ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީގެ ކެނޑިޑޭޓް ރާޝިދަށް ވޯޓު ނުދީފިނަމަ ވަޒީފާއިން ވަކިކުރާނެކަމުގެ އިންޒާރު ފެނަކަ މުވައްޒިފުންނަށް ދިން އެ ކުންފުނީގެ ލޮޖިސްޓިކްސް ޑިޕާޓްމަންޓުގެ އިސްވެރިއެއްގެ ގޮތުގައި ހުންނެވި ޒާހިރު އުސްމާން (ސުކުނާ)، ފެނަކަ ކުންފުނީގެ ބައެއް މުވައްޒަފުންނަށް ބިރު ދައްކާފައިވާ މައްސަލާގައި އޭނާ ވަޒީފާއިން ވަކިކުރުމަށް އެމްޑީޕީގެ ގިނަ އަދަދެއްގެ އެކްޓިވިސްޓުންނާއި އަދި މަޖިލިސް ބައެއް މެމްބަރުންގެ އަޑު އުފުލުމާއެކުވެސް އޭނާއާމެދު އެއްވެސް ފިޔަވަޅެއް އަޅާފައި ނުވާކަމަށް މައުލޫމާތު ލިބިއްޖެއެވެ.

ފާއިތުވި ކޮމަންޑޫ ދާއިރާގެ ބައި އިލެކްޝަންގެ ކެމްޕޭންގެ ތެރޭގައި، ޒާހިރު ފެނަކައިގެ ބައެއް މުވައްޒިފުންނަށް ވަކި ގޮތަކަށް ވޯޓުދިނުމަށް އިންޒާރުދީ، އަދި ވަޒިފާއިން ވަކި ކުރާނެކަމުގެ އިންޒާރުދޭ އޯޑިއޯއެއް ވަނީ ލީކު ކޮށްލާފައެވެ.

"އެކަމަކު މިކަމަކު އަހަރެމެންގެ ބަސް ނާހަ މީހުންނަކަށް އަހަރެމެންގެވެސް ނޯންނާނެ އެހީތެރިކަމެއް. ރާޑޯއަކަށް ނޫން މިވޯޓު ހޯދަނީ. މިވޯޓު ހޯދަނީ ތިލަފަތަށް. އެއްގޮތަކީ ރާޑޯއަށް ލާން ބޭނުން ނުވާނަމަ ވޯޓު ނުލާވެސް ހެދޭނެ ގޮތްގޮތް އޮންނާނެ. އެމީހަކު ވޯޓުލާން ނުދާނީ. މިބުނީ އޮޕްޝަންތަކެކޭ މިދިނީ.

ލީކުވި އޯޑިއޯގައި ޒާހިރު ބުނެފައި ވެއެވެ.

މި އޯޑީއޯ ލީކުވެގެން ދިއުމާއެކު، އެމްޑީޕީގެ ބައެއް އެކްޓިވިސްޓުންނާއި އަދި މަޖިލިސް ބައެއް މެމްބަރުންވެސް ވަނީ މިއީ އެމްޑީޕީގެ ސިޔާސަތެއް ނޫންކަމަށް ބުނެ އަޑު އުފުލާފައެވެ. އަދި މުވައްޒަފުންނަށް އިންޒާރު ދިންކަމަށް ބުނާ ފެނަކަ ކުންފުނީގެ އިސްމުވައްޒަފު ވަޒިފާއިން ވަކި ކުރުމަށްވެސް ވަނީ ގޮވާލާފައެވެ.

މީ ސީދާ ރޭވިގެން ސަރުކާރު އަދި MDP ގެ މޫނުމަތި ކިނލަބު ކޮށް، ވޯޓަށް ނުފޫޒު ފޯރުވުމަށް ރޭވިގެން ހިންގާފައިވާ ނާތަހުޒީބު ހަޑި މުޑުދާރު އަމަލެއް، ޒާހިރު އަކީ PPMގެ އުފެއްދުމެއް، އަދި PPMގެ އިރުޝާދުގެ PPMގެ ކެނޑިޑޭޓަށް މަސައްކަތް ކޮށްދެއްވި އެޖެންޓެއް. https://t.co/GE56R87K51

— Mohamed Raee / Makunudhoo Constituency (@Mraee12) February 6, 2022

އަދި ހަމައެއާއެކު، ޒާހިރު ޕީޕީއެމްގެ ވެރިކަމުގައި ޕޯޑިއަމްތަކުގައި ވަހަކަ ދައްކާ، ކެމްޕޭން ހަރަކާތްތަކުގައި އުޅުނު މަންޒަރުތައް ދައްކުވައިދޭ ފޮޓޯތައްވެސް ވަނީ ސޯޝަލް މީޑިއާގައި ދައުރުވެފައެވެ.

ޒާހިރު ވަޒީފާއިން ވަކިކުރުމަށް އެމްޑީޕީގެ މަޖިލިސް ބައެއް މެމްބަރުންނާއި އެކްޓިވިސްޓުން ކުރި ޑިމާންޑަތަކަށް ރައްދު ދެއްވާ ފެނަކަ ކުންފުނީގެ އެމްޑީ ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ، އޯޑިއޯގެ ސައްޙަކަމާމެދުވެސް އޭނާއަށް ސުވާލު އުފެދޭ ކަމަށާއި، މީސްމީހުން ވަޒީފާއިން ވަކިކުރުމުގެ ވިސްނުން އޭނާ ނުގެންގުޅުއްވާނެ ކަމުގަައެވެ.

ބައެއް ފަރާތްތަކުން ތުހުމަތު ކޮށްފައިވާ ގޮތުގައި، މުވައްޒަފުންނަށް ފެނަކައިގެ އިސް މުވައްޒަފު ބިރުދައްކާ އިންޒާރު ދީފައިވަނީ، ފެނަކައިގެ އެމްޑީ އެގޮތަށް އަންގައިގެންނެވެ. އަދި ފެނަކައިގެ ލޮޖިސްޓިކްސް ޑިޕާޓްމަންޓުގެ އިސް ވެރިއެއްގެ ގޮތުގައި ހުންނެވި ޒާހިރު އުސްމާނަކީ ފެނަކައިގެ އެމްޑީ ސައީދުއާއި ގާތް ގުޅުމެއް އޮންނަ ފަރާތެއްކަމަށްވެސް ފެނަކައިގެ ބައެއް މުވައްޒިފުން ނަން ހާމަ ނުކުރުމަށް އެދި މައުލޫމާތު ދީފައި ވެއެވެ.

މައުލޫމާތު ލިބިފައިވާ ގޮތުގައި ޒާހިރު އުސްމާނަކީ ފާއިތުވެދިޔަ ޕީޕީއެމްގެ ވެރިކަމުގައި އެޕާޓީގެ ހަރަކާތްތަކުގައިވެސް އިސް ދައުރެއް އަދާ ކުރައްވާފައިވާ ފަރާތެކެވެ.