އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ ޅ. ހިންނަވަރު، މާފިނި، ހަލީމަތު ލަމްހާ އަބްދުއްރަހްމާނު ޝަރީއަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
24 އަހަރުގެ ލަމްހާގެ މައްޗަށް ދައުލަތުން ތިން ދައުވާއެއް އުފުލާފައިވެއެވެ. އެއީ އެނގިހުރެ މީހަކު މެރުމުގައި ބައިވެރިވުމުގެ ދައުވާ އާއި، އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާގެ އިތުރުން ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދައުވާއެވެ.
މޭރީ މަރަން ރޭވުމާއި، މަރު ފޮރުވުމާއި، ކުށް ކުރުމަށް ރޭވުމާއި، ކުށެއް ކުރުމަށް އެދުމާއި، ކުށްކުރުމުގެ އާލާތް އަތުގައި ހުރުމާއި އަދި ރަސްމީ އިދާރާތަކަށް ދޮގު މައުލޫމާތު ދިނުމުގެ ތުހުމަތު ވެސް ލަމްހާގެ މައްޗަށް ދައުލަތުން ކުރެއެވެ.
މިއަދުގެ އަޑު އެހުމުގައި ދިފާއުން ވަނީ އަދުލު އިންސާފަށް ހުރަސް އެޅޭނެކަމަށް ބަލައި ސިއްރުކޮށްދިނުން އެދިފައެވެ. ނަމަވެސް ދައުލަތުން ވަނީ މި މައްސަލައަށް ނޫސްވެރިން ވަނުމުން އަދުލު އިންސާފަށް ހުރަސް އެޅެނީ ކިހިނެއްތޯ ދައުލަތަށް ސާފު ނުވާކަމަށް ވިދާޅުވެފައެވެ. މިއީ އެ މާއްދާގެ ދަށުން ޝަރީއަތް ސިއްރު ކުރަން ޖެހޭ ޙާލަތެއް ކަމަށް ޤަބޫލު ނުކުރެވޭކަމަށްވެސް ވަކީލު ވިދާޅުވިއެވެ. އެގޮތުން މީޑިއާގައި ވަކި ގޮތަކަށް ޚަބަރެއް އޮތުމަކީ ގާޒީއަކު އެ ޚަބަރަކަށް ބަލައިގެން އަޑުއެހުން ސިއްރު ކުރަންޖެހޭ ސަބަބެއް ނޫންކަމަށް ވަކީލު ވިދާޅުވިއެވެ.
މީގެއިތުރުން، ލަމްހާގެ ސިއްޙީ މައްސަލައެއް ހުރިކަމާއި ގުޅޭ ޝަކުވާއެއް އޮތްކަމަށް ކަރެކްޝަންސްއިން ސާފުކުރި މައުލޫމާތުތަކުންވެސް އެނގެން ނެތްކަމަށް ވަކީލު ވިދާޅުވިއެވެ. ހަމައެއާއެކު، ޖިނާއީ އިޖުރާއަތުގެ ޤާނޫނުގެ 143 ވަނަ މާއްދާއަށް ބަލާއިރު، މީހަކު ލަދުގަނެދާނެތީ ނުވަތަ މުޖުތަމައުގެ ތެރޭގައި އަގުވެއްޓިދާނެތީ އެ އަޑުއެހުމެއް ސިއްރު ކުރުން ނުހިމެނޭކަމަށް ވިދާޅުވިއެވެ. ބަންދު މުރާޖައާގާއި ދައުލަތުން ވަނީ ލަމްހާ ޝަރީއަތް ނިމެންދެން ބަންދު ކުރުމަށް އެދިވަޑައިގެންފައެވެ.
މޭރީ ގްރޭސްގެ މަރުގެ މައްސަލައިގައި ދައުވާކޮށްފައިވާ މޭރީގެ ފިރިމީހާ މާވިންވެސް ވަނީ ޝަރީއަތް ނިމެންދެން ބަންދުކޮށްފައެވެ. ދައުލަތުން މާވިންގެ މައްޗަށް ކޮށްފައިވަނީ އެނގި ހުރެ މީހަކު މެރުމުގެ ދައުވާއެވެ.
މޭރީ މަރާލިކަމުގެ ކުށް މާވިންއަށް ސާބިތުވެއްޖެނަމަ، އެ ކުށުގެ އަސާސީ އަދަބަކީ 10 އަހަރަށް ޖަލަށް ލުމެވެ. އަދި ލަމްހާގެ މައްޗަށް އުފުލާފައިވާ ހުރިހާ ދައުވާއެއް ސާބިތުވެއްޖެނަމަ ލަމްހާގެ މައްޗަށް 6އަހަރާއި 4މަހާއި 24 ދުވަހުގެ ޖަލު ހުކުމެއް އަންނާނެއެވެ.
އޮކްޓޯބަރު މަހުގެ 19ވަނަ ދުވަހު މަރުވި ފިލިޕީންސް އަންހެންމީގެ މަރުގެ މައްސަލަ ފުލުހުން ތަޙުގީގުކުރަން ފެށީ، އެޙާދިސާއާ ގުޅިގެން އާދަޔާ ޚިލާފައި ކަންތައްތަކެއް ފާހަގަކުރެވިގެންނެވެ. މަންޒަރުދުށް ބައެއް މީހުން ބުނިގޮތުގައި، އޭނާ މަރުވެގެން ހޮސްޕިޓަލަށް ގެންގޮސްފައިވަނީ އޭނާގެ ފިރިމީހާއެވެ. މި މައްސަލައާ ގުޅިގެން އެންމެ ބޮޑަށް ޝަކުކުރެވެނީވެސް މޭރީގެ ފިރިމީހާއަށެވެ. މޭރީގެ މަރުގެ މައްސަލާގައި ހެދި ޕޯސްޓްމޯޓަމް ރިޕޯޓްގައި ވާގޮތުން މޭރީ މަރާލާފައިވަނީ ނޭވާ ހާސްކޮށްލައިގެންނެވެ.
މާވިންއާއި ލަމްހާވެސް މަސައްކަތް ކުރަމުންދިޔައީ އައިޖީއެމް ހޮސްޕިޓަލްގައި ނަރުހެއްގެ ގޮތުގައެވެ.
