2023 ގެ ރިޔާސީ އިންތިޚާބު ކާމިޔާބު ވުމަކީ ރައްޔިތުންގެ ޓެކްސް ފައިސާއިން ބިނާކޮށްފައި ހުރި އެސެޓްތައް ތަޅާ ބިމާ ހަމަކުރަން ޖެހޭ ސަބަބެއް ނޫންކަމަށް ވިދާޅުވެ، ރައީސް ސާލިހު ސަރުކާރުގެ ކުރީގެ ކޮމިއުނިކޭޝަން އެންޑް ސައިންސް މިނިސްޓަރ މުޙައްމަދު މަލީހު ޖަމާލަށް ޓްރޭޑް ޔޫނިއަންގެ ނާއިބު ރައީސް ސައުދުﷲ އަހުމަދު ފާޑު ވިދާޅު ވެއްޖެއެވެ.
ޕީޕީއެމްގެ ކޮމަންޑޫ ދާއިރާގެ ކެނޑިޑޭޓު މޫސާ ފަތުހީ އާދަމަށް ކެމްޕޭން ކޮށްދިނުމަށް ށ. ފޯކައިދޫގައި ރޭ ބޭއްވި ޖަލްސާގައި ވާހަކަ ދައްކަވަމުން މަލީހު ޖަމާލު ވިދާޅުވެފައިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދިރިއުޅުއްވުމަށް ޚާއްސަކޮށްފައިވާ މުރައިދޫގެ އަށް ކުރަމުންދާ ޚަރަދުތަކަކީ، އިސްރާފު ބޮޑު ބޭކާރު ޚަރަދުތަކެއް ކަމަށާއި، ޕީޕީއެމްގެ ވެރިކަމުގައި މުރައިދޫގެ ތަޅާލާނެކަމަށެވެ.
ކޮމަންޑޫ ދާއިރާގެ ފަތުޚީ ކެމްޕެއިންގައި ރޭ ފޯކައިދޫގައި ބޭއްވި ޖަލްސާގައި ވާހަކަ ދައްކަވަމުން މަލީހު އިތުރަށް ވިދާޅުވީ، މިސަރުކާރުން ކުރަމުންދަނީ މުޅިން ބޭކާރު އިސްރާފު ބޮޑު ޚަރަދުތައް ކަމަށެވެ. ރައްޔިތުންގެ ޓެކެސް ފައިސާއިން އިންތިހާއަށް ހޭދަކޮށް، ހިންގަމުންދާ ޚަރަދުތަކަކީ ރައްޔިތުންނަށް އެކަމުން ބޮޑެތި ގެއްލުންތައް ކުރާ ހޭދަތަކެއްކަމަށެވެ.
މަލީހު ޖަމާލުގެ ވާހަކައަށް ރައްދު ދެއްވަމުން ސައުދު ކުރެއްވި ޓުވީޓެއްގައި ވިދާޅުވެފައިވަނީ، 2023 ގެ ރިޔާސީ އިންތިޚާބު ކާމިޔާބު ވުމަކީ ރައްޔިތުންގެ ޓެކްސް ފައިސާއިން ބިނާކޮށްފައި ހުރި އެސެޓްތައް ތަޅާ ބިމާ ހަމަކުރަން ޖެހޭ ސަބަބެއް ނޫންކަމަށާއި، ސަރުކާރުގެ މުދަލަކީ ދިވެހި ރައްޔިތުންގެ މުދާ ކަމުގައެވެ. އަދި މަލީހު ދެއްކެވި ވާހަކައާމެދު އެއްފަހަރު ވިސްވާފަ ރައްޔިތުންގެ ކިބައިން މާފަށް އެދެން ޖެހޭކަމުގައިވެސް ސައުދުގެ ޓުވީޓުގައި ވިދާޅުވެފައިވެއެވެ.
ރައިސް ސާލިހުގެ ސަރުކާރުގެ ފުރަތަމަ ކޮމިއުނިކޭޝަން އެންޑް ސައިންސް މިނިސްޓަރ މުޙައްމަދު މަލީހު ޖަމާލަކީ ރައީސް ޔާމިންގެ ސަރުގައި ޔޫތު މިނިސްޓަރުކަން ކުރެއްވުމަށްފަހު މަގާމުން ދުރުކުރުމާއެކު ރައީސް ޔާމީނަށް ވަރަށް ބޮޑަށް ފާޑު ވިދާޅުވަމުން ގެންދެވި ބޭފުޅެކެވެ. އަދި ރައީސް ޔާމިންގެ ވެރިކަން ނިމުމަކަށް ގެނައުމަށްޓަކާވެސް އިސްކޮށް މަސައްކަތް ކުރައްވާފައިވާ ބޭފުޅެއްވެސްމެއެވެ.
އޭގެ ފަހުން މަލީހު ޖަމާޅު އުޅުއްވާފައިވަނީ ޖުމުހޫރީ ޕާޓީގައެވެ. އެހެންނަމެވެސް މިސަރުކާރުގެ ވަޒީރުކަމުން ވަކި ކުރެވުމާއެކު މަލިހު ޖަމާލް ވަނީ ޕީޕީއެމްއަށް ސޮއި ކުރައްވާ ރައީސް ޔާމިން މިނިވަން ކުރުމަށް ގޮވާލައްވަން ފައްޓަވާފައެވެ.
