ހިކި ކެއްސުމަކީ، އެއްވެސް އަރިދަފުހެއް ނުއުފެދޭއިރު ކެއްސާ ކެއްސުމެވެ. ބައެއް ފަހަރަށް ރޯގާ ޖެހި ރަނގަޅު ވުމުން ވެސް މިގޮތަށް ކެއްސައެވެ. އަދި ކޯވިޑްޖެހުމުން ވެސް ކުރީކޮޅު މިފަދައިން ކެއްސައެއެވެ. އަދި ބައެއް ފަހަރު ކެއްސާ ވަރުން ނުނިދިގެން އުޅެން ޖެހޭފަހަރުވެސް މަދެއް ނޫނެއެވެ.
މި ކެއްސުމުގެ ސަބަބުން ވަރަށް ބޮޑަށް މީހާ ވަރުބަލި ކޮށްލާ އުޅެން އުދަގޫވާ ހާލަތަށްވެސް ދެއެވެ. އެގޮތުން އެއްވެސް ޑޮކްޓަރީ ބޭހަކާ ނުލައި ހިކި ކެއްސުމުން ފަރުވާ ހޯދުމަށް ގޭގައި ބޭނުން ކުރެވިދާނެ 3 ބާވަތެއް ހިއްސާ ކޮށްލާނަމެވެ.
މާމުއި
މާމުޔަކީ އެންޓި-ބެކްޓީރިއަލް އަދި އެންޓި-ފަންގަލް މާއްދާތަކުން މުއްސަނދި އެއްޗެކެވެ. މާމުއި ބޭނުން ކުރުމުން ކަރުގައި ހުންނަ ޖަރާސީމުތައް ނައްތާލައެވެ. ހޫނު ފެންތަށްޓަކަށް ދެ މޭޒުމަތީ ސަމުސާ މާމުއި އަޅާފައި އެއްކޮށްލުމަށްފަހު، މި ބުއިން ކޮންމެދުވަހަކު ދެފަހަރު ބުއިމުން ކެއްސުން ވަރަށް އަވަހަށް ފިލާނެއެވެ. މިއީ ބައެއް މީހުންނަށް ކެއްސުމަށް ވަރަށް ބޮޑު ފަރުވާއެކެވެ.
އިނގުރު
އިނގުރަކީ ވަރަށް ގިނަ، އާންމު ބަލިތަކަށް ފަރުވާއެކެވެ. އޭގެތެރޭގައި ހިކި ކެއްސުންވެސް ހިމެނެއެވެ. އިނގުރާއި ކަރަންފޫ އަޅައިގެން ހޫނު ސައިތަށްޓެއް ތައްޔާރުކޮށްފައި ކޮންމެ ހެނދުނަކާއި ރޭގަނޑު ނިދުމުގެ ކުރިން މި ބުއިމުން، ބޭނުންކުރުމުން ކަރުތެރެ ސާފުކޮށްދޭނެއެވެ. އަދި ވަރަށް އަވަހަށް ކެއްސުން ހުއްޓޭނެއެވެ.
ހޫނުފެން
ތާފަނާ ފެނަށް އެއް މޭޒުމަތީ ސަމުސާގެ ލޮނު އަޅާފައި ކޮންމެ ދުވަހަކު 3 ފަހަރު މި ފެނުން ކަރުތެރެ ދޮވެލާށެވެ. މި ފަރުވާއިން ކުއްލިއަކަށް ކެއްސުން ހުއްޓުމަކަށް ނަޔަސް، ކަރުތެރޭގައި އުފެދިފައި ހުންނަ ބެކްޓީރިއާތައް ނައްތާލަދޭނެއެވެ. އަދި ކެއްސުންވެސް މަޑުމަޑުން ހަމައަކަށް އެޅޭނެއެވެ. ކަރުތެރެ މަދުވެގެން 20 ސިކުންތު ވަންދެން ދޮވެލަން ވާނެއެވެ.
