ފަރްހާން އަޚްތަރާއި އޭނާގެ ލޯބިވެރިޔާ، ޝިބާނީ ޑަންޑޭކަރް ކައިވެނި ކޮށްފިއެވެ.
އިންޑިއާގެ ސަގާފަތް ތަކާއި އެއްގޮތަށް ފަރްހާންގެ ކައިވެނީގެ ހަފްލާތައް ބުރާސްފަތި ދުވަހުން ފެށިގެން ވަނީ ކުރިއަށް ގެންގޮސްފައެވެ. އަދި ކައިވެނި މަޖިލީސް ބޭއްވީ އިއްޔެ މެންދުރު ފަހުއެވެ. މި ހަފްލާގައި ބައިވެރިވީ ދެ ފަރާތުގެ އާއިލާ އާއި ގާތް ރަހުމަތްތެރިން އެކަންޏެވެ.
ކައިވެނީގެ ހަފްލާގެ އެއްވެސް ފޮޓޯއެއް ރަސްމީކޮށް އެއްވެސް ފަރާތަކުން އަދި މިހާތަނަށް ހާމަކޮށްފައި ނުވިނަމަވެސް، ސޯޝަލް މީޑިއާގައި ހަފްލާގެ އެއް ފޮޓޯ ވަނީ ލީކުވެފައެވެ.
ކައިވެނީގެ ހަފްލާގައި ފަރްހާން ކަޅު ކުލައިގެ ކޯޓެއްގައި ހުރިއިރު ޝިބާނީ ހުރީ ރަތް ކުލައިގެ ހެދުމެއް ގައެވެ. އަދި ހަފްލާ ޒީނަތްތެރިކޮށްފައިވަނީވެސް ރަތް ކުލައިގެ މަލުންނެވެ.
ކައިވެނި ހަފްލާގައި ބޮލީވުޑްގެ ފާހަގަކޮށްލެވޭ ތަރިންގެ ތެރެއިން ބައިވެރިވީ ފަރްހާންގެ ގާތް އެކުވެރިޔާ ރިތިކް ރޯޝަންގެ އާއިލާއިންނެވެ. ރިތިކްގެ ބައްޕަ ރާކޭޝް ރޯޝަނަކީ ފަރްހާންގެ ބައްޕަ ޖާވިދު އަޚްތަރުގެ ވެސް ވަރަށް ގާތް ފަރާތެކެވެ.
ފަރްހާނާއި ޝިބާނީ ލޯބީގެ ގޮތުން ގުޅިގެން އުޅޭތާ 4 ވަރަކަށް އަހަރު ވަނީ ވެފައެވެ. މިއީ ލަވަކިއުންތެރިޔާ އަދި ފިލްމީ ތަރި ޝިބާނީގެ އަލަތު ކައިވެނި ކަމުގައި ވިޔަސް، 47 އަހަރުގެ ފަރުހާންގެ ދެވަނަ ކައިވެންޏެވެ. ފަރުހާނާއި ހެއާ ސްޓައިސްޓް އަދުނާ ބަބާނީ ކައިވެނި ރޫޅާލީ 2017 ގައެވެ. މި ކައިވެންޏަށް ވަނީ ދެ އަންހެން ކުދިން ލިބިފައެވެ.
