ރަޝިއާއިން ޔޫކުރެއިންގެ ބޯޑަރު ކައިރިއަށް އެތައް ހާސް ސިފައިންނަކާއި ބަރު ހަތިޔާރު ޖަމާކޮށް، އެގައުމަށް އަރާފާނެކަމަށް ހުޅަނގުގެ ގައުމުތަކުން ބުންނަމުން ދާއިރު، އެމެރިކާގެ ރައީސް ޖޯ ބައިޑްންއާއި ޔޫކްރެއިންގެ ރައީސް ވޮލޮޑިމިރު ޒެލެންސްކީ ފޯނުން ގުޅުއްވާ، ހާލަތާއި ގުޅޭގޮތުން މަޝްވަރާ ކުރައްވައިފިއެވެ.

ބައިޑްންގެ، ދިގުލައިގެންދިޔަ މި ފޯން ކޯލަށްފަހު ވައިޓް ހައުސްއިން ބުނެފައިވަނީ، މި ފޯން ކޯލްގައި ދެބޭފުޅުންވެސް، އުފެދިފައިވާ ނުތަނަވަސްކަން ކުޑަކުރުމަށާއި، އަދި މައްސަލަ ހައްލު ކުރުމަށްޓަކާ ޑިޕްލޮމެޓިކް މަސައްކަތްތައް ކުރިޔަށް ގެންދިއުމަށާއި، އަދި ރަޝިއާގެ އުދުވާނީ ހަމަލާއަކުން ޔޫކްރެއިން ސަލާމަތް ކުރުމަށް ކުރެވެން ހުރި މަސައްކަތްތައް ކުރިޔަށް ގެންދިއުމަށް އެއްބަސް ވެފައިވާ ކަމުގައެވެ.

ރަޝިއާއިން ޔޫކުރެއިންއަށް އަރާ، އެގައުމަށް އުދުވާނީ ހަމަލާ ދިނުމަށް ތައްޔާރުވެފައިވާ ކަމަށް ހުޅަނގުގެ ގައުމުތަކުން ދަނީ ބުނަމުންނެވެ. ވައިޓް ހައުސްއިން ބުނެފައިވަނީ، "ރަޝިއާއިްނ ޔޫކުރެއިންއަށް އުދުވާނި ހަމަލާ ދީފިނަމަ، އެކުވެރި ގައުމުތަކާއެކު، ރަޝިއާއާއި ދެކޮޅަށް ދަތި ކުރުމުގެ ވަރުގަދަ ފިޔަވަޅުތައް އަޅާނޭކަން ރަޝިއާއަށް ވަރަށް ރަގަޅަށް ސާފު ކޮށްދީފައި ވާނޭ" ކަމުގައެވެ.

މި ހަފްތާގެ އާދީއްތަ ދުވަހު، އެމެރިކާގެ ނޭޝަނަލް ސެކިއުރިޓީ އެޑަވައިޒަރ ވަނީ، މިހާރު ހަމަ ކޮންމެ ވަގުތެއްގައިވެސް ރަޝިއާއިން ޔޫކުރެއިންއަށް އުދުވާނީ ހަމަލާ ދިނުމަށް ތައްޔާރުވެފައިވާ ކަމަށް ވިދާޅުވެފައެވެ. އޭނާ ވިދާޅުވި ގޮތުގައި، ނޭޓޯގެ މެމްބަރު ގައުމުތަކުގެ އެންމެ އިންޗިއަކަށް ރަޝިއާއިން އުދުވާނީ ހަމަލާ ދީފިނަމަ، އެގައުމުތައް ހިމާޔަތް ކުރުމަށް ނޭޓޯ އޮތީ ފުރިހަމައަށް ތައްޔާރަށް ކަމުގައެވެ.

ރަޝިއާއިން ވަނީ ޔޫކުރެއިންގެ ބޯޑަރު ކައިރިއަށް 100،000 އަށްވުރެ ގިނަ ސިފައިން ޖަމާ ކޮށްފައެވެ. ހުޅަނގުން ތުހުމަތު ކުރާ ގޮތުގައި، ޔޫކުރެއިންއަށް ހަމަލާ ދޭން ފެއްޓޭވަރުގެ އުޒުރެއް އުފެއްދުމަށް މިހާރު ރަޝިއާއިން ދަނީ މަސައްކަތް ކުރަމުންނެވެ. އެހެންނަމަވެސް، ޔޫކްރެއިންއަށް އުދުވާނި ހަމަލާދޭން އުޅޭކަމުގެ ތުހުމަތު ރަޝިއާއިންވަނީ ދޮގު ކޮށްފައެވެ.

ފާއިތުވެދިޔަ އަހަރުގެ ޑިސެމްބަރުމަހުން ފެށިގެން، ކުރީގެ ސޯވިއެއްޓް ޔޫނިއަންގެ ގައުމެއް ކަމުގައިވާ ޔޫކްރެއިންގެ ބޯޑަރު ކައިރިއަށް އެތައްހާސް ސިފައިނާއި ބަރު ހަތިޔާރު ޖަމާކުރުމަށްފަހު، ރަޝިއާއިން ޑިމާންޑް ކޮށްފައިވަނީ، ނޭޓޯއިން އެޖަމާއަތުގެ ސިފައިންނާއި އަދި ހަތިޔާރު އިރުމަތީ ޔޫރަޕްގެ ސަރަހައްދުން ދުރަށް ޖެއްސުމަށާއި އަދި އޭގެ އިތުރުން ރަޝިއާއާއި އިންވެގެން އޮތް ޔޫކްރެއިން އަކީ ދުވަހަކުވެސް ނޭޓޯގެ މެމްބަރަކަށް ނުވެވޭނެ ކަމުގައި ޔަގީންކަން ދިނުމަށެވެ.

އެހެންނަމަވެސް، ރަޝިއާގެ މި ޑިމާންޑްތަކަށް، މޮސްކޯގައި ހުންނަވާ އެމެރިކާގެ ސަފީރު މެދުވެރިކޮށް ލިޔުމުން އެރުވި ޖަވާބުގައި އެމެރިކާއިން ބުނެފައިވަނީ، ނޭޓޯއަށް ވަނުމަށް ހުރިހާ ގައުމަކަށް ފުރުސަތު ހުޅުވާފައި އޮންނަ ސިޔާސަތަށް އެގައުމުން ތާޢީދު ކުރާނެ ކަމުގައެވެ. އަދި ރަޝިއާގެ ސެކިއުރިޓީ ޑިމާންޑުތަކަށް ނޭޓޯއިންވެސް ވަނީ ހަމަ މިމޭރުމުން ލިޔުމުން ރަޝިއާއަށް ޖަވާބު އަރުވާފައެވެ.

އެހެންނަމަވެސް، އެޓްލާންޓިކް ސަރަހައްދު ހުރަސްކޮށް ފުޅާވަމުންދާ، ސަލާމަތާއި ގުޅުންހުރި އިއްތިހާދު، ނޭޓޯ އިތުރަށް ފުޅާވެގެން ދިޔަ ނުދިނުމަށް ރަޝިއާއިން ކުރަމުންދާ މަސައްކަތުގައި، މޮސްކޯގެ ކަންބޮޑުވުންތަކަށް ޑިޕްލޮމެޓިކް ހައްލު ހޯދުމުގެ ގޮތުން ހަތިޔާރުތައް މަދުކުރުމާއި އަދި އިތުބާރު އުފެއްދުމަށްޓަކާ އިތުރަށް މަޝްވަރާކުރުމަށް ތައްޔާރަށް އޮތް ކަމަށްވެސް އެމެރިކާއިން ވަނީ ބުނެފައެވެ.

ޔޫކުރެއިންގެ ބޯޑަރު ކަރިއަށް ރަޝިއާގެ އެތައް ހާސް ސިފައިންނެއް ޖަމާކުރަމުން ދިއުމާ ގުޅިގެން، ރަޝިއާއިން ޔޫކުރެއިންއަށް އެރުމަށް ރާވަމުންދާ ކަމުގެ ކަންބޮޑުވުން ހުޅަގުގެ ގައުމުތަކުގެ މެދުގައި އުފެދިގެން ގޮސްފައި ވާއިރު، އެމެރިކާއިންވަނީ، ރަޝިއާއިން ޔޫކްރެއިންއަށް އަރައިފިނަމަ، ހީވެސް ނުކުރާވަރުގެ ވަރުގަދަ ދަތިކުރުމުގެ ފިޔަވަޅު އެގައުމާ ދެކޮޅަށް އަޅާނެކަމުގެ އިންޒާރު ދީފައެވެ. ރަޝިއާއިން ޔޫކުރެއިން އަރާ އެގައުމަށް އުދުވާނީ ހަމަލާ ދޭން އުޅޭކަމަށް ހުލަނގުގެ ގައުމުތަކުން ކުރާ ތުހުމަތުތައް ރަޝިއާއިން ދަނީ ދޮގު ކުރަމުންނެވެ.