ދުނިޔެއަށް މަޝްހޫރު ލަވަކިއުންތެރިޔާ ރިހާނާ އިނީ އޭނާގެ އަލަތު ދަރިފުޅަށް ބަލިވެ ކަމަށް މީޑީއާތަކުން ބުނެފިއެވެ.
33 އަހަރުގެ ލަވަ ކިއުންތެރިޔާ އާއި ލޯބިވެރިޔާ ރެޕާ، އެޕީ ރޮކީ ވަނީ ނިޔުޔޯކްގެ މަގެއްގެ މަތިން ފެނިފައެވެ. ފިޔާތޮށި ކުލައިގެ އޯވަ ސައިޒްގެ ޖެކެޓެއްގައި ރިހާނާ ފެނިގެން ދިއައިރު އޭނާ ހުރީ ބަނޑާ ހަމައިން ޖެކެޓް ގެ ގޮށްތައް ނާޅުވައެވެ. ހާމައަށް ހުރި އޭނާގެ ބަނޑަށް ހައެއްކަ މަސް ވެދާނެކަމަށް ރިޕޯޓުތައް ބުނެއެވެ.
މި ފޮޓޯތައް ނަގާފައިވަނީ ހުކުރު ދުވަހުއެވެ. ނަމަވެސް މީޑިއާތަކުން ފޮޓޯ އާންމުކޮށްފައިވަނީ ހޯމަ ދުވަހުއެވެ. ރިހާނާ ވިހާނެ ދުވަހެއް އަދި އިއުލާނެއް ނުކުރެއެވެ.
ރިހާނާ އަކީ ދުނިޔޭގެ އެންމެ މަޝްހޫރު އަންހެނުންގެ ތެރޭގައި ހިމެނޭ އަދި އެންމެ ބޮޑު އާމްދަނީއެއް ހޯދި މިއުޒިކް އާޓިސްޓުންގެ ތެރޭގައި ހިމެނޭ ފަންނާނެކެވެ. އަދި އޭނާ އަކީ އަމިއްލަ ފެޝަން ބްރޭންޑަކާއި ބިއުޓީ ލައިނެއް ހިނގާ ވިޔަފާރިވެރިއެކެވެ.
