ޔޫކްރެއިން އާއި ރަޝިއާއާ ދެމެދު ހަނގުރާމަ ފަށައިފި ނަމަ، ރާއްޖެއަށް އެކަމުގެ ގެއްލުން ބޮޑުވާނެތީ އެކަމުގެ ކަންބޮޑުވުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފާޅުކޮށްފިއެވެ.
މި ހަފްތާގެ ތެރޭގައި ރަޝިޔާއިން ޔޫކްރެއިންއަށް ހަމަލާދިނުމަށް ތައްޔާރުވަމުންދާ ކަމަށް އިންޓެލިޖެންސްއަށް މައުލޫމާތު ލިބިފައިވާ ކަމަށް އެމެރިކާއިން ވަނީ ބުނެފަ އެވެ. އެއާއެކު، އެ ގައުމުގެ މަޝްރަހު ހޫނުވެ، ހަނގުރާމައެއް ފެށިދާނެކަމުގެ ބިރު ވަނީ އުފެދިފައެވެ. ހުޅަނގުގެ ގިނަ ގައުމުތަކާއި އަދި އެމެރިކާ އިން ވެސް ވަނީ އެގައުމުތަކުގެ ރައްޔިތުން ޔޫކްރޭން ދޫކޮށް ވީއެންމެ އަވަހަކަށް ދިއުމަށް އިލްތިމާސް ކުރަމުންނެވެ.
މިހަނގުރާމަ ފެށިދާނެކަމުގެ ސިގުނަލްތައް ލިބެމުންދާއިރު، މަޖިލިސް ރައީސް ކުރެއްވި ޓުވީޓުގައި ވިދާޅުވީ ޔޫކްރޭންގެ ހާލަތާ ގުޅިގެން ވަރަށް ބޮޑަށް ކަންބޮޑުވެވަޑައިގަންނަވާ ކަމަށާއި ރަޝިޔާ އާއި ޔޫކްރޭން އަކީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ގައުމުތަކުގެ ތެރެއިން ދެ ގައުމު ކަމަށެވެ.
ޔޫކްރެއިންގެ މަޝްރަހާ މެދު ކަންބޮޑުވަން. ޔޫކްރެއިން އަދި ރަޝިއާ ރައްޔިތުންނަކީ ރާއްޖެ އަށް އެންމެ ގިނައިން ޒިޔާރަތްކުރާ ފަތުރުވެރިން. ހަނގުރާމައެއް ފެށިއްޖެނަމަ އެކަމުގެ ސަބަބުން ރާއްޖެއަށް ހީވެސްނުކުރާހާ ގެއްލުންތައް ލިބިގެންދާނެ.
– ރައީސް ނަޝީދު ވިދާޅުވިއެވެ.
The situation over Ukraine is very worrying. Ukrainians and Russians are some of our biggest visitors and if war breaks out, it will have all sorts of negative and unforeseen ramifications. The Government must be mindful of these possible impacts on us.
— Mohamed Nasheed (@MohamedNasheed) February 15, 2022
ރަޝިއާ އަކީ މިއަހަރު ރާއްޖެއަށް އެންމެ ގިނަ ޓޫރިސްޓުން ޒިޔާރަތްކުރާ އެއް ގައުމެވެ. މިއަހަރުގެ މިހާތަނަށް އެގައުމުން 28،468 ފަތުރުވެރިން ރާއްޖެ އައިސްފައިވެއެވެ. ޔޫކްރެއިން އޮތީ 6،503 ޓޫރިސްޓުންނާއެކު މި ލިސްޓުގެ ހަތްވަނައިގައެވެ. ޔޫކްރެއިންގެ މަޝްރަހު ގޯސްވެފައިވާ މި ދަނޑިވަޅުގައި، ދިވެހި ރައްޔިތުން އެ ގައުމަށް ދަތުރު ނުކުރުމަށް ފޮރިން މިނިސްޓްރީން ވަނީ އިލްތިމާސްކޮށްފަ އެވެ. ޔޫކްރެއިންގައި މިވަގުތު 50 އަށްވުރެ ގިނަ ދިވެހިން ދިރިއުޅެމުންދެ އެވެ.
ޔޫކްރޭނަށް ހަމަލާއެއް އަމާޒުވެއްޖެނަމަ އެމެރިކާ އާއި ނޭޓޯގެ ބައެއް ގައުމުތަކުން ޔޫކްރޭން ދިފާއު ކުރަން ރަޝިއާ އަށް ހަމަލާ ދިނުމުގެ ފުރުސަތު ބޮޑު ކަމަށް ތަޖުރިބާކާރުން ބުނެއެވެ. އެފަދަ ހާލަތެއްގައި ބޮޑު ހަނގުރާމައެއް ފެށިގެން ހިނގައިދާނެ ކަމުގެ ބިރު އެބައޮތް ކަމަށް ތަޖުރިބާކަރުން އަންނަނީ ބުނަމުންނެވެ.
