ޔޫކުރެއިންގެ ހާލަތު ހަމަ ކޮންމެ ވަގުތެއްގައިވެސް ކޮންޓްރޯލުން ނައްޓައިގެން ހިގައިދާނެ ކަމަށާއި، އެގައުމުގައި ތިބި އެމެރިކާގެ ކުރިހާ ރައްޔިތުން ވަގުތުން ވަގުތަށް އެގައުމު ދޫކޮށް ދިއުމަށް އެމެރިކާގެ ރައީސް ޖޯ ބައިޑްން ގޮވާލައްވައިފިއެވެ.
"އެމެރިކަގެ ރައްޔިތުން ހަމަ މިހާރު އެގައުމު ދޫކޮށް ދާންޖެހޭ،" އެންބީސީ ނިއުސްއިން ކުރިން ރެކޯޑް ކޮށްގެން ގެނައުމަށް ހަމަޖެހިފައިވާ އިންޓަވިއުގައި ބައިޑްން ވިދާޅުވެފައި ވެއެވެ.
"މިއީ އަހަރެމެން ޓެރަރިސްޓު ޖަމާއަތަކާއި ކުރިމަތި ލާކަހަލަ ކަމެއް ނޫން. އަހަރެމެން ކުރިމަތި ލައިގެން މިއުޅެނީ ދުނިޔޭގައި މިވަގުތު އޮތް އެންމެ ވަރުގަދަ އެއް އަސްކަރިއްޔާއާއި. މިއީ މުޅިން ތަފާތު ހާލަތެއް. ހާލަތު ބަދަލުވެ، ކަންކަން ކޮންމެފަދަ ވަގުތެއްގައި ވެސް ހަމައިން ނެއްޓިގެން ހިގައިދާނެ،" ބައިޑްން ވިދާޅުވެފައި ވެއެވެ. ޔޫކުރެއިން ބޯޑަރު ކައިރިއަށް ޖަމާ ކޮށްފައިވާ އެތައްހާސް ސިފައިންނަށް އިޝާރާތް ކުރައްވާ ބައިޑްން ވިދާޅުވެފައި ވެއެވެ.
މި އިންޓަރވިއުގައި ބައިޑްން ވިދާޅުވީ ޔޫކުރެއިން ތިބި އެމެރިކާ ސިފައިން އެގައުމުން ބޭރުކުރުމަށް އޭނާ އެގައުމަށް ސިފައިން ފޮނުވަން ޖެހޭފަދަ ހާލަތެއް ނާންނާނެ ކަމަށެވެ. "އެމެރިކާއާއި ރަޝިއާ ސިފައިން އެއްބަޔަކު އަނެއް ބަޔަކަށް ހަމަލާ ދޭން ފަށައިފިނަމަ އެ ފެށިގެން ދިޔައީ ދުނިޔޭގެ ބޮޑު ހަގުރާމައެއް،" ބައިޑްން ވިދާޅުވެފައި ވެއެވެ.
ބައިޑްން ވިދާޅުވި ގޮތުގައި، ޕުޓިން އަކީ، "މޮޔައެއްނަމަ އޭނާ އެގައުމަށް އަރާނެ، އޭނާއަކީ ބުއްދިވެރިއެއް ނަމަ، އޭނާ އެމެރިކާގެ ރައްޔިތުން ގޯނާއެއް ނުކުރާނެ،" ކަމަށެވެ.
އެމެރިކާގެ ބައެއް އިސް އޮފިޝަލުންނާ ހަވާލާދީ، ބައެއް މީޑިއާތަކުން ރިޕޯޓު ކޮށްފައިވާ ގޮތުގައި، ރަޝިއާއިން ޔޫކްރެއިންއަށް އަރާފި ހާލަތެއްގައި، އެގައުމުގައި ތިބި އެމެރިކާގެ ރައްޔިތުން ޔޫކުރެއިން ދޫކޮށް ދިއުމަށް އެހީތެރި ވެދިނުމުގެ ގޮތުން އެމެރިކާއިން ވަނީ، އެގައުމުގެ 2،000 ސިފައިން ޕޮލޭންޑަށް ފޮނުވާފައެވެ.
އެމެރިކާސިފައި ޔޫކުރެއިން ބޯޑަރު ހުރަސްކޮށް އެގައުމަށް ދިއުމުގެ ހުއްދަ ދޫކޮށްފައެއް ނުވެއެވެ. އަދި ފާއިތުވެދިޔަ ހޫނު މޫސުމުގައި އަފްއާނިސްތާނުގައި ހިންގިފަދަ މީހުން ބަދަލުކުރުމުގެ އޮޕަރޭޝަނެއް ކުރިޔަށް ގެންދިއުމަށްވެސް ހަމަޖެހިފައި ނުވާކަމަށްވެސް އެމެރިކާގެ އިސް އޮފިޝަލުންނާއ ހަވާލާދީ މީޑިއާތަކުން ރިޕޯޓު ކޮށްފައި ވެއެވެ.
މިހަފްތާގެ ބުރާސްފަތި ދުވަހުވެސް، އެމެރިކާގެ ސްޓޭޓް ޑިޕާޓަމަންޓުންވަނީ، ރަޝިއާގެ އަސްކަރީ ހަރަކާތްތައް ޔޫކުރެއިން ބޯޑަރު ކައިރީގައި އިތުރު ވަމުންދާ ދިއުމާއި ގުޅިގެން އެގައުމުގެ އެއްވެސް ރައްޔިތަކު ޔޫކުރެއިންއަށް ދަތުރު ނުކުރުމަށް އިރުޝާދު ދީފައެވެ. އަދި މިހާރުން މިހާރަށް އެގައުމުގައި ތިބި އެމެރިކާގެ ހުރިހާ ރައްޔިތުން އެގައުމުން ބޭރުވުމަށްވެސް ވަނީ ގޮވާލާފައެވެ.
ޔޫކުރެއިންގެ ބޯޑަރު ކަރިއަށް ރަޝިއާގެ އެތައް ހާސް ސިފައިންނެއް ޖަމާކުރަމުން ދިއުމާ ގުޅިގެން، ރަޝިއާއިން ޔޫކުރެއިންއަށް އެރުމަށް ރާވަމުންދާ ކަމުގެ ކަންބޮޑުވުން ހުޅަގުގެ ގައުމުތަކުގެ މެދުގައި އުފެދިގެން ގޮސްފައި ވާއިރު، އެމެރިކާއިންވަނީ، ރަޝިއާއިން ޔޫކްރެއިންއަށް އަރައިފިނަމަ، ހީވެސް ނުކުރާވަރުގެ ވަރުގަދަ ދަތިކުރުމުގެ ފިޔަވަޅު އެގައުމާ ދެކޮޅަށް އަޅާނެކަމުގެ އިންޒާރު ދީފައެވެ.
