1945 ވަނަ އަހަރު ދުނިޔޭގައި ހިގައިދިޔަ ދެވަނަ ބޮޑު ހަގުރާމައަށްފަހު، ޔޫރަޕް ބައްރުގައި ހަތިޔާރާއި ސިފައިން ޖަމާކޮށް، ގައުމުތަކުގެ ސަލާމަތަށް ނުރައްކާ ވާވަރުގެ ބޮޑު ހަމަ ނުޖެހުމެއް ހިގާފައެއް ނުވެއެވެ. އޭގެ އެއް ސަބަބެއްގެ ގޮތުގައި ބެލެވިފައި އޮތީ، ޔޫރަޕް ބައްރަކީ އިގުތިސާދީ ގޮތުންނާއި އަސްކަރީ އަދި ސިޔާސީ ގޮތުން މިއަދު އެއްގައުމާއި އަނެއް ގައުމާއި ގުޅި ލާމެހިފައިވާ ގައުމުތަކަކަށް ވެގެން ދިއުމެވެ.
މިގޮތުން އެކުލަވާލެވިފައިވާ ބައެއް އެއްބަސްވުންތަކުން އެއްގައުމު އަނެއް ގައުމަށް ސަލާމަތާއި ރައްކާތެރިކަން ފޯރުކޮށް ދިނުން ލާޒިމްވެފައި އޮތުމުގެ އިތުރުން، ދުނިޔޭގައި ނިއުކުލިއަރ ހަތިޔާރުގެ ގާބިލްކަން ލިބިފައިވާ ގިނަ ގައުމުތަކަކީވެސް ޔޫރަޕް ބައްރަށް ނިސްބަތްވާ ގައުމުތަކެވެ. ނުވަތަ ހުޅަނގުގެ ގައުމުތަކެވެ. އޭގެ ނަތީޖާއެއްގެ ގޮތުން، ޔޫރަޕްގެ އަދި ހުޅަނގުގެ ގިނަ ގައުމުތަކަކީ އުދުވާނީ ހަމަލާތަކުން ފުރިހަމަޔަށް ރައްކާތެރިކަން ލިބިގެންވާ އަދި އަސްކަރީގޮތުން ދުނިޔޭގައިވާ އެންމެ ބާރުގަދަ ގައުމުތަކެވެ.
އެހެންނަމަވެސް، ޔޫރަޕް ބައްރުގައި ޔޫރަޕްގެ ގައުމުތައް އަސްކަރީ ފުރިހަމަ ރައްކާތެރިކަމުގައި ތިބޭ ތިބުމުގެ އިތުރުން، މި ގައުމުތަކުގެ ބާރާއި ނުފޫޒު މުޅި ދުނިޔެއަށް ފެތުރުމުގެ ސިޔާސަތު މިގައުމުތަކުން ފާއިތުވެދިޔަ އަހަރުތަކުގައި ވަނީ ވަރަށްވެސް ބާރަށް ކުރިޔަށް ގެންގޮސްފައެވެ. އަދި މީގެ އިތުރުން، އެމެރިކާއާއި ޔޫރަޕްގެ ގައުމުތަކާއި، އިގްތިސާދީ ގޮތުންނާއި އަސްކަރީގޮތުން ފައިހަމަ ކުރުމުގެ ގާބިލްކަން ހޯދަމުންދާ ޗައިނާ އަދި ރަޝިއާފަދަ ބައެއް ގައުމުތަކުގެ ބާރު ގަދަވެގެން ދިޔަ ނުދިނުމަށް ޔޫރަޕްގެ އިންތިހާދުންނާއި އަދި އެމެރިކާއިން އަބަދުވެސް އައިސްފައިވަނީ ތަފާތު ރޭވުންތައް ރާވާ، ތަފާތު ސްޓެރަޓެޖީތަކުގެ ބޭނުން ކުރަމުންނެވެ.
މިގޮތުން އުފައްދާފައިވާ އެންމެ މުހިންމު އެއް ބާރަކަށް ވެގެން ގޮސްފައިވަނީ އެމެރިކާވެސް ހިމެނޭގޮތުން އުފައްދާފައިވާ، އެޓްލާންޓިކް ސަރަހައްދު ހުރަސްކޮށް ދުނިޔޭގެ އިރުމައްޗަށް ފުޅާވަމުންދާ، ސަލާމަތާއި ގުޅުންހުރި އިއްތިހާދު، (ނޯތު އެޓްލާންޓިކް ޓްރީޓީ އޯގަނިޒޭޝަން) ނޭޓޯއެވެ. މި ޖަމާއަތަކީ ޔޫރަޕްގެ 28 ގައުމެއް ހިމެނިގެން، އަދި އޭގެ އިތުރުން ނޯތު އެމެރިކާއިން ކެނެޑާއާއި އެމެރިކާ ހިމެނޭ ގޮތަށް 30 ގައުމެއްގެ މައްޗަށް އެކުލެވިގެންވާ، މިގައުމުތަކަށް ސަލާމަތާއި ރައްކާތެރިކަން ފޯރުކޮށް ދިނުމުގެ ޒިންމާ މި ޖަމާއަތުގެ އަސާސީ ގަވާއިދުގައި ހިމެނިފައިވާ ޖަމާއަތެކެވެ.
1949 ވަނަ އަހަރު މިޖަމާއަތް އުފެދިގެންދިޔަ އިރު އެންމެ 12 ގައުމުގެ މައްޗަށް އުފެދިފައޮތް މި ޖަމާއަތް ނޯތު އެޓްލާންޓިކް ހުރަސްކޮށް ދުނިޔޭގެ އިރުމައްޗަށް ފުޅާކޮށް، މިހާރު މިއީ ދުނިޔޭގެ 30 ގައުމު މިޖަމާއަތުގެ މެމްބަރުންގެ ގޮތުގައި އޮތް ޖަމާއަތެކެވެ. މިގޮތުން، ކުރީގެ ސޯވިއެޓް ޔޫނިއަންގައި ހިމެނުނު ގިނަ ގައުމުތައްވެސް މިހާރު ނޭޓޯގައި ހިމެނިފައިވާއިރު، ރަޝިއާއި އިންވެގެން އޮތް ޔޫކުރެއިންވެސް އެންމެފަހުން ވަނީ މި ޖަމާއަތުގައި ހިމެނުމުގެ ޝައުގުވެރިކަން ފާޅުކޮށް، ނޭޓޯއިން މެމްބަރު ގައުމުތަކަށް ފޯރުކޮށް ދޭން ޖެހޭކަމަށް އެ ޖަމާޢަތުގެ ގާނޫނު އަސާސީގައި ލިޔެފައި އޮންނަ އަސްކަރީ ރައްކާތެރިކަން ހޯދުމުގެ މަސައްކަތް ފަށާފައެވެ.
ރަޝިއާގެ ހުރިހާވެސް ކަންބޮޑުވުމަކީ މިއީއެވެ. އެގައުމާއި އިންވެގެން، 30 ގައުމުގެ މައްޗަށް އެކުލެވޭ (ނިއުކުލިއަރ ބާރުތައްވެސް ހިމެނޭގޮތުން) ވަރުގަދަ އަސްކަރިޔާއެއް އޮންނާކަށް ރަޝިއާއިން ފުރުސަތު ދޭން ބޭނުމެއް ނުވެއެވެ.
ނަތީޖާއެއްގެ ގޮތުން، ނޭޓޯ އިތުރަށް ފުޅާވެގެން ދިޔަ ނުދިނުމަށް ރަޝިއާއިން ކުރަމުންދާ މަސައްކަތުގައި، މޮސްކޯގެ ކަންބޮޑުވުންތަކަށް ޑިޕްލޮމެޓިކް ހައްލު ހޯދުމުގެ ގޮތުން ނޭޓޯގެ މެމްބަރެއްގެ ގޮތުގައި ޔޫކުރެއިން ނުހިމަނާނެ ކަމުގެ ޔަގީންކަން ރަޝިއާއިން ބޭނުންވި ނަމަވެސް، އެ ޖަމާއަތުންނާއި އެމެރިކާއިން ރަޝިއާއަށް މިޔަގީންކަން ދޭން ދެކޮޅު ހެދުމާއެކު، ބޮޑު ހަނގުރާމައެއްގެ ބިރުވެރިކަން މުޅި ޔޫރަޕް ބައްރަށް މިހާރުވަނީ ފެތުރިގެން ގޮސްފައެވެ.
ހަގުރާމައެއް ފެށިއްޖެނަމަ ރަޝިއާއާއި ދެކޮޅަށް އިގުތިސާދީ ވަރުގަދަ ފިޔަވަޅުތަކެއް! ދުނިޔޭގެ އިގްތިސާދަށް އަސަރު ކުރާނެ!
ރަޝިއާއިން ނޭޓޯއާއި އަދި އެމެރިކާގެ ފަރާތުން ބޭނުންވާ ސަލާމަތީ ރައްކާތެރިކަމާއި ޔަގީންކަން ފޯރުކޮށް ދިނުމަށް އެފަރާތްތަކުން ދެކޮޅު ހެދުމާއި ގުޅިގެން، ރަޝިއާއިން މިހާރު ތައްޔާރު ވަމުންދަނީ ޔޫކުރެއިން އެރުމަށެވެ. އަދި އެމެރިކާއާއި ހުލަނގުގެ ގައުމުތަކުން ބުނަމުންދަނީ، ރަޝިއާއިން ޔޫކުރެއިންއަށް ހަމަ ކޮންމެ ވަގުތެއްގައިވެސް ހަމަލާދޭން ފަށާފާނެ ކަމުގައެވެ.
މިގޮތުން، ދުނިޔޭގައި މިވަގުތު އޮތް އެންމެ ވަރުގަދަ އެއް އަސްކަރިއްޔާއިން ޔޫކުރެއިންއަށް އުދުވާނީ ހަމަލާ ދޭން ފަށައިފިނަމަ، ރަޝިއާއި ދެކޮޅަށް ވަރުގަދަ އިގްތިސާދީ ދަތިކުރުމުގެ ފިޔަވަޅުރައް އަޅާނެކަމުގެ އިންޒާރު އެމެރިކާގެ އިތުރުން ޔޫރަޕްގެ އިއްތިހާދުންވެސް ވަނީ ދީފައެވެ. މީގެރެރޭގައި، ރަޝިއާއި ޔޫރަޕަށް ފޯރުކޮށްދެމުންދާ ގޭސް ފޯރުކޮށް ދިނުން ހުއްޓުމަކަށް އައުމުގެ އިތުރުން، ރަޝިއާގެ ގިނަ ކުންފުނިތަކަށް ވިޔަފާރި ކުރުމަށް ދަތި ކުރުމާއި، ރަޝިއާގެ ބޭންކުތަކަށްވެސް ވިޔަފާރީ މުޢާމަލާތްތައް ކުރެވޭ މަގުތަށް ހަނިކުރުމުގެ އިތުރުން، އެންމެ ފަހުގެ މަރުހަލާއެއްގައި، ފައިސާ ޓްރާސްފަރ ކުރުމުގައި ބޭނުން ކުރެވޭ ގްލޯބަލް އިލެކްޓްރޯނިލް ޕޭމެންޓް މެސެޖިންގ ސިސްޓަމް (SWIFT) އެގައުމުގެ މާލީ ނިޒާމަށް ބޭނުން ނުކުރެވޭ ގޮތް ހެދުންވެސް ހިމެނޭކަމަށް ބައެއް ފަރާތްތަކުން ވަނީ ހާމަ ކޮށްފައެވެ.
މިގޮތުން ރަޝިއާއަށް ސްވިފްޓު ބޭނުން ނުކުރެވޭގޮތް ހަދައިފިނަމަ، އެގައުމުގެ މުޅި އިގްތިސާދު އިނދަޖެހި، ފައިސާގެ އަގުވެއްޓި، މާލީ މުޢާމަލާތް ކުރުމުގައި ކުރިމަތިވާ ދަތިތަކުގެ ނޭދެވޭ އަސަރު މުޅި ދުނިޔެއަށް ފޯރާނޭކަމަށް މަސްރަހު ދިރާސާކުރާ ފަރާތްތަކުން ދަނީ ބުނަމުންނެވެ.
ރާއްޖޭގެ އިގުތިސާދާއި ފަތުރުވެރިކަމުގެ ސިނާއަތު!
ރާއްޖޭގެ ފަތުރުވެރިކަމުގެ ސިނާއަތަކީ، ސީދާ ގޮތުން ދިވެހި އިގްތިސާދުގައި ޖީޑީޕީގެ ނިސްބަތުން 26.3 އިންސަތަ މިއަދު ހިއްސާ ކުރަމުންދާ ސިނާއަތެކެވެ. ނުސީދާގޮތުން ޖީޑީޕީގެ 70 އިންސައްތަ މި ސިނާއަތުގެ ހިއްސާ ދިވެހި އިގްތިސާދުގައި އެބަ އޮތެވެ. އަދި ފަތުރުވެރިކަމުގެ ސިނާއަތަކީ ދިވެހިރާއްޖެއަށް ވަންނަމުންދާ ބޭރު ފައިސާގެ 90 އިންސައްތަ ވަންނަމުންދާ މައި ދޮރާށިވެސް މެއެވެ.
މީގެ އިތުރުން، ފާއިތުވެދިޔަ 2021ވަނަ އަހަރަށް ބަލާއިރު، ކޯވިޑްގެ އާލަމީ ވަބާއާއި އެކުވެސް، ރާއްޖޭގެ ފަތުރުވެރިކަމުގެ ސިނާއަތުގެ އެންމެ "ޓޮޕް މާރކެޓް"ގެ ގޮތުގައި އޮތީ އިންޑިއާއައި ރަޝިއާއެވެ. ރާއްޖެއަށް އެންމެ ގިނައިން ފަތުރުވެރިން ރިޒާރަތް ކޮށްފައިވަނީ އިންޑިއާއިން އިންނެވެ. މި ލިސްޓުގެ ދެވަނާގައި އޮތީ ރަޝިއާއެވެ. އަދި އަދި 3 ވަނާގައި އޮތީ ޖާރމަނީއެވެ. ރަޝިއާއިން އެގައުމެއް ވަށާލާފައިވާ ޔޫކްރެއިންއަކީ އެންމެ ބޮޑު 10 މާރކެޓްގެ ތެރޭގައި ހިމެނޭ އެއް ގައުމެވެ. މިގޮތުން ޔޫކްރެއިންއަކީ 2021ވަނަ އަހަރު 9 ވަނައަށް އެންމެ ގިނައިން ރާއްޖެއަށް ފަތުރުވެރިކަން ޒިޔާރަތް ކޮށްފައިވާ ގައުމެވެ.
އެހެންކަމުން ޔޫރަޕް ބައްރުގައި ބޮޑު ހަގުރާމައެއް ފެށި، މުޅި ޔޫރަޕް ބައްރު ބޮޑު ތަޅާފޮޅުމެއްގެ ތެރެއަށް ހިގައްޖެނަމަ، ރާއްޖޭގެ ފަތުރުވެރިކަމަށް މިފަދަ ހަމަނުޖެހުމެއްގެ އަސަރު ކުރާނެކަމަށް ބެލެވޭ އެންމެ ބޮޑު އެއްސަބަބަކީ، މި ހަމަނުޖެހުމުގެ އެންމެ ކުރީސަފުގައި އޮތް ދެގައުމު ކަމުގައިވާ ރަޝިއާއާއި ޖާރމަނީއަކީ ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކުރަމުންދާ ދެގައުމު ކަމުގައި ވާތީއެވެ.
އަދު މީގެ އިތުރުން ފާހަގަ ކޮށްލަންޖެހޭ އެންމެ މުހިންމު ކަމަކީ، ޔޫރަޕްގައި ހިގަމުންދާ މި ބޮޑު ހަމަނުޖެހުމުގައި ހިމެނޭ ގިނަ ގައުމުތަކަކީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ 10 ގައުމުގެ ތެރޭގައި ހިމެނޭ ގައުމުތައް ކަމުގައިވާތީއެވެ. މިގޮތުން އިނގިރޭސިވިލާތަކީ މި ލިސްޓުގެ 5 ވަނާގައި އޮތް ގައުމަށް ވާއިރު، ޖެހިގެން މި .ލިސްޓުގެ 6 ވަނާގައި ވަނީ އެމެރިކާއެވެ.
އެހެންކަމުން، ރަޝިއާއި އާއި ޔޫކުރެއިންއާއި ދެމެދު ބޮޑު ހަގުރާމައެއް ފެށި، އަދި އޭގެ ނަތީޖާއެއްގެ ގޮތުން ޔޫރަޕާއި އެމެރިކާއިން ރަޝިއާއި ދެކޮޅަށް އިގްތސާދީ ދަތިކުރުމުގެ ވަރުގަދަ ފިޔަވަޅުތަކެއް އަޅާއިފި ހާލަތެއްގައި އެގައުމުން ރާއްޖެއަށް ފަތުރުވެރިން ޒިޔާރަތް ކުރުމުގައި ބޮޑެތި ގޮންޖެހުންތަކާ ކުރިމަތި ލާން ޖެހޭނެއެވެ. ސަބަބަކީ، އެފަދަ ހާލަތެއްގައި ރަޝިއާ ހިމެނޭ ސަރަހައްދުގައި ޓުއަރިޒަމް އިސްތިހާރު ކުރުމަށް ކުރެވޭ މަސައްކަތްތަކާއި، އަދި އޭގެ އިތުރުން ރަޝިއާގެ ބައެއް ކިންފުނިތަކާއި މުޢާމަލާތް ކުރުމާއި އަދި އޭގެ އިތުރުން ފައިސާގެ މުޢާމަލާތައް ކުރުމުގައިވެސް ކުރިމަތިވެގެންދާނެ ބޮޑެތި ގޮންޖެހުންތަކާއި ދަތިތައް ހުންނާނޭކަމަށް ބެލެވޭތީއެވެ.
ދުރާލާ ފިޔަވަޅު އަޅަންޖެހޭ!
ކޮންމެއަކަށް މިއަދު ގަބޫލުކުރަން ޖެހޭ ހަގީގަތަކީ، މުޅި ޔޫރަޕް ބައްރަށް އޮތީ ހަގުރާމައިގެ ކަޅުބޯ ވިލާގަޑެއް ވެރިވެފައި ކަމެވެ. އަދި މިއީ ދުނިޔޭގެ ދެވަނަ ބޮޑު ހަގުރާމައަށްފަހު އެ ބައްރަށް ކުރިމަތިވެގެންދާ މިފަދަ ހަމައެކަނި ހާލަތުވެސްމެއެވެ. އަދި އެމެރިކާއާއި ޔޫރަޕްގެ ގިނަ ގައުމުތަކުންވެސް ބުނަމުންދަނީ، ރަޝިއާއިން ޔޫކުރެއިންއަށް ހަމާލާދީ، އެގައުމު ހިފުމަށް މިހާރު ތައްޔާރު ވެފައިވާ ކަމަށާއި، މިހަމަލާތައް ހަމަ ކޮށްމެ ވަގުތެއްގައިވެސް ފެށިގެން ހިގައިދާނެ ކަމުގައެވެ.
އެހެންކަމުން، ޔޫރަޕް ބައްރަށް މިހަގުރާމައިގެ ހަގީގީ އަސަރު ކޮށްފިނަމަ، މިހާރު ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކުރާ މާރކެޓްތަކަށް ބަލާއިރު، މި ހަމަނުޖެހުމުގެ ނޭދެވޭ އަސަރު ރާއްޖެއަށް ނުކޮށް ދިއުމަކީ ދުރުކަމެކެވެ. އޭގެ ނަތީޖާއެއްގެ ގޮތުން، ކޯވިޑު އަދި އަރައިގަނެވިފައި ނުވާ، ފަތުރުވެރިކަމުގެ ނާޒުކު ސިނާއަތު، މިފަދަ ގޮންޖެހުމަކުން ސަލާމަތް ކުރުމަށްޓަކާ ސަރުކާރުން ޕްލޭންތަކެއް ރާވަންޖެހޭ ކަމުގައި ގަބޫލުކުރަން ޖެހެއެވެ. ދުނިޔޭގެ އެހެން މާރކެޓްތަކަށް މިސްރާބު ހިފަން ޖެހެއެވެ. ފަތުރުވެރިކަން އިސްތިހާރު ކުރުން، ޔޫރަޕް މާރކެޓާއެކީ ދުނިޔޭގެ އެހެން ދިމަދިމާލަށް މިސަރާބު ހިފަންޖެހެއެވެ. އަދި މިގޮތުން ކުރެވޭ ޕްލޭންތައް ހާމަކޮށްދީ، ފަތުރުވެރިކަމުގެ ސިނާއަތް ދެވަނަ ރާޅެއްގައި އިދަޖެހިގެން ނުދާނޭކަމުގެ ޔަގީންކަންވެސް ސަރުކާރުން ފޯރުކޮށްދޭން އެބަ ޖެހެއެވެ.
