ރަޝިއާއިން ޔޫކުރެއިންއަށް އަރާ، ހަގުރާމައެއް ފެށިއްޖެ ހާލަތެއްގައި ޔޫރަޕަށް ރަޝިއާއިން ފޯރުކޮށްދެމުންދާ ގޭސް ފޯރުކޮށްދިނުން ހުއްޓުމަކަށް އަތުވެދާނެތީ، ޖަޕާނުން ޔޫރަޕަށް ލިކުއިފައިޑް ނެޗުރަލް ގޭސް (LNG) (ދިޔައި ކޮށްފައި ހުންނަ ގުދުރަތީ ގޭސް) ސަޕްލައި ކޮށްދިނުމުގެ ޝައުގެރިކަން ފާޅު ކޮށްފައި ވާކަމަށް، އެގައުމުގެ ޓްރޭޑް މިނިސްޓަރ ވިދާޅު ވެއްޖެއެވެ.
ޖަޕާނުގެ ޓްރޭޑް މިނިސްޓަރ ކޮއިޗި ހަގިއުޑާ ވިދާޅުވެފައި ވާގޮތުގައި، މިހާރުވެސް ޖަޕާނުގެ އަމިއްލަ ކުންފުނި ތަކުގެ ގިނަ އަދަދެއްގެ ގޭސް ޝިޕްމަންޓުތައް ޔޫރަޕަށް މިސްރާބު ބަދަލު ކޮށްފައިވާ ކަމަށެވެ. އެހެންނަމަވެސް މިއީ ކޮން ކުންފުނިތަކެއް ކަމެއް ނުވަ ކިހާ އަދަދެއްގެ LNG ކަމެއް އޭނާ ވިދާޅުވެފައެއް ނުވެއެވެ.
ޖަޕާނުގެ ޓްރޭޑް މިނިސްޓަރު ވިދާޅުވި ގޮތުގައި، އަންނަ މާރޗްމަހުގެ ތެރޭގައި އަދި ގިނަ ޝިޕްމަންޓުތައް ޔޫރަޕަށް މިސްރާބު ޖަހާނެ ކަމުގައެވެ. އެހެންނަމަވެސް ޔޫރަޕަށް ޖަޕާނުން ލިކުއިފައިޑް ނެޗުރަލް ގޭސް (LNG) ސަޕްލައި ކުރާނީ އެގައުމަށް ބޭނުންވާ ވަރަށް ބަލައިގެންކަމަށްވެސް އޭނާ ވިދާޅުވެފައި ވެއެވެ.
ޔޫރަޕްގެ ގިނަ ގައުމުތަކުން ބަރޯސާ ވަމުންދަނީ ރަޝިއާއިން ޔޫރަޕް ބައްރަށް ފޯރު ކޮށްދެމުންދާ ގޭހަށެވެ. ރަޝިއާއިން ޔޫރަޕް ބައްރަށް ގޭސް ސަޕްލައި ކޮށްދެމުން ދަނީ، ކަޑު އަޑިން އަޅާފައިވާ ގޭސްހޮޅިއެއް މެދުވެރި ކޮށެވެ. އެހެންނަމަވެސް، ރަޝިއާއިން ޔޫކުރެއިންއަށް އަރާ، އުފެދިގެން ހިގައިދާނެ ބޮޑު ކާރިސާއެއްގެ ސަބަބުން، ރަޝިއާއިން ޔޫރަޕަށް ފޯރުކޮށްދެމުންދާ ގޭސް ފޯރު ކޮށްދިނުން ހުއްޓުމަކަށް އަތުވެދާނެކަމުގެ ބިރު ވަނީ ހީވެފައެވެ.
ޓްރޭޑް މިނިސްޓަރ ހަގިއުޑާ ވިދާޅުވި ގޮތުގައި އޭނާއަށްވަނީ، އެމެރިކާއާއި ޔޫރަޕްގެ އެމްބެސެޑަރުންގެ ފަރާތުން ޔޫރަޕް ގޭހަށް ޖެހިއްޖެ ހާލަތެއްގައި ގޭސް ސަޕްލައި ކޮށްދިނުމަށް އެދި ހުށަހެޅުންތައް ލިބިފައެވެ.
"އަހަރެމެން ވާނީ އީޔޫ އަދި އެމެރިކާއާއި ވެސް މަޝްވަރާކޮށްފަ، އަދި އެއްބަސް ވެވިފައިވަނި މިމުޢާމަލާތް ކުރިޔަށް ދާނީ ޖަޕާނަށް ބޭނުންވާ ގޭހާއި އަދި ކަރަންޓަށް އަސަރު ނުކުރާ މިންގަޑަށް ބަލައިގެން ކަމަށް،" އޭނާ ވިދާޅުވެފައި ވެއެވެ.
ފާއިތުވެދިޔަ އަހަރާ ހަމައަށް ޖަޕާނަކީ ދުނިޔޭގައި އެންމެ ގިނައިން ލިކުއިފައިޑް ނެޗުރަލް ގޭސް (LNG) އެތެރެކުރަމުން އައި ގައުމެވެ. އަދި އެގައުމުން ދަނީ ވަރަށް ބޮޑަށް ހަކަތައް އުފެއްދުމަށް މިބާވަތުގެ ގޭހަށް ބަރޯސާ ވަމުންނެވެ. އަދި ވަކީން ޚާއްސަކޮށް މިހާރު ކުރިޔަށްދާ ފިނި މޫސުމުގައި ޖަޕާނުގެ ބޮޑު ސަރަހައްދަކަށް ބޯކޮށް ސްނޯ ފައިބަމުން ދިއުމާ ގުޅިގެން، ހަކަތަ ބޭނުންކުރާ މިންވަރު މަތިވެ، ޖަޕާނުގައި މިހާރު ސްޓޮކް ކޮށްފައިހުރި މިބާވަތުގެ ގޭހުގެ މިންވަރުން ވަނީ ވަރަށް ބޮޑަށް ދަށަށް ގޮސްފައެވެ.
މަސްރަހު ދިރާސާ ކުރާ ފަރާތްތަކުން ބުނަމުންދަނީ، ހަގުރާމައެއް ފެށިއްޖެ ހާލަތެއްގައިވެސް ރަޝިއާއިން ފޯރުކޮށްދެމުންދާ ގޭސް އެކީ ފޯރު ކޮށްދިނުން ހުޓާލާނެ ކަމަށް ނުބެލެވޭ ކަމުގައެވެ. އެހެންނަމެވެސް، ޔޫރަޕަށް ބޭނުންވާ ގޭސް ބޭނުންވާ މިންވަރަށް ފޯރު ކޮށްދެވޭ ވަރުގެ ސްޓޮކެއް ޖަޕާނުގައި ނުހުންނާނޭ ކަމަށްވެސް މަސްރަހު ދިރާސާކުރާ ފަރާތްތަކުން ދަނީ ބުނަމުންނެވެ.
ރަޝިއާއިން ޔޫކުރެއިން އަރާ އުދުވާނީ ހަމަލާ ދީފިނަމަ، ރަޝިއާއިން ޔޫރަޕަށް ފޯރުކޮށްދޭ ގޭހުގެ މިންވަރު ދެގުނަ ކުރުމަށް ކަނޑުއަޑިން މިހާރު އަޅާގައިވާ ދެވަނަ ގޭސް ހޮޅި (ނޯޑް ސްޓްރީމް 2 ޕްރޮޖެކްޓް) ހުއްޓުމަކަށް ގެންނާނޭކަމުގެ އިންޒާރު އެމެރިކާގެ ރައީސް ބައިޑްން ވަނީ ދީފައެވެ. މި ގޭސް ހޮޅި ގުޅޭ ޔޫރަޕްގެ ގައުމު ކަމުގައި ޖާރމަނީގެ ޗާންސެލަރ އޮލާފް ޝޯލްޒްވަނީ އެމެރިކާގެ އިންޒާރަށް ތާއީދުވެސް ކޮށްފައެވެ.
މިހާރު މުޅިން ނިމުމުގެ މަގުމަތީގައިވާ މި ޕްރޮޖެކްޓަކީ ރަޝިއާގެ ކުންފުނިތަކުން އެތައް ބިލިއަން ޑޮލަރެއް އިންވެސްޓް ކޮށްފައިވާ ޕްރޮޖެކްޓެކެވެ. މިޕްރޮޖެކްޓް ހުއްޓުމަކަށް ގެނެސްފިނަ، އިޢާދަ ނުކުރެވޭވަރުގެ ބޮޑެތި ގެއްލުންތަކެއް ރަޝިއާގެ ބޮޑެތި އަދި ޕުޓިންގެ އަރިސް ބައެއް ކުންފުނިތަކަށް ކުރާނެއެވެ.
