ރީތިގޮތަކަށް ލިޔެފައިވާ ބަޔާނެއް އިއްވިދާނެކަމަށް ވިދާޅުވެ ރައީސުލްޖުމްހޫރިއްޔާ ދެއްވި ރިޔާސީ ބަޔާނަށް ޕީޕީއެމްގެ ނާއިބު ރައީސް އަދި ނައިފަރު ދާއިރާގެ މެންބަރު އަޙްމަދު ޝިޔާމް ފާޑުވިދާޅުވެއްޖެއެވެ.
ރައްޔިތުންގެ މަޖިލިސް ހުޅުވުމަށް ރައީސް މިއަދު ދެއްވި ރިޔާސީ ބަޔާނަށް ފާޑުވިދާޅުވެ ޝިޔާމް ވިދާޅުވީ، ރީތި ޢިބާރާތުން ލިޔެ ބަޔާނެއް އިއްވިދާނެކަމަށާއި، ކޮނޑުހުޅު ދާވަރަށް ޕާޓީ މެންބަރުންނަށް އަތްވެސް ޖެހިދާނެކަމަށެވެ. މީގެ ކުރިން އިއްވި ބަޔާންތަކުގައި ކުރައްވަން ވިދާޅުވި ކަންކަން ހާސިލްވީ ކިހާވަރަކަށްތޯ ޝިޔާމް ސުވާލުކުރެއްވިއެވެ. ޤައުމުގެ ދަރަނި 100 ބިލިއަން ކަނޑައްތުކޮށްފިކަމަށާއި، 3 އަހަރު ތެރޭ އެކަނި 48 ބިލިއަން ދަރަނި އުފައްދާފައިވާކަމަށް ޝިޔާމް ތުހުމަތު ކުރެއްވިއެވެ.
Reethigothakah liye bayaaneh ivvidhaane. Kondu hulhu dhaavarah party memberunnah aiy ves jehidhaane. Meege kurin ivvi bayan thakugai kuravvan vidhaalhuvi kankan haasilvee kihaa varakah tho? Qaumuge dharani Rf.100bn kadahthu koffi. 3 aharu therey ekani Rf.48bn dharani ufahdhaifi.
— Ahmed Shiyam (@Shiyamaldives) February 3, 2022
ޝިޔާމް މިހެން ވިދާޅުވެފައިވާއިރު، ރައީސް މިއަދު ދެއްވި ރިޔާސީ ބަޔާނުގައި ވަނީ، ކުރީ ސަރުކާރުން ނަގާފައިވާ ދަރަނީގެ ތެރެއިން މިސަރުކާރުން މިހާތަނަށް 447 މިލިއަން ޑޮލަރު ދައްކާ ނިމިފައިވާކަމަށެވެ. އަދި އެއާއެކުވެސް މިދިޔަ އަހަރު ނިމުނުއިރު ދައުލަތުގެ ރަސްމީ ރިޒާވްގެ ގޮތުގާ 791.2 މިލިއަން ޑޮލަރު ހުރިކަން ރައީސް ފާހަގަކުރެއްވިއެވެ.
ރައީސް ވިދާޅުވީ ބޭރު ފައިސާގެ ތާށިކަން ހައްލު ކުރުމާއި ދިވެހި ރުފިޔާގެ އަގު ހިފެހެއްޓުމުގެ ފިޔަވަޅުތައް ސަރުކާރުން މިއަހަރު އަޅަން ފަށާނެކަމަށެވެ. އަދި ބޭރު ފައިސާގެ ބާޒާރާ ގުޅޭ ޤާނޫނީ އޮނިގަނޑަށް ބަދަލު ގެނެވޭނެކަމަށްވެސް ރައީސް ވިދާޅުވިއެވެ. މީގެއިތުރުން ކޯވިޑް-19ގެ ކުރިން އޮތް ހިސާބަށް 2023 ވަނަ އަހަރު ރާއްޖޭގެ އިޤްތިޞާދު އަނބުރާ ގެންދެވޭނެކަމަށް އުއްމީދުކުރައްވާކަމަށްވެސް ރައީސުލްޖުމްހޫރިއްޔާގެ ރިޔާސީ ބަޔާނުގައި ވިދާޅުވިއެވެ.
ކޮމެންޓު ފޮނުވާ