ކްލަބް ވެލެންސިއާގެ ހެޑް ކޯޗަކަށް އަހުމަދު މުޖުތަބާ (ފެސްކޯ) ހަމަޖައްސައިފިއެވެ.
ހުސްވެފައިވާ ވެލެންސިއާގެ ކޯޗުގެ މަގާމަށް ފެސްކޯ ހަމަޖައްސާފައިވަނީ އެ މަގާމު ހުސްވެފައި އޮންނަތާ ގާތް ގަނޑަކަށް ދެ މަސް ދުވަސް ވާންކައިރިވެފައިވަނިކޮށެވެ. އެންމެ ފަހުން އެ ޓީމުގެ ކޯޗަކަށް ހުރީ މުހައްމަދު އާތިފްއެވެ. ނަމަވެސް އާތިފް ވަނީ މިދިޔަ ޑިސެމްބަރ މަހުގެ ތެރޭގައި ވެލެންސިއާގެކޯޗުގެ މަގާމުން އިސްތިއުފާ ދީފައެވެ.
ކޯޗެއް ނެތުމުން ނިމިގެން ދިޔަ ޕްރެޒިޑެންޓްސް ކަޕްގައި ކްލަބް ވެލެންސިއާ އަށް އިރުޝާދު ދިނީ އެސިސްޓަންޓް ކޯޗު އިސްމާއިލް އާސިފް (ކުޑަހީނާ) އެވެ. ކުޑަހީނާގެ ކޯޗު ކަމުގެ ދަށުން ވެލެންސިއާ އިން ވަނީ ނިމުނު ޕްރެޒިޑެންޓްސް ކަޕްގެ ޗެމްޕިއަންކަން ހޯދާފައެވެ.
ވެލެންސިއާގެ ހެޑް ކޯޗަކަށް ފެސްކޯ ހަމަޖެއްސީ އޭއެފްސީ ކުލަބް ލައިސަންސިން ގެ ގަވާއިދުގައި ބުނާގޮތަށް އޭއެފްސީ އޭ ލައިސަންސް ކޯޗަކަށް ފުރުސަތުދިނުމުގެ ގޮތުންނެވެ. މިވަގުތު އެސިސްޓަންޓަކަށް ހުރި ކުޑަހީނާ އަތުގައި އޮތީ ބީ ލައިސަންސެވެ.
މީގެކުރިން 2003 ވަނަ އަހަރުވެސް ފެސްކޯ ވެލެންސިއާގެ ކޯޗެއްގެ ގޮތުގައި މަސައްކަތް ކޮށްފައިވާ އިރު، އެންމެފަހުން ވެލެންސިއާ ކޯޗެއްގެ ގޮތުގައި އޭނާފެނުނީ 2017 ވަނަ އަހަރުއެވެ.
ވެލެންސިއާ އިން މި ފަހަރު އޭއެފްސީ ކަޕްގެ ކޮލިފައިންގައި ވާދަކުރާއިރު، ފެސްކޯގެ އިރުޝާދުގެ ދަށުން ވެލެންސިއާ އިން ފުރަތަމަ ނުކުންނާނީފެބުރުވަރީ ހަ ވަނަ ދުވަހު ފަށަން ތާވަލުކޮށްފައިވާ ދިވެހި ޕްރިމިއާ ލީގަށެވެ.
