ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދިރިއުޅުއްވުމަށް ޚާއްސަކޮށްފައިވާ މުރައިދޫގެ އަށް ކުރަމުންދާ ޚަރަދުތަކަކީ، އިސްރާފު ބޮޑު ބޭކާރު ޚަރަދުތަކެއް ކަމަށާއި، ޕީޕީއެމްގެ ވެރިކަމުގައި މުރައިދޫގެ ތަޅާލާނެކަމަށް ކުރީގެ ކޮމިއުނިކޭޝަން އެންޑް ސައިންސް މިނިސްޓަރ މުޙައްމަދު މަލީހު ޖަމާލް ވިދާޅުވެއްޖެއެވެ.
ކޮމަންޑޫ ދާއިރާގެ ފަތުޚީ ކެމްޕެއިންގައި މިރޭ ފޯކައިދޫގައި ބޭއްވި ޖަލްސާގައި ވާހަކަ ދައްކަވަމުން މަލީހު ވިދާޅުވީ، މިސަރުކާރުން ކުރަމުންދަނީ މުޅިން ބޭކާރު އިސްރާފު ބޮޑު ޚަރަދުތައް ކަމަށެވެ. ރައްޔިތުންގެ ޓެކެސް ފައިސާއިން އިންތިހާއަށް ހޭދަކޮށް، ހިންގަމުންދާ ޚަރަދުތަކަކީ ރައްޔިތުންނަށް އެކަމުން ބޮޑެތި ގެއްލުންތައް ކުރާ ހޭދަތަކެއްކަމަށެވެ.
މިސަރުކާރުން ކުރިހާވެސް ކަމަކީ އަވަށްޓެރިންނަށް ބަދަލު ދިނުމާއި، ގާތްތިމާގެ މީހުންނަށް ވަޒީފާ ދިނުމާއި، ތިމާމެންގެ ޖާހާއި ލައްޒަތު މަތި ކުރުންކަމަށެވެ. މިމަސައްކަތުގެ ތެރެއިން ކުރީގެ ރައީސް އަދި ރައީސް ޞާލިހުގެ އެކުވެރިޔާ ރައީސް ނަޝީދު ދިރިއުޅުއްވަން ދައުލަތުން ބޮޑު ބަޖެޓެއް ކަނޑައަޅައި، ހޭދަކުރަމުންދަނީ ރައްޔިތުން ނިކަމެތި ކުރުމަށް ކަމަށެވެ.
ޕީޕީއެމްއެމްގެ ވެރިކަމެއްގައި އެގެއަކީ ތަޅާލާނެ ގެެއެއްކަމަށާއި، ރައްޔިތުންގެ މާލިއްޔާއިން ޕީޕީއެމްއިން ބޭކާރު އިސްރާފު ޚަރަދު ނުކުރާނެކަމަށެވެ. އަދި އެފައިސާއިން ކުރާނެ ޚަރަދަކީ ދިވެހި ރައްޔިތުންގެ ތަރައްޤީއާއި ކުރިމަގަށް ކުރާ ހޭދަތަކަށް ކަމުގައި މަލީހު ވިދާޅުވިއެވެ.
ބޮމުގެ ހަމަލާއާއި ގުޅިގެން ރައީސް ނަޝީދަށް ބޭނުންވާ ސިއްހީ ފަރުވާ ޖަރުމަނާއި އިނގިރޭސިވިލާތުން ހޯއްދެވުމަށާއި އެމަނިކުފާނު ހޮޓެލް ޖެންގައި ހުންނެވުމަށް ދައުލަތުން ވަނީ 2.4 މިލިއަން ރުފިޔާ ހަރަދު ކޮށްފައެވެ. ރައްޔިތުންގެ މަޖިލީހުގެ ރައީސާއި އުއްތަމަ ފަނޑިޔާރަށް ސަލާމަތާއި ރައްކަތެރިކަން ކަށަވަރުކޮށްދިނުމަށްޓަކައި އެދެބޭފުޅުންނަށް ރަސްމީ ގެކޮޅާއެކު ޚަރަދުތައް ބެލެހެއްޓުމަށް 12 މިލިޔަން ރުފިޔާ މިއަހަރުގެ ބަޖެޓުގައި ވަނީ ހިމަނާފައެވެ.
ބަޖެޓުގައި މަޖިލީހުގެ ރައީސްގެ ގެކޮޅުގެ ހަރަދަށް 6.8 މިލިއަން ރުފިޔާ ހިމަނާފައިވެއެވެ. މީގެ ތެރޭގައި ހިމެނެނީ ބިއުރޯ ހިދުމަތްތަކަށް، 1،293،136 ރުފިޔާ، ކޯޕަރޭޓް ހިދުމަތްތައް 3،210،812 ރުފިޔާގެ އިތުރުން، ހައުސްހޯލްޑް ހިދުމަތްތައް 2،357،668 ރުފިޔާއެވެ.
ކޮމެންޓު ފޮނުވާ