ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާޢީއަށް މަރުގެ އިންޒާރުދިން މައްސަލަ އޭނާ ނިސްބަތްވާ ދާއިރާގެ ތިން ރަށުގެ ފެނަކަ ބްރާންޗުތަކުން ކުށްވެރިކޮށްފިއެވެ.
ރާއީއަށް މަރުގެ އިންޒާރު ދީފައިވަނީ ފަހަކަށް އައިސް އޭނާގެ ދާއިރާގައި ހިމެނޭ ރަށްތަކަށް ސަރުކާރުން ވެފައިވާ ވައުދުތައް ފުއްދުމަށް ހަވާލުކޮށްފައިވާ ކުންފުނިތަކުން އެކަންކަން އެންމެ އެކަށީގެންވާ ގޮތަށް ނުކުރާތީ އެކަމުގެ ކަންބޮޑުވުން ފާޅުކޮށް ކުންފުނިތަކުގެ ވެރިންނަށް ވަރަށް ބޮޑަށް ފާޑު ވިދާޅުވަމުން ދަނިކޮށެވެ.
ރާއީއަށް މަރުގެ އިންޒާރު ދިން މައްސަލާގައި އެކަން ކުށްވެރިކޮށް، އޭނާ އެންމެ ބޮޑަށް ފާޑުވިދާޅުވި، ފެނަކައިގެ މަކުނުދޫ ދާއިރާގެ ކުމުންދޫ، މަކުނުދޫ، ނޭކުރެންދޫ ބްރާންޗުތަކުން ވަކިވަކިން ނެރުނު ބަޔާނުގައި ބުނެފައިވަނީ މިމަހުގެ 13 ވަނަ ދުވަހުގެރޭ މަކުނުދޫ ދާއިރާގެ މެންބަރު މުޙައްމަދު ރާޢީ އަށް މަރުގެ އިންޒާރު ދިން މައްސަލަ، ފެނަކަ ކޯރޕަރޭޝަން ލިމިޓެޑް މަކުނުދޫ ދާއިރާގެ ތިން ރަށުގެ ބްރާންޗްތަކުގެ ހުރިހާ މުވައްޒަފުންގެ ނަމުގައި އެ އަމަލު އެންމެ ހަރުކަށި އިބާރާތުން ކުށްވެރިކުރާކަމަށެވެ.
އަދި މަކުނުދޫ ދާއިރާގެ މެންބަރު މުހައްމަދު ރާޢީއަށް މަރުގެ އިންޒާރުދިނުމާއި ބިރުދެއްކުމުގެ މި ނިރުބަވެރި އަމަލު ހިންގި ފަރާތްތަކާއި މި ކަމުގައި ޝާމިލުވާ އެންމެހާ ފަރާތްތަކަށް ޤާނޫނީ ފިޔަވަޅު އެޅުމަށް ދިވެހިރާއްޖޭގެ ކަމާބެހޭ މުއައްސަސާތަކަށް ވަނީ ގޮވާލާފައެވެ.
މެމްބަރު ރާޢީގެ މިފާޑުކިޔުންތަކާއި ގުޅިގެން އޭނާއަށް މަރުގެ އިންޒާރު ލިބެމުންދާކަމަށް ރޭ ވަނީ ވިދާޅުވެފައެވެ. ރާއީ ވިދާޅުވީ ކިތަންމެ އިންޒާރެއް ގުންޑާއިން ފޮނުވައިގެން ދިނަސް ފަހަތަށް ނުޖެހޭނެ ކަމަށެވެ. މަރު ހިއްޕަވާނީ ކުންފުނިތަކުގެ އެމްޑީން ނޫންކަމަށް ރާއީ ވަނީ ވިދާޅުވެފައެވެ.
ގުންޑާއިން ފޮނުވައިގެން އިންޒާރުދީ މަރާލަން ބުންޏަސް ބިރެއް ނުގަނޭ، ފުރާނަ ހިއްޕަނީ މާތް ރަސްކަލާންގެ. އެމްޑީންނެއް ނޫން.
– ރާއީ ވިދާޅުވިއެވެ.
ރާއީ އެންމެ ބޮޑަށް ފާޑު ވިދާޅުވި ކުންފުނިތަކުގެ ވެރިންގެ ތެރޭގައި ފެނަކައިގެ އެމްޑީ ސައީދާއި، އެމްޑަބްލިއުއެސްސީގެ އެމްޑީ ޝާހު ހިމެނެއެވެ. ޚާއްސަކޮށް ފެނަކައިގެ އެމްޑީ މަކުނުދޫ ދާއިރާގައި ވެފައިވާ ވައުދުތައް ފުއްދުމުގައި ފިނިހަކަ ސްޕީޑުގައި އުޅުއްވާތީ ރާއީގެ ފާޑުކިޔުންވަނީ ވަރަށް ބޮޑަށް އަމާޒުވެފައެވެ.
ރައީ ވިދާޅުވީ ބައެއް ރަށްރަށުގައި ފެނަކައިން ހިންގަމުންދާ މަޝްރޫޢުތައް ކުރިއަށްދަނީ ފިނިހަކަ ސްޕީޑުގައިކަމަށެވެ. ކޮންޓްރކްޓު ކުރެވިފައިވާ މުއްދަތު ހަމަވެ، މަސައްކަތް ނުފެށި އެތައް ދުވަހެއް ވެގެންދާއިރުވެސް މިއިންކަމަށާއި މާބޮޑު އަޅާލުމަށް ބަހައްޓަވާ ތަނެއް ނުފެންނަ ކަމަށް ރާއީ ވިދާޅުވިއެވެ. އޭނާ ވިދާޅުވީ މިއީ ތާއަބަދު ބަލަންތިބެވޭނެ ކަމެއް ނޫންކަމަށާއި، ފެނަކަ އެމްޑީ ސައީދަށް ތާއަބަދު މަންމަނަކަށްވެ ނުހުރެވޭނެކަމަށެވެ.
މެމްބަރު ރާއީ ގެންދަވަނީ އޭނާގެ ދާއިރާއަށް ސަރުކާރުން ވެފައިވާ ވައުދުތައް ފުއްދުމުގައި އެކި އިދާރާތަކުން އެންމެ ބޭނުންވާ ސްޕީޑުގައި ކަންކަން ކޮށް ނުދެވޭތީ އެކަމުގެ ކަންބޮޑުވުން ފާޅު ކުރައްވަމުންނެވެ. މިގޮތުން ރާއީގެ އެންމެ ބޮޑު ފާޑުކިޔުން އަބަދުވެސް އަމާޒުވާ އެއްބޭފުޅަކީ ހޯމް މިނިސްޓަރ އިމްރާނެވެ. ރާއީ ވިދާޅުވެފައިވަނީ އިމްރާނަކީ މަޤާމަށް ދަހިވެތި ވެފައިވާ އަމިއްލަ އެދުމުން ފުރިގެންވާ ބޭފުޅެއް ކަމުގައެވެ.
