ނުކުޅެދުންތެރިކަން ހުންނަ މީހުންނަށް ދެމުން އަންނަ އިނާޔަތް ބޮޑުކުރުމަށް ސަރުކާރުން ނިންމާފައިވާކަން ރައީސުލްޖުމްހޫރިއްޔާ އިބުރާހިމް މުހައްމަދި ސާލިހު ހާމަ ކުރައްވައިފިއެވެ.
ރައީސް ސާލިހު މިކަން ހާމަ ކުރައްވާފައިވަނީ، ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގަ ރިޔާސީ ބަޔާން އިއްވަވަމުންނެވެ. މިއަދު ހެނދުނު 9:00 ރައްޔިތުންގެ މަޖިލިހުގައި އޮތް ޖަލްސާގައި ރިޔާސީ ބަޔާން އިއްވަވަމުން ރައިސް ސާލިހު ވިދާޅުވެފައިވަނީ، މިހާތަނަށް އައިއިރު، ނުކުލެދުންތެރިކަން ހުންނަ މީހުންނާބެހޭ ޖުމްލަ އަދަދާއި ތަފްސީލު އެގޭނެ ގައުމީ ދަފްތަރެއް އެކުލަވާލެވިފައި ނެތް ކަމުގައެވެ. އެހެންކަމުން މިހާރު ސަރުކާރުން ކުރައްވަމުން ގެންދަވާ މަސައްކަތަކީ މިފަދަ ދަފްތަރެއް އެކުލަވާލުމުގެ މަސައްކަތް ކަމަށާއި، މިދަފްތަރު އެކުލަވާލުމުގެ މަސައްކަތް ނިންމާ މިއަހަރު ފަހު ކުއާޓަރުގައި ނުކުޅެދުންތެރިކަން ހުންނަ މީހުންނަށް ދެމުން އަންނަ އިނާޔަތް ސަރުކާތުން ބޮޑު ކުރައްވާނެ ކަމުގައެވެ.
ރައްޔިތުންގެ މަޖިލިހަށް މިއަދު އިއްވެވި ރިޔާސީ ބަޔާނުގައި ރައީސް ސާލިހު ވިދާޅުވީ، ނުކުޅެދުންތެރިކަން ހުންނަ މީހުންގެ ދަފްތަރެއް އެކުލަވާލުމުން އެ ދަފްތަރަކީ އެމީހުންނަށް ބޭނުންވާ ފަރުވާއާއި ރީހެބިލިޓޭޝަން އަދި ތެރަޕިއާއި އެހެނިހެން ޚިދުމަތްތައް ފޯރުކޮށް ދިނުމަށް އޮތް ވަސީލަތަކަށް ވެގެން ދާނެކަމުގައެވެ.
ރައީސް ސާލިހު ވިދާޅުވީ ޤައުމިއްޔަތުގެ މައިވަންތަ އުނގުގާ ކޮންމެ ދިވެއްސަކީވެސް ކުޅެދޭ ހަމަހަމަ ދިވެހި ދަރިއެއް ކަމުގައެވެ.
މިއަދުގެ ރިޔާސީ ބަޔާނުގައި ރައީސް ސާލިހުވަނީ، ސަރުކާރުން މިހާތަނަށް ކުރިޔަށް ގެންދަވާފައިވާ ތަރައްގީގެ މަޝްރޫޢުތަކުގެ ތަފްސީލުތައް ހާމަ ކުރައްވަމުން، ކުރިޔަށް އޮތް ތަނުގައި ސަރުކާރުން ކުރިޔަށް ގެންދަވާނޭ ތަރައްގީގެ މުހިންމު މަޝްރޫއުތަކަށާއި އަދި ރައްޔިތުންގެ ދުޅަހެޔޮކަމަށް ސަރުކާރުން ތަންފީޒު ކުރައްވާނެ ސިޔާސަތުތަކުގެ މައްޗަށް އަލިއަޅުއްވާ ލައްވާފައެވެ.
ރިޔާސީ ބަޔާނަކީ ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 84 ވަނަ މާއްދާގައިވާ ގޮތުގެމަތިން ރައީސުލްޖުމްހޫރިއްޔާ އިއްވަވަންޖެހޭ ބަޔާނެކެވެ. ޤާނޫނު އަސާސީގެ 84 ވަނަ މާއްދާފައި ބަޔާންކޮށްފައިވަނީ ކޮންމެ އަހަރެއްގެ ރައްޔިތުންގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ޤައުމުގެ ޙާލަތު ބަޔާންކޮށްދީ، ޤައުމުގެ ޙާލަތު އިތުރަށް ރަނގަޅުކުރުމަށްޓަކައި ކުރަންޖެހޭ ކަންކަމަށް ރައީސުލްޖުމްހޫރިއްޔާއަށް ފެނިވަޑައިގަންނަވާ ކަންތައްތަކުގެ މައްޗަށް އެކުލެވޭ ރިޔާސީ ބަޔާނެއް ރައްޔިތުންގެ މަޖިލީހަށް އިއްވަވަންވާނެކަމަށެވެ.
މިއީ ރައީސް އިބުރާހިމް މުހައްމަދު ސާލިހު ރައްޔިތުންގެ މަޖިލިހަށް އިއްވަވާ 4 ވަނަ ރިޔާސީ ބަޔާނެވެ.
