ރަޝިއާއިން ޔޫކްރެއިންގެ އިރުމަތީގައި ވަކިވެގަތުމަށް ހަގުރާމަ ކުރަމުންދާ ހަގުރާމަވެރިންގެ ބާރުގެ ދަށުގައިވާ ސަރަހައްދުތަކުގެ މިނިވަންކަން ބަލައިގަނެ، އެސަރަހައްދުތަކަށް ސުލްހަ ބެލެހެއްޓުމުގެ ނަމުގައި ރަޝިއާގެ އަސްކަރިއްޔާ ފޮނުވުމަށް އެގައުމުގެ ރައީސް ލާޑިމިރު ޕުޓިން އޯޑަރު ކުރުމާއި ގުޅިގެން، އެމެރިކާއިން އެގައުމާ ދެކޮޅަށް އަޅާ އިގްތިސާދީ ގޮތުން ދަތިކުރުމުގެ ވަރުގަދަ އިތުރު ފިޔަވަޅުތައް އިއުލާން ކޮށްފިއެވެ.
އިރުމަތީ ޔޫކުރެއިންގައި ވަކިވެގަތުމަށް ހަގުރާމަ ކުރަމުންދާ ހަގުރާމަވެރިންގެ ބާރުގެ ދަށުގައިވާ އެގައުމުގެ ދެސަރަހައްދު ކަމުގައިވާ ޑޮނެސްކްއާއި ލުހާންސްކައަކީ މިނިވަން ދައުލަތެއް ކަމުގައި ކަނޑައަޅާ، މި ދެ ސަރަހައްދުގެ މިނިވަންކަން ރަސްމީކޮށް ރަޝިއާގެ ރައީސް ލާޑިމިރު ޕުޓިންގެ ރިޔާސީ ގަރާރަކުން ވަނީ ބަލައިގެންފައެވެ. އަދި އެގައުމުގެ ގާނޫނުހަދާ މަޖިލިސް، ޑޫމާއިން ވަނީ ޕުޓިންގެ މިނެންމެވުމަށް މުޅި ޑޫމާގެ އަޢުލަބިއްޔަތުން އާބަސްބުނެ، ރަޝިއާގެ އަސްރިއްޔާ ގައުމުން ބޭރަށް ފޮނުވުމުގެ ހުއްދަ ޕުޓިންގއަށް ދީފައެވެ.
އެމެރިކާއިން ރަޝިއާއި ދެކޮޅަށް އަޅާ ދަތިކުރުމުގެ އިތުރު ފިޔަވަޅުތައް އަމާޒު ކޮށްފައިވަނީ ރަޝިއާގެ ސޯވެރިންގ ޑެޓަށާއި، އެގައުމުގެ އިގުތިސާދުގެ މުހިންމު ދެ މުވައްސަސާއަކަށެވެ. މީގެ ތެރޭގައި ހިމެނޭ ދެ މުވައްސަސާއަކީ، ރަޝިއާގެ ކޯޕަރޭޝަން ބޭންކު ފޯރ ޑިވެލޮޕްމެންޓް އެންޑް ފޮރިންގ އިކޮނޮމިކް އެފެރާރސް ވެނެޝްއިކޮނޮމްބޭން (VEB) އާއި ޕްރޮމްސްވިޔަޒްބޭންކު ޕަބްލިކް ޖޮއިންޓް ސްޓޮކް ކޮމްޕެނީ (PSB)އާއި، މި ދެ މުވައްސާގެ 42 ސަބްސިޑިއަރީ ކުންފުންޏެވެ.
VEB އަކީ ރަޝިއާ އެގައުމަށް ބޭނުންވާ މާލީ ފަންޑުތައް ހޯދުމުގައި މުހިންމު ދައުރެއް އަދާކުރާ މާލީ މުވައްސަސާއަކަށް ވާއިރު، PSB އަކީ ރަޝިއާގެ އަސްކަރިޔާއަށް އެހީތެރިކަން ފޯރުކޮށް ދިނުމުގައި މުހިންމު ދައުރެއް އަދާކުރާ މާލީ އިދާރާއެކެވެ.
ބައިޑްން އިއުލާން ކުރައްވާފައިވާ، އިގްތިސާދީ ދަތިކުރުމުގެ ވިޔަވަޅުތަކުގެ ނަތީޖާއެއްގެ ގޮތުން، ރަޝިއާގެ ކޯޕަރޭޝަން ބޭންކު ފޯރ ޑިވެލޮޕްމެންޓް އެންޑް ފޮރިންގ އިކޮނޮމިކް އެފެރާރސް ވެނެޝްއިކޮނޮމްބޭން (VEB) އާއި ޕްރޮމްސްވިޔަޒްބޭންކު ޕަބްލިކް ޖޮއިންޓް ސްޓޮކް ކޮމްޕެނީ (PSB)އާއި މި ދެ މުވައްސާގެ 42 ސަބްސިޑިއަރީ ކުންފުނިތަކަށް ދެން އިތުރަށް އެމެރިކާގައި ވިޔަފާރިއެއް ނުކުރެވޭނެއެވެ. ނަތީޖާއެއްގެ ގޮތުން މި ދެމުވައްސާ އެމެރިކާގެ ފައިނޭންޝަލް ސިސްޓަމާއި އެކީ ގުޅުން ކެނޑިގެން ދާނެއެވެ.
އަދި އެމެރިކާގައިވާ މި މުވައްސަސާތަކުގެ ހުރިހާ އެސެޓެއް ވަގުތުން ފްރީޒް ކުރުމުގެ އިތުރުން، އެމެރިކާގެ އެއްވެސް ކުންފުންޏަކަށްވެސް އަދި އަމިއްލަ ފަރުދަކަށްވެސް މި މުވައްސަސާތަކާއެކު ވިޔަފާރި ކުރުންވަނީ މަނާ ކުރެވިފައެވެ.
ރަޝިއާގެ މުހިންމު މާލީ ދެ މުވައްސާއާއި ދެކޮޅަށް އެމެރިކާއިން އެޅި ދަތިކުރުމުގެ ފިޔަވަޅުތަކުގެ ނަތީޖާއެއްގެ ގޮތުން، މި މުވައްސާތަކަށް ބައިނަލްއަގުވާމީ ފައިނޭންޝަލް ސިސްޓަމްގައި އެންމެ އަސާސީ މުޢާމަލާތު ކުރުންވެސް ހުއްޓުމަކަށް އަންނާނެއެވެ. އަދި މިފިޔަވަޅުތަކުގެ ނަތީޖާއެއްގެ ގޮތުން، ދިފާއީ ކަންކަމާއި ގުޅުންކުރި ކޮންޓްރެކްޓްތައް ގާއިމްކޮށް ފައިސާ ހޯދުމުގައި އެގައުމަށް ދަތިތަކާއި ކުރިމަތިވެގެން ދިއުމުގެ އިތުރުން، މިހާރު ޔޫކުރެއިންއާއި ދެކޮޅަށް ކުރިޔަށް ގެންދާ ކެމްޕޭއިންތަކަށް ފައިސާ ހޯދުމަށްވެސް ހުރަސްތަކާއި ކުރިމަތި ލާންޖެހޭނެއެވެ.
މީގެއިތުރުން އެމެރިކާއިން އެޅި ދަތިކުރުމުގެ ފިޔަވޅުތަކުގެ ތެރޭގައި، ރަޝިއާގެ ނުފޫޒުގަދަ، ޕުޓިންގެ އަރިސް ބައެއް ފަރާތްތަކާއި އެފަރާތްތަކުގެ އާއިލީ ފަރާތްތައްވެސް ވަނީ ހިމަނާފައެވެ. މީގެތެރޭގައި، ޕްރޮމްސްވިޔަޒްބޭންކު ޕަބްލިކް ޖޮއިންޓް ސްޓޮކް ކޮމްޕެނީ (PSB)ގެ ޗެއާރަމަންއާއި ސީއީއޯ ހިމަނާފައި ވެއެވެ.
އެމެރިކާއިން ދަތިކުރުމުގެ ފިޔަވަޅުތައް އަޅާފައިވާ ރަޝިއާގެ މާލީ ދެ އިދާރާއާއި އަދި އެތަންތަނާއި ގުޅުންހުރި 42 ސަބްސިޑީއަރީއަކީ ރަޝިއާގެ އިގުތިސާދުގައި މުހިންމު ދައުރެއް އަދާކުރަމުން އަންނަ މާލީ އިދާރާތަކެވެ. އަދި މި އިދާރާތަކުގެ އެތައް ބިލިއަން ޑޮލަރުގެ އެސެޓްތައް އެބަހުއްޓެވެ. އަދި ޚާއްސަކޮށް VEB އާއި PSB އަކީ ރަޝިއާގެ އިގްތިސާދުގެ އިތުރުން ރަޝިއާގެ ދިފާއީ ނިޒާމަށް މުހިންމު، ދައުލަތު ދެ ކުންފުންޏެއްވެ.
މިގޮތުން VEB އަކީ 53 ބިލިއަން ޑޮލަރުގެ އެސެޓްތައް ހުރި މާލީ އިދާރާއަކަށް ވާއިރު، މިއީ ރަޝިއާގެ އެންމެ ވަރުގަދަ 5 މާލީ އިދާރާގެ ތެރޭގައި ހިމެނޭ އެއް މުވައްސަސާއެވެ. އެމެރިކާއިން ދަތިކުރުމުގެ ފިޔަވަޅު އަޅާފައިވާ PSBއަކީ ރަޝިއާގެ 8 ވަނައަށް އެންމެ ބޮޑު ބޭންކެވެ. މި ބޭންކަކީ ރަޝިއާގެ ޑިފެންސް މިނިސްޓްރީ އަދި ރަޝިއާގެ ޑިފެންސް ސެކްޓަރއަށް ފައިނޭންސް ކުރާ ބޭންކެވެ.
ރަޝިއާއިން ޔޫކުރެއިންގެ މިނިވަންކަމަށް އަރައިގަނެއް، އެގައުމުގައި ވަކިވެގަތުމަށް ހަގުރާމަ ކުރަމުންދާ ހަގުރާމަވެރިންގެ ބާރުގެ ދަށުގައިވާ އިރުމަތީ ސަރަހައްދުތަކުގެ މިނިވަންކަން ބަލައިގަތުމާއިއެކު އެމެރިކާގެ ރައީސް ޖޯ ބައިޑްންވަނީ، ރަޝިއާއިން މިނިވަން ދައުލަތުގެ ގޮތުގައި އިއުލާން ކޮށްފައިވާ ޔޫކުރެއިންގެ އެއްވެސް ސަރަަހައްދެއްގައި އެމެރިކާގެ އެއްވެސް ކުންފުންޏަކުން އިންވެސްޓުކުރުން މަނާކުރުމުގެ ގޮތުން ރިޔާސީ ގަރާރެއް ނެރުއްވާފައެވެ. އަދި މިސަރަހައްދުތަކުގައި ކުރެވޭ ވިޔަފާރިތަކާއި ގުޅުހުން ހުރި ފަރާތްތަކާއި ދެކޮޅަށްވެސް މި ގަރާރުގެ ދަށުން ދަތިކުރުމުގެ ފިޔަޅު އެޅުމުގެ ފުރުސަތުވެސް މިހާރު އޮންނާނެއެވެ.
