ޔޫކުރެއިންގެ ވެރިރަށް ކީވްގެ އެއަރޕޯޓު ރަޝިއާ ސިފައިން އަތުން އަލުން ހިފައިފިކަމަށް ޔޫކުރެއިންގެ ޑިފެންސް މިނިސްޓަރ ވިދާޅު ވެއްޖެއެވެ.
ކިޔެވްގެ އެއަރޕޯޓު އަލުން ޔޫކުރެއިންގެ ބާރުދަށަށް ގެނެސްފައިވާކަމަށް ޔޫކުރެއިންގެ ޑިފެންސް މިނިސްޓަރު ވިދާޅުވެފައި ވާއިރު، ޔޫކުރެއިންގ ރައީސް ވޮލޮޑޮމިރ ޒެލެންސްކީ ވިދާޅުވެފައިވަނީ ރަޝިއާގެ 60،000 ސިފައިން މިހާރު ޔޫކުރެއިންއަށް ވަދެގެންފައިވާ ކަމަށާއި، ޔޫކުރެއިންގެ ހުރިހާ ސިފައިން ހަގުރާމައަށް މިހާރު ނެރެފައި ވާކަމުގައެވެ.
ރަޝިއާއިން ޔޫކުރެއިންގެ ވެރިރަށް ކިޔެވްގެ އެއަރޕޯޓު އެމީހުންގެ ބާރުގެ ދަށަށް ގެނައުމަށް ހަގުރާމަ ކުރަމުން ދާއިރު، ބައިނަލް އަގުވާމީ މީޑިއާތަކުން ރިޕޯޓު ކޮށްފައިވާ ގޮތުގައި، ވެރިރަށް ކިޔެވްގެ އުތުރުން 20 މޭލު ދުރުން ހޮސްޓޮމެލް ޓައުންގައި އޮތް އެއަރ ބޭސްއެއް ރަޝިއާ އެއަރ ބޯރން ޓްރޫޕްތަކުން މިހާރު ގެންދަނީ ޕެޓްރޯލް ކުރަމުންނެވެ. މި އެއަރޕޯޓަކީ، ރަޝިއާގެ އަސްކަރިއްޔާގެ އިތުރު ސިފައިންނާއި ހަތިޔާރު ވެރިރަށާއި ހަމައަަށް ގެނައުމަށް މުހިންމު އެއަރޕޯޓެކެވެ.
އެހެންނަމަވެސް މި އެއަރޕޯޓު ކައިރިން ސީއެންއެންގެ ޖާނަލިސްޓުން ރިޕޯޓު ކޮށްފައިވާ ގޮތުގައި ޔޫކުރެއިންގެ ސިފައިން ރަޝިއާގެ ޓްރޫޕްތަކާއި ދެކޮޅަށް ހަގުރާމަ ކުރަމުންދިޔަ މަންޒަރުތައް ވަނީ ފެނިފައެވެ. ބުރާސްފަތި ދުވަހުގެ ހަވީރު ޔޫކުރެއިންގެ އަސްކަރިއްޔާއިން ބުނެފައިވަނީ، މި އެއަރޕޯޓު ހިފުމަށް ހަމަލާދިން ރަޝިއާގެ އެލީޓް ސިފައިން ފައުޖުތައް ދުރަށް ޖައްސާ އެއަރޕޯޓު ހިމާޔަތް ކޮށްފައިވާ ކަމުގައެވެ.
ބުރާސްފަތި ދުވަހުގެ ރޭ، ޔޫކުރެއިންގެ ރައީސް ޒެލެންސްކީ ވަނީ އެގައުމުގެ 18 އަހަރާއި 60 އަހަރާއި ދެމެދުގެ ފިރިހެނުން އެގައުމު ދޫކޮށް ދިއުން މަނާކޮށްފައެވެ.
އަދި މަގުތަކަށް ނިކުމެ ގައުމުގެ ދިފާޢުގައި ހަގުރާމަ ކުރުމަށް ނިކުންނަ ރައްޔިތުންނަށް ބޭނުންވާވަރަށް ހަތިޔާރު ދޫކުރާނެކަމަށް ވައުދުވެ، ރަޝިއާއި ދެކޮޅަށް ހަގުރާމަ ކުރުމަށް ނިކުތުމަށްވެސ އޭނާވަނީ އެގައުމުގެ ރައްޔިތުންނަށް ގޮވާލައްވާފައެވެ.
ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކުގައި މިހާތަނަށް ޔޫކުރެއިން 137 މީހަކު މަރުވެފައިވާ ކަމުގައި ޔޫކުރެއިންގެ ރައީސް ވޮލޮޑޮމިރު ޒެކެންސްކީ ވަނީ ވިދާޅުވެފައެވެ.
ޔޫކުރެއިންގެ ރައީސް ޒެލެންސްކީ ވީޑިއޯ މެދުވެރިކޮށް ވާހަކަ ދދައްކަވަމުން ވިދާޅުވެފައިވަނީ ރަޝިއާއިން ދެމުންދާ ހަމަލާތަކުގައި މިހާތަނަށް 316 މީހަކަށް އަނިޔާ ވެފައިވާ ކަމަށާއި، އަދި މިހަގުރާމާގައި އެގައުމުގައި މަރުވެ ގޮސްފައިވަނީ ގައުމީ ބަތަލުން ކަމުގައެވެ. އަދި މީގެ އިތުރުން އާންމު ރައްޔިތުން ހަގުރާމައަށް ނެރުމަށްޓަކާ ރިޔާސީ ގަރާރެއްވެސް ޒެލެންސްކީވަނީ ނެރުއްވާފަައެވެ.
އެމެރިކާއިން ބުނެފައިވަނީ، ރަޝިއާގެ އަސްކަރިއްޔާއިން މިހާރު ދަނީ ޔޫކުރެއިންވެ ވެރިރަށާއި ދިމާލަށް ކުރިއަރަމުން ކަމަށާއި، ރަޝިއާގެ އިތުރު ސިފައިން މިހާރު ޔޫކުރެއިންގެ ބޯޑަރު ހުރަސްކޮށް އެގައުމަށް އަރަމުން ދާކަމުގައެވެ.
ރަޝިއާއިން ޔޫކުރެއިން އަރާ އެގައުމުގެ މިނިވަންކަން ނަމާލުމާއި ގުޅިގެން ދުނިޔޭގެ ގައުމުތަކުން ދަނީ ރަޝިއާއާއި ދެކޮޅަށް އިގްތިސާދީގޮތުން ދަތިކުރުމުގެ ފިޔަވަޅުތައް އަޅަމުންނެވެ. މިގޮތުން ރަޝިއާއި ދެކޮޅަށް އަޅާނޭ އިތުރު ފިޔަވަޅުތައް އާންމު ކޮށްފައިވަނީ އެމެރިކާއިންނެވެ.
