ރާއްޖެ ޓީވީން މިދިއަ އަހަރުގެ ރޯދަމަހު ގެނެސްދިން "ސެލެބްރިޓީ ރޭސް"ގެ ސީޒަން 2 މިއަހަރު ގެނެސްދޭން ތައްޔާރުވެއްޖެއެވެ.
ޖުމްލަ 11 ސެލެބްރިޓީންނާއެކު ގެނެސް ދޭ މި ޝޯ މި އަހަރުވެސް ރާއްޖެ ޓީވީން ދައްކަން ފަށާނީ ރޯދަމަހުއެވެ.
މިއަހަރުގެ ޝޯގައި ރާއްޖޭގެ މަޝްހޫރު ފިލްމީ ތަރިންގެ އިތުރުން، މޮޑެލިންގ ދާއިރާއިން މަޝްހޫރު ފަރާތްތަކާއި، ޓީވީ ޝޯ ހުށައަޅައިދޭ ފަރާތްތައްވެސް ބައިވެރިވެއެވެ.
މި ޝޯގައި ފެނިގެންދާނެ ތަރިންގެ ތެރޭގައި، ޢާއިޝަތު ރިޝްމީ ރަމީޒް، މަރްޔަމް އައްޒަ، އިބްރާހީމް ޝާފިއު (ފުބޫ)، މުޙައްމަދު ވިޝާލު (ރޯމަން)، ދޮނާ، އަޙްމަދު އިފްނާޒް އަދި ކުރީގެ އެކްޓްރެސް ފަރީލާ ހިމެނެއެވެ.
މީގެ އިތުރުން، މޮޑެލިންގ ދާއިރާގައި ޙަރަކާތްތެރިވާ ނޫރު އަދި ޓީވީ ޝޯވް ހުށައެޅުންތެރިންގެ ތެރެއިން ޝަބާ އަދި ސުހާ އާއި، ކޮރެއޮގްރަފީގެ ދާއިރާއިން މަޤްބޫލު ރިޗަރޑު ވެސް މިފަހަރުގެ ސީޒަންގައި ފެނިގެންދާނެއެވެ.
މި ޝޯ ކުރިއަށް ގެންދަނީ އެމްއެންޑީއެފްގެ އެހީތެރި ކަމާއެކުގައެވެ. މި ޝޯ މި އަހަރު ހުށައަޅައިދޭނީ ރާއްޖެޓީވީގެ ޕްރޮގްރާމް ހެޑް އަދި މަޤްބޫލު ޕްރެޒެންޓަރ އާމިރު ސަލީމެވެ. ކޯ-ހޯސްޓެއްގެ ގޮތުގައި އެމްއެންޑީއެފްގެ ބޭކަނބަލެއްކަމަށްވާ ހައްވާ ނަޖްލާ ފެނިގެންދާނެއެވެ.
ސެލެބްރިޓީ ރޭހަކީ ސަވައިވަލް ޝޯއެއްގެ ގޮތުގައި ރާއްޖޭގައި ކުރިއަށްގެންދިޔަ ފުރަތަމަ ޝޯއެވެ. މި ޝޯގެ ފުރަތަމަ ސީޒަން ކުރިއަށް ގެންދިޔައީ ދ. އަތޮޅުގެ 11 ފަޅު ރަށެއްގައެވެ.
