ރައްޔިތުންގެ މަޖިލިހުގެ ކޮމަންޑޫ ދާއިރާގެ މެމްބަރުކަން އަދާ ކުރައްވަމުން ގެންދެވި، އަދި އެދާއިރާއަށް އަގުހުރި ޚިދުމަތްތަކެއް ކުރައްވާފައިވާ، މެމްބަރު ހުސެއިން ވަހީދު ފާއިތުވި ޑިސެމްބަރ މަހުގެ 14ވަނަ ދުވަހު އަވަހާރަ ވުމާއި ގުޅިގެން، އެދާއިރާގެ ގޮޑިއަށް މެމްބަރަކު އިންތިޚާބު ކުރުމަށްޓާކާ ބޭއްވުނު ބައި އިލެކްޝަންގެ ވޯޓު ލުން އިއްޔެ ބޭއްވި، ކޮމަންޑޫ ދާއިރާގެ ރައްޔިތުން މިވަނީ އެދާއިރާ ދައުރުގެ ބާކީ އޮތްތަކުގައި ރައްޔިތުންގެ މަޖިލިހުގައި ތަމްސީލު ކުރައްވާނޭ މެމްބަރު އިންތިޚާބު ކޮށްފައެވެ.

މިގޮތުން، މި އިންތިޚާބުގައި، ކޮމަންޑޫ ދާއިރާ ރައްޔިތުންގެ މަޖިލީހުގައި ތަމްސީލުކުރާނެ މަންދޫބެއްގެ ގޮތުގައި އިޚްތިޔާރު ކޮށްފައިވަނީ، ފާއިތުވެދިޔަ ގިނަ ދައުރުތަކެކޭވެސް އެއްފަދައިން އެމްޑީޕީގެ ފަރާތުން ވާދަ ކުރެއްވި ކެނޑިޑޭޓެވެ. އެމްޑީޕީގެ ކެނޑިޑޭޓް މުހައްމަދު ރާޝިދު އިންތިޚާބު ކާމިޔާބު ކޮށްފައިވަނީ އެންމެ ގާތުން ވާދަކުރި، ޕީޕީއެމްގެ ކެނޑިޑޭޓް މޫސާ ފަތުހީއަށްވުރެ 240 ވޯޓު އިތުރަށް ހޯއްދަވައިގެންނެވެ.

ފާއިތުވެދިޔަ އަހަރު އަލަށް އުފެއްދި އެމްއެންޕީއިން އިންތިޚާބުގައި ވާދަކުރި އަބުދުލް ހަންނާނު އިދުރީސަށް ލިބިފައިވަނީ 323 ވޯޓެވެ. އެހެންކަމުން މި އިންތިޚާބުގެ ނަތީޖާއިން ސާފުވެގެން ދިޔަ އެއް ހަގީގަތަކަށް ވެގެން މިދިޔައީ، މިދާއިރާއަކީ މާޒީވެދިޔަ ތަނެކޭވެސް އެއްފަދައިން އެމްޑީޕީގެ ތާޢިދު އޮތް، އަދި ވެރިކަން ކުރާ އެމްޑީޕީއާއި ޕީޕީއެމްގެ ތާއީދު އޮތް ދާއިރާއެއް ކަމެވެ.

އެހެންނަމަވެސް، ރާއްޖޭގައި މިފަދައިން ބޭއްވޭ ކޮންމެ އިންތިޚާބަކީވެސް ވާދަވެރިކަން ބޮޑު، އަދި ފޯރިގަދަ ކެމްޕޭންތަކެއް ކުރެވިގެންދާ އަދި ހަމަ އެއާއެކު ފައިސާއާއި އެނޫން އެތައް ނުފޫޒެއްގެ ތެރެއިން ބޭއްވިގެންދާ އިންތިޚާބަކަށް ވެގެން ދިއުމާއެކު، މިއިންތިޚާބުގެ ނަތީޖާ މިނަންޖެހޭނީ ހަމައެކަނި ޕާޓީތަކަށް ލިބިގެންދިޔަ ވޯޓުގެ އަދަދުން ނޫންކަން ފާހަގަ ކޮށްލަން ޖެހެއެވެ.

ސަރުކާރަށް ބޮޑު ކާމިޔާބެއް، އިދިކޮޅަށް ނާކާމިޔާބީއެއް!

ކޮމަންޑޫ ދާއިރާގެ ބައި އިލެކްޝަން ވެގެން ގޮސްފައިވަނީ ފެށުނީއްސުރެ ގިނަ ބައެއްގެ ނަޒަރިއްޔާތު ހުއްޓިގެންދިޔަ، އަދި އެއިންތިޚާބުގެ ނަތީޖާއަށް މުޅި ގައުމުހެންކަހަލަ ގޮތަކަށް އިންތިޒާރު ކުރި އިންތިޚާބަކަށެވެ.

ސަބަބުތައްވެސް ވަރަށް ގިނައެވެ. މިއިންތިޚާބު ބޯމަތިވެގެން އައިއިރު، އިދިކޮޅު ޕީޕީއެމްއިން ވަނީ އިންޑިއާއައުޓް ކެމްޕޭން އިތުރަށް ކުރިޔަށް ޖައްސާ، މި ކެމްޕޭންގެ ސިޔާސީ ޕްރެޝަރ އިންތިހާއަށް މަތިކޮށްފައެވެ. އަދި ރައީސް ޔާމިން ޖަލުން މިނިވަންވެ، ކުރިޔަށްދާ އިންޑިއާ އައުޓު ކެމްޕޭނާ ގުޅިވަޑައިގެން، މި ކެމްޕޭން ރާއްޖޭގެ އެހެން ރަށްތަކަށް ފުޅާ ކުރިކުރުމުގެ ނަތީޖާއެއްގެ ގޮތުން، ސަރުކާރަށް ސިޔާސީ ގޮތުން އޮތް ތާއީދު ކޮންމެވެސް އެއްގޮތަކުން ސާފުކޮށް ދިނުން އޮތީ ރައީސް ސާލިހަށް ވަރަށް ގިނަ ގޮތްގޮތުން މުހިންމު، އަދި އެހާމެ ލާޒިމް ކަމަކަށް ވެގެން ގޮސްފައެވެ.

އަދި ހަމަ އެއާއެކު، ކޯވިޑްގެ ދަތިތަކާއި، ކުރިމަތިވެފައި އޮތް އިގްތިސާދީ ބޮޑެތި ގޮންޖެހުންތަކާއެކު ނަމަވެސް، މިފަދަ އާންމު އިންތިޚާބެއްގައި ބޮޑު ބައްޔަކުން ސަރުކާރު ބަލިވެ، ރިހޭ ފައިމައްޗަސް ފޮއި ވެއްޓިގެން ހިގައްޖެނަމަ އެކަމުގެ ގެއްލުމާއި ހަލާކު ސަރުކަރަށް އިންތިހާއަށް ބޮޑުވެ، މިއީ ރައީސް ސާލިހަށް ކުރިމަތިވެގެންދާނެ ތަހައްމަލް ކުރަން ދަތި ބޮޑު ސިޔާސީ ގެއްލުމަކަށް ވެގެން ދާނެކަމީ ކަށަވަރުވެ ޔަގީންވާން އޮތް ކަމެވެ. އަދި އޭގެ އިތުރުން އެމްޑީޕީގެ އެތެރޭގައި އުފެދިފައި އޮތް ސިޔާސީ ކޯޅުމާއި، އެޕާޓީގެ 2023ގެ ޓިކެޓް ޕާޓީގެ އެތެރެއިން ކަށަވަރު ކުރުމުގައި، މިއިންތިޚާބުގެ ނަތީޖާއަކީވެސް ރައީސް ސާލިހަށް ކޮންމެހެންވެސް މުހިންމު ނަތީޖާއެއްގެ ގޮތުގައި ގިނަބަޔަކު ސިފަކުރަމުން ގޮސްފައި ވެއެވެ.

މީގެ އެއް ހެއްކެއްގެ ގޮތުގައި ފެނިގެން ދިޔައީ މި އިންތިޚާބު ކާމިޔާބު ކުރުމަށް، އެމްޑީޕީގެ ތެރެއިން ރައީސް ސާލިހަށް ތާއީދު ކޮށްގެން ތިބި މެމްބަރުން ކޮށްފައިވާ މަސައްކަތަކެވެ. ޕާޓީ ދެބައިވެ އުފެދިގެންދިޔަ ނަޝީދުގެ ފެކްޝަނަށް ނިސްބަތްވާ ގިނަ މެމްބަރުންގެ މޫނު މިއިންތިޚާބުގެ ކެމްޕޭންގައި ފެނިގެން ގޮސްފައެއް ނުވެއެވެ. މީގެތެރޭގައި އެމްޑީޕީގެ ޕާލަމެންޓްރީ ގްރޫޕުގައި، ފާޅުގައި ރައީސް ސާލިހަށް ފާޑު ވިދާޅުވާ، އަދި ރައީސް ނަޝީދަށް "ހިތާއި ނަފްސުން" ތާއީދު ކޮށްގެން ތިއްބެވި ގިނަ މެމްބަރުން ހިމެނެއެވެ.

އެހެންކަމުން، މި އިންތިޚާބުގެ ނަތީޖާއަކީ، މުޅި ރާއްޖެއިން ސަރުކާރަށް އޮތް ތާއީދު ރަމްޒު ކޮށްދޭ އިންތިޚާބެއްގެ ގޮތުގައި ސިފަކުރެވިގެން ދިއުމުގެ ބަދަލުގައި، މިއިންތިޚާބަކީ، އެމްޑީޕީގެ އެތެރޭގައި ހިގަމުންދިޔަ ސިޔާސީ ވާދަވެރިކަން ރައީސް ސާލިހު ފަތަހަ ކުރެއްވި އިންތިޚާބެއްގެ ގޮތުގައި ބަލައިގަތުން މާ އައުލާކަން ބޮޑެވެ.

ސަބަބަކީ، ޕާޓީގެ އެއްބައިވަންތަ ކަމަށްޓަކާ އިންތިޚާބުގެ ކެމްޕޭނާއި ނަޝީދު ގުޅިވަޑައިގަތް ނަމަވެސް، އިންތިޚާބު ނިމި ލިބުނު ކާމިޔާބީ އޭގޭ ފޯރީގައި ފާހަގަކުރުމަށް ނަޝީދު ޓުވީޓު ކުރައްވާފައި ނުވާނުވުމާއި، (ޓުވީޓު ކުރައްވާފައިވަނީ މިއަދުގެ ހެނދުނުގެ ވަގުތެއްގައި)، އަދި ގެންގުޅުއްވާކަމަށް ބުނާ "ފޭކް އެކައުންޓު"ތަކުން އިންތިޚާބުގެ ނަތީޖާއާއި ގުޅޭގޮތުން މިހާތަނަށް ދައްކަވާފައިވާ ވާހަކަތަކުންވެސް، ހަގީގަތުގައި މިއިންތިޚާބުގައި ރައީސް ސާލިހުއަށް މިލިބިގެން ދިޔަ ކާމިޔާބިއަކީ ނަޝީދު "ހިތުން" އުއްމީދު ކުރެއްވި ނަތީޖާއަކަށް ވެގެން ގޮސްފައި ނުވާކަމަށް މޭރުން ކުރެވެން އޮތުމާވެސް އެކީއެވެ.

އެހެންކަމުން ކޮމަންޑޫ ދާއިރާގެ ބައި އިލެކްޝަންގެ ނަތީޖާއަކީ އިދިކޮޅަށް ލިބިގެންދިޔަ ނާކާބިޔާބީއެއްގެ ގޮތުގައި ސިފަކުރުމުގެ ބަދަލުގައި، މިއިންތިޚާބު ބޮޑަށް ސިފަ ކުރަން ޖެހެނީ އެތެރެއާއި ބޭރުން (އެމްޑީޕީ އެތެރެއިންނާއި، އަދި އެދާއިރާއިން) ރައީސް ސާލިހު ހޯއްދެވި ސިޔާސީ ބޮޑު ކާމިޔާބީއެއްގެ ގޮތުގައެވެ.

ނުފޫޒުގެ ތުހުމަތު!

ހަގީގަތަކީ، ފާއިތުވެދިޔަ އެއްވެސް ޒަމާނެއްގައި ރާއްޖޭގައި ފުރިހަމަ އިންސާފްވެރި އިންތިޚާބެއް ބޭއްވިގެން ގޮސްފައި ނުވާކަމެވެ. މާނައަކީ، ވޯޓު ގުނުމުގައި ބޮޑެތި އޮޅުވާލުންތަކާއި މަކަރު ފަހުގެ އިންތިޚާބުތަކުގައި ހަދަމުން ގޮސްފައި ނުވިނަމަވެސް، ނުފޫޒާއި، ފައިސާއާއި އަދި އެނޫން ވަސީލަތްތައް އިންތުިޚާބުތަކުގައި ބޭނުން ކުރުން މިއީ ރާއްޖޭގައި އޭގެ އިންތިހާގައި އަދިވެސް އޮތް ސަގާފަތެއް ކަމެވެ.

މިއީ ފާއިތުވެދިޔަ ހުރިހާ ރިޔާސީ އިންތިޚާބެއްގައިވެސް އޭރު ވެރިކަމުގައި ތިބޭ ބަޔަކު ކެމްޕޭންތައް ކުރިޔަށް ގެންގޮސްފައިވާ ގޮތެވެ. އެހެންކަމުން، އެއްވެސް އިންތިޚާބެއްގައި، މިއީ ރާއްޖޭގައި، ބަލިވާ ބަޔަކަށް މޮޅުވާ ބައެއްގެ މައްޗަށް ކުރެވެން އޮތް ޝަކުވާއެއް ކަމުގައި މިއަދު ދެންނެވޭނެ ޖާގަ އޮތް ކަމަކަށް ނުބެލެވެއެވެ. އަދި މިއީ ކުރިޔަށް އޮތްތަނުގައިވެސް މި ނުފޫޒާއި ބާރާއީ ވަސީލަތްތަކުގެ ބޭނުން، ފުރުސަތު ލިބޭ ބަޔަކު ކުރާނެ، އަދި އެއާއި ނުލާ ރާއްޖޭގައި އިންތިޚާބުތައް ކުރިޔަށް ނުދާނެ ހަމައެއްކަމުގައި ބަލަންޖެހި، އޭގެ ނަތީޖާއެއްގެ ގޮތުން މިއީ މިގޮތުން ބޭއްވާ އިންތިޚާބެއްގެ ހަގީގީ ކާމިޔާބާއި ނާކާމިޔާބު ވަޒަން ކުރުމުގައި ބަހުސް ކުރެވެން އޮތް މައުޟޫއެއް ކަމުގައި ބެލެވެން ނެތްކަމުގައި ދަންނަވަން ޖެހެއެވެ.

ސަބަބަކީ ރާއްޖޭގެ ހާލަތަށް ބަލާއިރު، މިބަހުސް ކުރާމީހާ އަކީވެސް މިއުސޫލު ގަބޫލުކޮށް، ނުފޫޒާއި ބާރު އަތަށް އަރާތަނުން އިންތިޚާބެއް ކާމިޔާބު ކުރުމުގައި އެވަސީލަތުގެ ބޭނުން ކުރުމަށް ކަމަރު ބަނދެގެން ހުނާނޭ މީހެއްކަމުގައި ވާތީވެސްމެއެވެ.

އެހެންކަމުން، މިއިންތިޚާބު ކާމިޔާބު ކުރުމަށްޓަކާ، ރައީސް ސާލިހު ނުފޮރޮޅާ އެންމެ ގާކޮޅެއްވެސް ނުބާއްވަވާ، ކުރެއްވި މަސައްކަތްތައް ސިފަކުރަން ޖެހެނީ ވަރަށްވެސް ރަގަޅަށް ހިސާބު ޖައްސައިވައިގެން ކުރައްވާފައިވާ މަސައްކަތެއްގެ ގޮތުގައެވެ. އަދި މި ކާމިޔާބީއަކީ އޭގެ ސިޔާސީ ފައިދާއާއި މަންފާ ދައުރުގެ ކުރިޔަށް އޮތްތަނުގައި ސިޔާސީގޮތުން އެމެނިކްފާނު ނަންގަވާނެ ކާމިޔާބީއެއްގެ ގޮތުގައި މި ކާމިޔާބީ މިއަދު ސިފަކުރަން ޖެހޭކަމީ ކަށަވަރުވެ ޔަގީންވާން އޮތް ކަމެކެވެ.