ކޮމަންޑޫ ދާއިރާގެ ބައި އިލެކްޝަނުގައި އެމްޑީޕީއަށް ލިބުނު ނަތީޖާއިން ސަރުކާރު ލަދުގަންނަން ޖެހޭ ކަމަށް ޕީޕީއެމްގެ ނާއިބުރައީސް އަދި މާލޭގެ މޭޔަރު ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އިންތިޚާބާ ގުޅިގެން ޕީޕީއެމް އިން މިރޭ ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައެވެ.

ޑރ. މުޢިއްޒު ވިދާޅުވީ މިއަދުގެ އިންތިޚާބަކީ ޙަޤީޤަތުގައި ޕީޕީއެމް އަށް ލިބުނު ކާމިޔާބެއް ކަމަށެވެ. އޭގެ ސަބަބުތައް ގިނަކަން ފާހަގަކުރައްވައި ވިދާޅުވީ ވޭތުވެދިޔަ މަހެއްހާ ދުވަހު ފެނިގެންދިޔައީ ސަރުކާރުގެ ހުރިހާ ބާރަކާއި ނުފޫޒެއް ބޭނުންކޮށްގެން ކޮމަންޑޫ ދާއިރާގެ އިންތިޚާބަށް މަސައްކަތް ކުރަމުންދިޔަ ތަން ކަމަށެވެ. އެއްވެސް ޤާނޫނަކަށް ޤަވާއިދަކަށް ބެލުމެއް ނެތި، ފާޅުކަން ބޮޑުގޮތެއްގައި މަސައްކަތްތަކެއް ކުރަމުންދިޔަ ކަމަށެވެ.

އެމަނިކުފާނު ވިދާޅުވީ ތަރައްޤީއާ ދެކޮޅު ނޫން ކަމަށާއި ރައީސް ޔާމީންގެ ފިކުރަކީ ތަރައްޤީ ކަމަށެވެ. އެހެންކަމުން ކޮމަންޑޫ ދާއިރާއަށް ގެންނާނެ ކަމަށް ހުވަފެންދައްކައި ފަށާފައިވާ ތަރައްޤީއަކީ އެ ދާއިރާގެ ރައްޔިތުންނަށްޓަކައި އުފާކުރައްވާ ކަމެއް ކަމަށެވެ. ނަމަވެސް ފެނިގެންދިޔައީ ޤާނޫނުތަކާއި އުޞޫލުތަކުގެ ބޭރުން އެތައް ކަމެއް ކުރަމުންދިޔަ މަންޒަރު ކަމަށް ވިދާޅުވިއެވެ.

ވަޒީފާތައް ވެސް އުފެއްދިގެން ދިޔައީ، ގޭގެއަށް ފެނަކައިގެ ވެރިން ވަޑައިގެން މިގޭ ކޮން ކުދިންނަކަށްތޯ ވަޒީފާ ބޭނުންވަނީ އަހައި ހަމަ ވަގުތުން ވަޒީފާ ދެވިގެންދިޔައީ. އަޅުގަނޑުމެން ހިސާބު ޖަހާލާއިރު ބިލިއަނެއްހާ ރުފިޔާ ކޮމަންޑޫ ދާއިރާއަށް އިންތިޚާބާ ގުޅިގެން ވަނީ ހޭދަކުރަން ކަނޑައަޅާފައި. އެހެންވީމަ ކޮމަންޑޫ ދާއިރާގެ އާބާދީއަށް ބަލާއިރު ބޮލަކަށް ތިންލައްކަ ރުފިޔާ ހޭދަކުރަން ފަށާފައި މިވަނީ.

– ޕީޕީއެމްގެ ނާއިބުރައީސް ޑރ. މުޙައްމަދު މުޢިއްޒު

ޕީޕީއެމްގެ ނާއިބުރައީސް ވިދާޅުވީ ކޮމަންޑޫ ދާއިރާގައި ސަރުކާރުން ގިނަ މަޝްރޫޢުތަކެއް ފެށި ނަމަވެސް އެ މަޝްރޫޢުތަކަށް ވާގޮތް ކުރިއަށް އޮތް ތަނުގައި ފެނިގެންދާނެ ކަމަށެވެ. އަދި އަލަށް އުފެއްދި ވަޒީފާތަކަށް ވެގެންދާ ގޮތް ވެސް ފެނިގެންދާނެ ކަމަށެވެ. އިންތިޚާބު ކާމިޔާބު ކުރުމަށްޓަކައި ސަރުކާރުން މަސައްކަތް ކުރީ އޭސީސީ ވެސް “ޕެރެލައިޒް” ކޮށްގެން ކަމަށް އެމަނިކުފާނު ވިދާޅުވިއެވެ. އަދި ވިދާޅުވީ އޭސީސީގައި އެއްވެސް މެންބަރަކު ނެތުމުން އިންތިޚާބާ ގުޅިގެން ހުށަހެޅި އެއްވެސް މައްސަލައެއް ބެލޭނެ ގޮތެއް ވެސް ނެތް ކަމަށާއި މިއީ ސަރުކާރުން ގަސްދުގައި ކޮށްފައިވާ ކަމެއް ކަމަށެވެ. މީގެ އިތުރުން މި އިންތިޚާބަށް އިންޑިއާއިން ނުފޫޒު ފޯރުވާފައިވާ ކަމަށް ވެސް އެމަނިކުފާނު ތުހުމަތު ކުރެއްވިއެވެ.

ސީދާ އިންޑިއާގެ ނުފޫޒުން، އިންޑިއާގެ ބާރުގެ ދަށުން ސަރުކާރުން ރާވައިގެން ކުރިއަށް ގެންދިޔަ ތަން ފެނިގެން ދިޔައީ. އެހެން މިދެންނެވީ މިއަދުވެސް އަޅުގަނޑުމެންނަށް ކުޑަ ވަގުތުކޮޅަކަށް ނަމަވެސް ފެނިގެންދިޔަ އިންޑިއާ އެމްބަސީން ނެރުނު ބަޔާނެއް ވެސް. ފަހުން އެ ނެގި ތަން ފެނުނީ. ރާޝިދަށް ވޯޓު ދިނުމަކީ ތަރައްޤީއަށް ކޮންމެހެން ބޭނުންވާ ކަމެއް ކަމަށް ބުނެ އިލްތިމާސް ކުރީ. އެހެންވީމަ ފެނިގެން މިދިޔައީ އެންމެ 230 އެއްހާ ވޯޓު، އެންމެ 7 ޕަސެންޓުގެ ތަފާތެއް އެކަނި ގެނެވުނު ތަން. އެއީ ޙަޤީޤަތުގައި ވެސް މި ސަރުކާރުން އެކަމަށްޓަކައި ލަދުގަންނަން ޖެހޭ ކަމެއް.

– ޕީޕީއެމްގެ ނާއިބުރައީސް

މިއަދު ވޯޓުލުމުގެ ކަންކަން ހިނގަމުންދިޔައިރު ވޯޓުލީ މަރުކަޒުގައި އެމަނިކުފާނު ވެސް ހުންނެވިކަން ފާހަގަކުރައްވައި ވިދާޅުވީ އެތަނުގައި ތިބި އެމްޑީޕީގެ އޮބްޒާވަރުންނާއި އޮފިޝަލުންނާއި މަޖިލީސް މެންބަރުންގެ މޫނުމަތިން އުފާވެރިކަމެއް ނުފެންނަ ކަމަށެވެ. ސަބަބަކީ މުޅި ދައުލަތް އެކީގައި މަސައްކަތް ކުރުމުން ވެސް ރައީސް ޔާމީން ގިނިކަންޏާ ކުރެއްވި މަސައްކަތުން ނުކުތް ނަތީޖާއާއި ތާއީދު ބޮޑުވުމުން ކަމަށެވެ.

އެހެންވީމަ މިކަމަކީ އަޅުގަނޑުމެން ހިތްވަރު އާލާކުރަންޖެހޭ ކަމެއް. ހިތްވަރު ލިބިގަންނަންޖެހޭ ކަމެއް. މިއީ ކުރިއަށް އޮތް ތަނަށް ރައީސް ޔާމީނާ އެކު މިޤައުމުގެ ކަންކަމާއިގެން އަޅުގަނޑުމެން އިތުރު ހިތްވަރަކާއެކު މަސައްކަތް ކުރަންވީ ވަގުތު. އެހެންވީމަ ޕީޕީއެމްގެ މެންބަރުންނާއި ޕީޕީއެމްގެ ލީޑާރޝިޕްގެ ތެރެއިން ރައީސް ޔާމީންގެ ލަފާފުޅާ އެކީގައި ދައިރާގައި މަސައްކަތް ކުރަމުންދާ ބޭފުޅުންނާއި ހުރިހާ ބޭފުޅުންނަށް ޝުކުރު ދަންނަވަން އަދި ހިތްވަރުދެން. މި އިންތިޚާބަކީ ޙަޤީޤަތުގައި ޕީޕީއެމަށް އަދި މި ޤައުމަށް ލިބުނު ކާމިޔާބެއް. އަދި މި ސަރުކާރަށް ލިބުނު ނާކާމިޔާބެއް ކަމުގައި ނޫނީ ނުވާނެ

– ޑރ. މުޢިއްޒު

ކޮމަންޑޫ ދާއިރާގެ ބައި އިލެކްޝަނުގައި ވާދަކުރެއްވީ ޕީޕީއެމްގެ ކެންޑިޑޭޓު އަލްއުސްތާޛު މޫސާ ފަތުޙީ އާދަމް އާއި އެމްޑީޕީގެ ކެންޑިޑޭޓު މުޙައްމަދު ރާޝިދު އާއި އެމްއެންޕީގެ ކެންޑިޑޭޓު ޢަބްދުލް ހަންނާން އިދުރީސް އެވެ.

ވަގުތީ ނަތީޖާ ދައްކާގޮތުން އެމްޑީޕީގެ ކެންޑިޑޭޓު ރާޝިދަށް ލިބިވަޑައިގަތީ 1،401 ވޯޓެވެ. އޭނާއާ ވާދަކުރެއްވި ޕީޕީއެމްގެ ކެންޑިޑޭޓު މޫސާ ފަތުޙީއަށް 1،161 ވޯޓު ލިބިވަޑައިގަތެވެ. އެމްއެންޕީގެ ކެންޑިޑޭޓު ޢަބްދުލް ހަންނާނަށް ލިބިވަޑައިގަތީ 323 ވޯޓެވެ.

ރައްޔިތުންގެ މަޖިލީހުގެ ކޮމަންޑޫ ދާއިރާގެ ގޮނޑި ހުސްވީ އެ ދާއިރާ ތަމްޞީލުކުރައްވަމުން ގެންދެވި އެމްޑީޕީގެ މެމްބަރު ޙުސައިން ވަޙީދު އަވަހާރަވުމުންނެވެ.