ޔޫކުރެއިން ބޯޑަރު ކައިރިއަށް ޖަމާ ކޮށްފައިވާ ބައެއް ފައުޖުތައް ބޯޑރު ކައިރުން ދުރައް ޖައްސާފައިވާކަމަށް ރަޝިއާއިން ބުނަމުން ދިޔަނަމަވެސް އެކަން ގަބޫލު ކުރާނީ އަމަލީގޮތުން އެކަން ހަމަ ލޮލަށް ފެނުމުން ކަމުގައި ޔޫކުރެއިން ބުނެފިއެވެ.
ރަޝިއާއިން ބައެއް ފައުޖުތަކާއި އަދި ބޭނުން ކުރަމުންދިޔަ ބައެއް ބަރު ހަތިޔާރުތައް ސަރަހައްދުން ދުރަށް ޖައްސަމުންދާ މަންޒަރުގެ ބައެއް ވީޑިތޯތައް ސޯޝަލް މީޑިއާގައި އާންމު ވެގެން ގޮސްފައިވި ނަމަވެސް، ނޭޓޯއަށް ކަނޑައަޅާފައި ހުންނަވާ އެމެރިކާގެ ސަފީރު ވިދާޅުވެފައި ވަނީ، މަސްރަހު ފިނި ކުރުމުގެ ގޮތުން ބައެއް ފައުޖުތައް މިހާރު ބޯޑަރު ކައިރިން ދުރަށް ޖައްސަމުން ދާކަމަށް ރަޝިއާއިން ބުނެފައިވި ނަމަވެސް، އެމެރިކާއިން އެކަން ގަބޫލު ކުރާނީ މިބުނުން ރަގަޅަށް ކަށަވަރު ކުރުމަށް ފަހުގައި ކަމަށެވެ.
ރަޝިއާއިން ޔޫކުރެއިން އަރާ އެގައުމު ހިފަން އުޅޭކަމުން ބިރު ހީވެފައި ވާއިރު، މަސްރަހު ފިނިކޮށް، ހަގުރާމައެއް ފެށިގެންދިޔަ ނުދިނުމަށްޓަކާ ކުރެވެމުންދާ ޑިޕްލޮމެޓިކް މަސައްކަތްތަކުގެދަށުން، ޖާރމަނީގެ ޗާންސެލަރ އޮލާފް ޝޯލްޒް މިހާރު ހުންނެވީ، ރަޝިއާގެ ރައީސް ޕުޓިންއާއި ބައްދަކު ކުރުމަށް މިހާރު ރަޝިއާގައެވެ.
މިއަދު ރަޝިއާއިން ބުނެފައިވަނީ، އުފެދިފައިވާ ހަމަނުޖެހުންތަކާއި ގުޅޭގޮތުން މަޝްވަރާގެ މޭޒަށް ދިއުމަށް ޕުޓިން ހުންނެވީ ތައްޔާރަށް ކަމަށެވެ. އަދި ބުނެފައިވަނީ ޔޫކުރެއިންގެ މައްސަލައަކީ ރަޝިއާއިން ކަންބޮޑުވާ ސަލާމަތާއި ގުޅުން ހުރި ކަންކަމުގެ ތެރެއިން އެއްބައި ކަމުގައެވެ.
ފާއިތުވެދިޔަ އަހަރުގެ ޑިސެމްބަރުމަހުން ފެށިގެން، ކުރީގެ ސޯވިއެއްޓް ޔޫނިއަންގެ ގައުމެއް ކަމުގައިވާ ޔޫކްރެއިންގެ ބޯޑަރު ކައިރިއަށް އެތައްހާސް ސިފައިނާއި ބަރު ހަތިޔާރު ޖަމާކުރުމަށްފަހު، ރަޝިއާއިން ޑިމާންޑް ކޮށްފައިވަނީ، ނޭޓޯއިން އެޖަމާއަތުގެ ސިފައިންނާއި އަދި ހަތިޔާރު އިރުމަތީ ޔޫރަޕްގެ ސަރަހައްދުން ދުރަށް ޖެއްސުމަށާއި އަދި އޭގެ އިތުރުން ރަޝިއާއާއި އިންވެގެން އޮތް ޔޫކްރެއިން އަކީ ދުވަހަކުވެސް ނޭޓޯގެ މެމްބަރަކަށް ނުވެވޭނެ ކަމުގައި ޔަގީންކަން ދިނުމަށެވެ.
އެހެންނަމަވެސް، ރަޝިއާގެ މި ޑިމާންޑްތަކަށް، މޮސްކޯގައި ހުންނަވާ އެމެރިކާގެ ސަފީރު މެދުވެރިކޮށް ލިޔުމުން އެރުވި ޖަވާބުގައި އެމެރިކާއިން ބުނެފައިވަނީ، ނޭޓޯއަށް ވަނުމަށް ހުރިހާ ގައުމަކަށް ފުރުސަތު ހުޅުވާފައި އޮންނަ ސިޔާސަތަށް އެގައުމުން ތާޢީދު ކުރާނެ ކަމުގައެވެ. އަދި ރަޝިއާގެ ސެކިއުރިޓީ ޑިމާންޑުތަކަށް ނޭޓޯއިންވެސް ވަނީ ހަމަ މިމޭރުމުން ލިޔުމުން ރަޝިއާއަށް ޖަވާބު އަރުވާފައެވެ.
އެހެންނަމަވެސް، އެޓްލާންޓިކް ސަރަހައްދު ހުރަސްކޮށް ފުޅާވަމުންދާ، ސަލާމަތާއި ގުޅުންހުރި އިއްތިހާދު، ނޭޓޯ އިތުރަށް ފުޅާވެގެން ދިޔަ ނުދިނުމަށް ރަޝިއާއިން ކުރަމުންދާ މަސައްކަތުގައި، މޮސްކޯގެ ކަންބޮޑުވުންތަކަށް ޑިޕްލޮމެޓިކް ހައްލު ހޯދުމުގެ ގޮތުން ހަތިޔާރުތައް މަދުކުރުމާއި އަދި އިތުބާރު އުފެއްދުމަށްޓަކާ އިތުރަށް މަޝްވަރާކުރުމަށް ތައްޔާރަށް އޮތް ކަމަށްވެސް އެމެރިކާއިން ވަނީ ބުނެފައެވެ.
ޔޫކުރެއިންގެ ބޯޑަރު ކަރިއަށް ރަޝިއާގެ އެތައް ހާސް ސިފައިންނެއް ޖަމާކުރަމުން ދިއުމާ ގުޅިގެން، ރަޝިއާއިން ޔޫކުރެއިންއަށް އެރުމަށް ރާވަމުންދާ ކަމުގެ ކަންބޮޑުވުން ހުޅަގުގެ ގައުމުތަކުގެ މެދުގައި އުފެދިގެން ގޮސްފައި ވާއިރު، އެމެރިކާއިންވަނީ، ރަޝިއާއިން ޔޫކްރެއިންއަށް އަރައިފިނަމަ، ހީވެސް ނުކުރާވަރުގެ ވަރުގަދަ ދަތިކުރުމުގެ ފިޔަވަޅު އެގައުމާ ދެކޮޅަށް އަޅާނެކަމުގެ އިންޒާރު ދީފައެވެ. ރަޝިއާއިން ޔޫކުރެއިން އަރާ އެގައުމަށް އުދުވާނީ ހަމަލާ ދޭން އުޅޭކަމަށް ހުލަނގުގެ ގައުމުތަކުން ކުރާ ތުހުމަތުތައް ރަޝިއާއިން ދަނީ ދޮގު ކުރަމުންނެވެ.
