އަންނަ މާރޗް މަހުގެ ފުރަތަމަ ހަފްތާއިން ފެށިގެން މިފްކޯއަށް މަސް ގަންނަ އަގު ބޮޑު ކުރުމަށް ސަރުކާރުން ނިންމާފައި ވާކަން ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު ހާމަ ކުރައްވައިފިއެވެ.
ރައީސް ސާލިހު މިކަން ހާމަ ކުރައްވާފައިވަނީ، ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގަ ރިޔާސީ ބަޔާން އިއްވަވަމުންނެވެ. މިއަދު ހެނދުނު 9:00 ރައްޔިތުންގެ މަޖިލިހުގައި އޮތް ޖަލްސާގައި ރިޔާސީ ބަޔާން އިއްވަވަމުން ރައިސް ސާލިހު ވިދާޅުވެފައިވަނީ، ދެން މިފްކޯއަށް މަސް ގަންނާނީ ދުނިޔޭގެ ބާޒާރުގައި މަހުގެ އަގަށް އަންނަ ބަދަލާ އެއްގޮތަށް ކަމުގައެވެ.
މިގޮތުން ދުނިޔޭގެ ބާޒާރުގައި ބޮޑު އަގު ލިބޭނަމަ މިފްކޯއަށް ގަންނަ މަހުގެ އަގު ބޮޑުވާނެކަމަށް ރައީސް ސާލިހު ވިދާޅުވެފައި ވެއެވެ. އަދި ރައީސް ސާލިހު ވިދާޅުވީ ފާއިތުވެދިޔަ 15 އަހަރު ދުވަހުގެ ތެރޭގައި އެންމެ ގިނަ އަދަދަކަށް މިފްކޯއަށް މަސް ކިރުވާފައިވަނީ ނިމިދިޔަ އަހަރުގައި ކަމުގައަވެ. އަދި ބާނާ މަހަށް ލަސްނުކޮށް ފައިސާ ލިބޭނެކަމުގެ ޔަގީންކަން މަސްވެރިންނަށް މިހާރު އޮންނާނޭ ކަމުގައިވެސް ރައީސް ސާލިހު ވިދާޅުވެފައި ވެއެވެ.
މިއަދުގެ ރައްޔިތުންގެ މަޖިލިހުގެ ޖަލްސާގައި ރިޔާސީ ބަޔާން އިއްވަވަމުން ރައީސް ސާލިހު ވިދާޅުވީ، ދުނިޔެ ފުރަބަންދުވެ އިގްތިސާދީ ހަރަކާތަތައް ހުއްޓި، އާމްދަނީގެ ހުރިހާ މަގެއް ފަޅުވެ ދިޔައިރު ފަޅުނުވެ އޮތީ ވަށާ މިއޮތް ދިވެހި ނޫފަޅުތަކާއި ރާއްޖޭގެ މަސްކަނޑުތައް ކަމުގައެވެ.
މިއަދު ރިޔާސީ ބަޔާނުގައި ރައީސް ސާލިހު ވިދާޅުވީ އެސްޓީއޯގެ ދަށުން މިފްކޯ ވަކިކޮށް، އަމިއްލަ ފައިމައްޗަށް ތެދުވެގެން ހިންގޭ ކުންފުންނަކަށް މިއަހަރުގެ މެދުތެރޭގައި މިފްކޯ ބަދަލުވެގެން ދާނެކަމުގައެވެ.
މިއަދުގެ ރިޔާސީ ބަޔާނުގައި ރައީސް ސާލިހުވަނީ، ސަރުކާރުން މިހާތަނަށް ކުރިޔަށް ގެންދަވާފައިވާ ތަރައްގީގެ މަޝްރޫޢުތަކުގެ ތަފްސީލުތައް ހާމަ ކުރައްވަމުން، ކުރިޔަށް އޮތް ތަނުގައި ސަރުކާރުން ކުރިޔަށް ގެންދަވާނޭ ތަރައްގީގެ މުހިންމު މަޝްރޫއުތަކަށާއި އަދި ރައްޔިތުންގެ ދުޅަހެޔޮކަމަށް ސަރުކާރުން ތަންފީޒު ކުރައްވާނެ ސިޔާސަތުތަކުގެ މައްޗަށް އަލިއަޅުއްވާ ލައްވާފައެވެ.
ރިޔާސީ ބަޔާނަކީ ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 84 ވަނަ މާއްދާގައިވާ ގޮތުގެމަތިން ރައީސުލްޖުމްހޫރިއްޔާ އިއްވަވަންޖެހޭ ބަޔާނެކެވެ. ޤާނޫނު އަސާސީގެ 84 ވަނަ މާއްދާފައި ބަޔާންކޮށްފައިވަނީ ކޮންމެ އަހަރެއްގެ ރައްޔިތުންގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ޤައުމުގެ ޙާލަތު ބަޔާންކޮށްދީ، ޤައުމުގެ ޙާލަތު އިތުރަށް ރަނގަޅުކުރުމަށްޓަކައި ކުރަންޖެހޭ ކަންކަމަށް ރައީސުލްޖުމްހޫރިއްޔާއަށް ފެނިވަޑައިގަންނަވާ ކަންތައްތަކުގެ މައްޗަށް އެކުލެވޭ ރިޔާސީ ބަޔާނެއް ރައްޔިތުންގެ މަޖިލީހަށް އިއްވަވަންވާނެކަމަށެވެ.
މިއީ ރައީސް އިބުރާހިމް މުހައްމަދު ސާލިހު ރައްޔިތުންގެ މަޖިލިހަށް އިއްވަވާ 4 ވަނަ ރިޔާސީ ބަޔާނެވެ.
