ރާއްޖޭގައި ކޯވިޑްގެ ހާލަތު އެންމެ ގޯސްވެފައިވާ މިހާލަތުގައި ކޯވިޑުގެ ހައި ރިސްކު ބޭފުޅުންގެ ތެެރޭގައި ހިމެނި ވަޑައިގަންނަވާ ޖުމްހޫރީ ޕާޓީގެ ލީޑަރު ޤާސިމް އިބްރާހިމް މާދަމާ ކޮމަންޑޫ ދާއިރާއަށް ވަޑައިގެންނެވުމަށް ހަމަޖެހިއްޖެއެވެ.

ޤާސިމް ކޮމަންޑޫ ދާއިރާގެ އެމްޑީޕީގެ ކެނޑިޑޭޓުގެ ކެމްޕެއިނަށް މާދަމަ ވަޑައިގަންނަވާއިރު، އެމަނިކފާނުގެ އަރިހުގައި ޖުމްހޫރީ ޕާޓީގެ ސްލޮޓްގައި ވަޒީރުންގެ މަޖިލީހުގައި ތިއްބެވި ބައެއް ވަޒީރުންނާއި، ޖުމްހޫރީ ޕާޓީގެ އިސް ބޭފުޅުންގެ މައްޗަށް އެކުލެވޭ ޓީމެއް ވަޑައިގަތުމަށް ވަނީ ހަމަޖެހިފައެވެ.

2020 ވަނަ އަހަރުނެ ފެށިގެން 2021 ވަނަ އަހަރުގެ އޮގަސްޓް މަހާއި ހަމަޔަށް ޤާސިމް ހުންނެވީ މަޖިލީހަށް ވަޑައިގެން ރިސޯޓުގައެވެ. ޤާސިމް މަޖިލީހަށް ހާޒިރު ނުވަނީ ރާއްޖޭގައި ކޯވިޑްގެ ހާލަތު އޮތް ގޮތުން، އެމަނިކުފާނަކީ އެންމެ ހައިރިސްކު ލެވެލްގެ ބޭފުޅަކަށް ވުމުންކަމަށް އާއިލާއިންވަނީ ވިދާޅުވެފައެވެ. ޤާސިމްއަކީ އެމުއްދަތުގައި މަޖިލީހަށް އެންމެ ގިނައިން ސަލާމް ވިދާޅުވި ބޭފުޅާކަމަށް މަޖިލީހުގެ ރައީސް މުހައްމަދު ނަޝީދު ވަނީ ވިދާޅުވެފައެވެ.

ކޮމަންޑޫ ދާއިރާގެ ކެމްޕެއިން ފޯރި ގަދަވެފައިވާއިރު، ކޮންމެ އަގެއް ދައްކައިގެންވެސް މިގޮޑި ސަރުކާރުގެ ކެނޑިޑޭޓް ރާޝިދަށް އިންތިޚާބު ކާމިޔާބު ކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އިންތިޚާބުގެ ކެނޑިޑޭޓުންގެ ނަންބަރު ތަރުތީބު ކުރި ހިސާބުން ފެށިގެން މިހާތަނަށް ސަރުކާރުގެ އިސް ވަފުދުތައް ކޮމަންޑޫ ދާއިރާގައި ނޫޅޭ އެންމެ ދުވަހެއްވެސް ނުދެއެވެ.

ކޮމަންޑޫ ދާއިރާގައި ކުއްލިއަކަށް ބޮޑެތި ޕްރޮޖެކްޓްތަކާއި، ތަރައްޤީގެ އެތައްކަމެއް ފެށައިގެން ކުރިއަށްދާއިރު، ސަރުކާރުން ބުނަމުންދަނީ މިއީ އިންތިޚާބަށް ނުފޫޒު ފޯރުވުންކަމަށް ވިދާޅުވި ނަމަވެސް މިމަސައްކަތް ހުއްޓުވޭނެ ގޮތެއް ނެތްކަމަށެވެ. ކޮމަންޑޫ ދާއިރާގައި މިހާ ގިނަ ޕްރޮޖެކްޓްތައް ފެށިގެން ދިޔަނަމަވެސް ސަރުކާރަށް ގޮޑި ކަށަވަރު ކުރުމަށް އަދިވެސް ދަނީ ގިނަ މަސައްކަތްތަކެއް ކުރަމުންނެވެ.

ޖުމްހޫރީ ޕާޓީގެ އިތުރުން ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީންވެސް ވަނީ އެމްޑީޕީގެ ކެނޑިޑޭޓަށް ތާއީދު ކުރުމަށް ނިންމާފައެވެ. ނަމަވެސް އެމްއާރުއެމްއިން އެމްޑީޕީގެ ކެނޑިޑޭޓަށް ތާއީދު ނުކުރަން ވަނީ ނިންމާފައެވެ.