އެމްޑީޕީގެ ޕާލަމެންޓްރީ ގުރޫޕްގެ އިންތިޚާބުގައި، ޑެޕިއުޓީ ލީޑަރުންގެ މަޤާމަށް ވާދަކުރެއްވި ބޭފުޅުންގެ ތެރެއިން ވޯޓު އެއްވަރުވި ދެކެނޑިޑޭޓުންގެ މެދުގައި ބާއްވާ އިންތިޚާބު މިމަހުގެ 28 ވަނަ ދުވަހު ބޭއްވުމަށް ނިންމައިފިއެވެ.
އެމްޑީޕީގެ ޕީޖީ ގްރޫޕްގެ ޑިޕިއުޓީ ލީޑަރުންގެ އިންތިޚާބުގައި ވޯޓު އެއްވަރުވީ، ހެންވޭރު ދެކުނު ދާއިރާ މެމްބަރު ހުސެއިން ޝަހީމް (އަނދުން ހުސެއިން) އާއި ހުޅުދޫ ދާއިރާގެ މެމްބަރު އިލިޔާސް ލަބީބްއެވެ. އަދުން ހުސެއިންއަށާއި އަދި އިލްޔާސް ލަބީބު، ކޮންމެ ބޭފުލަކަށްވެސް ލިބިފައިވަނީ 34 ވޯޓެވެ.
އެމްޑީޕީން ބުނެފައިވަނީ 18 ފެބްރުއަރީ 2022 ވީ (ހުކުރު) ދުވަހު ބޭއްވި ޕާލިމެންޓަރީ ގްރޫޕްގެ މަޤާމްތަކަށް މެމްބަރުން އިންތިޚާބް ކުރުމަށް ބޭއްވި އިންތިޚާބުގައި ޑެޕިއުޓީ ލީޑަރ ކަމަށް ކުރިމަތިލެއްވި 3 ކެންޑިޑޭޓުންގެ ތެރެއިން 2 ކެންޑިޑޭޓުންނަށް ލިބުނު ވޯޓު އެއްވަރުވުމާއި ގުޅިގެން އެއްވަރުވި 2 ކެންޑިޑޭޓުންގެ މެދުގައި އަލުން ވޯޓުނެގުމާއި، ޕާލިމެންޓަރީ ގްރޫޕުގެ 1 ވިޕްގެ މަގާމަށް ހުޅުވާލާފައިވާކަމަށެވެ.
މިއިންތިޚާބުގެ ވޯޓުލުން އޮންނާނީ 28 ފެބްރުއަރީ 2022 ވާ ހޯމަ ދުވަހުގެ މެންދުރުފަހު 2:00 އިން ހަވީރު 4:00 އަށް ކަމަށާއި، މި އިންތިޚާބުގައި ހުޅުވާލި ވިޕްގެ މަގާމަށް ވާދަކުރައްވަން ބޭނުންފުޅުވާ އެމްޑީޕީގެ ޕާލިމަންޓަރީ ގްރޫޕް މެމްބަރުން 27 ފެބްރުއަރީ 2022 ވާ އާދިއްތަ ދުވަހުގެ 12:00 ކުރިން [email protected] އަށް ކުރިމަތި ލުމަށް އެދޭ ލިއުމާއެކު އައި.ޑީ ކާޑް ކޮޕީ އީމެއިލް ކުރެއްވުމަށް ވަނީ ދަންނަވާފައެވެ.
އެމްޑީޕީގެ ޕާލަމެންޓްރީ ގުރޫޕްގެ އިންތިޚާބުގައި، އާލި އާޒިމްއާއި ވާދަކޮށް އެމްޑީޕީގެ ޕީޖީ ލީޑަރުކަން ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވަނީ ކާމިޔާބުކޮށްފައެވެ. އެމްޑީޕީގެ ޕީޖީ ގުރޫޕުގެ އިންތިޚާބު އަސްލަމް ކާމިޔާބު ކުރައްވާފައި ވަނީ ޕީޖީ ގުރޫޕުގެ 40 މެމްބަރުންގެ ވޯޓު ހޯއްދަވައިގެންނެވެ. އަސްލަމްއާއި ވާދަކުރެއްވި މެދުހެންވޭރު ދާއިރާގެ މެމްބަރު އަލީ އާޒިމަށް ލިބިފައިވަނީ 25 ވޯޓެވެ. ޕީޖީ ގްރޫޕްގެ ޑެޕިއުޓީ ލީޑަރަކަށް ހޮވިފައިވަނީ އަލިފުށީ ދާއިރާގެ މެމްބަރު މުހައްމަދު ރަޝީދު ހުސެއިންއެވެ.
