެ ޕީޕީއެމްގެ ޓީމު ކުރެންދޫއަށް ދިއުމުން ވަނީ ހޫނު މަރުހަބާއެއް ކިޔާފައެވެ. ޕީޕީއެމްގެ ފަރާތުން ކުރެންދޫއަށް ޓީމުގައި އިސްކޮށް ހަރަކާތްތެރިވަނީ ޕީޕީއެމްގެ ނައިބް ރައީސް ނައިފަރު ދާއިރާގެ މެމްބަރު އަހުމަދު ޝިޔާމްއެވެ.
މިއިންތިޚާބުގައި ވެރިކަންކުރާ މައި ޕާޓީ އެމްޑީޕީންވެސް ވަނީ ކެނޑިޑޭޓަކު ނެރެފައެވެ. ނަމަވެސް މިއިންތިޚާބު ބޮޑު ތަފާތަކުން ކާމިޔާބު ކުރާނެކަމަށް ޕީޕީއެމްއިން ވަނީ ބުނެފައެވެ.
ޅ. ކުރެންދޫ އިން @ProgressPartyMV ޓީމް އަށް ދެއްވި ހޫނު މަރުހަބާއަށް ޝުކުރު އަދާކުރަން. #VoteIssey @Shiyamaldives @HeenaWaleed pic.twitter.com/RvD6bhiMgG
— ރުކުމާ (@RukumaA) February 24, 2022
ޅ.ކުރެންދޫ ކައުންސިލްގެ ރައީސް އިންތިޚާބު ކުރުމަށް އިންތިޚާބެއް ބާއްވަނީ ކައުންސިލްގެ ރަައީސްގެ މަގާމުގައި ހުންނެވި އިބްރާހިމް ޝިމާއު މިދިޔަ މަހު އިސްތިއުފާ ދެއްވުމާއި ގުޅިގެންނެވެ. އޭނާއަކީވެސް އެމްޑީޕީއަށް ނިސްބަތްވާ މީހެކެވެ.
މިއިންތިޚާބު ބޭއްވުމަށް ހަމަޖެހިފައިވަނީ އަންނަ މަހުގެ 26 ވަނަ ދުވަހުއެވެ. މި އިންތިހާބުގެ ރަސްމީ ނަތީޖާ އިއުލާނު ކުރުމަށް ހަމަޖެހިފައި ވަނީ މާޗު މަހުގެ 28 ވަނަ ދުވަހުގައެވެ.
މިހާތަނަށް ބޭއްވުނު އިންތިޚާބުތަކުގެ ނަތީޖާއަށް ބަލާއިރު، އެމްޑީޕީން ދެ ފަހަރު އަދި ޕީޕީއެމުން ދެ ފަހަރު ކުރެންދޫ ކައުންސިލްގެ މެޖޯރިޓީ ނަގާފައިވެއެވެ. މިދިޔަ އަހަރު ބޭއްވި ލޯކަލް ކައުންސިލްތަކުގެ އިންތިޚާބުގައި ކުރެންދޫ ކައުންސިލްގެ ފަސް ގޮނޑި ވެސް ކާމިޔާބުކުރީ ވެރިކަން ކުރާ މައި ޕާޓީ އެމްޑީޕީންނެވެ.
