ކޯވިޑް-19ގެ ހާލަތާއި ގުޅިގެން ޖުމްހޫރީ ޕާޓީގެ ލީޑަރު ޤާސިމް އިބްރާހިމަކީ ހައިސްކު ބޭފުޅެއްކަމަށް ވިދާޅުވެ ދޮޅު އަހަރު ދުވަހު މަޖިލީހަށް ވަޑައިގެން ދެއްކެވި ވާހަތަކަށް މޯލްޑިވްސް ނޭޝަނަލް ޕާޓީ އެމްއެންޕީގެ ނައިބް ރައީސް ޝިދާތާ ޝަރީފް ރައްދު ދެއްވައިފިއެވެ.
ދޮޅު އަހަރުގެ ތެރޭގައި މަޖިލީހުގެ ޖަލްސާތަކަށާއި، ކޮމެޓީތަކަށް ވަޑައިނުގެން ހުންނެވުމަށްފަހު ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ޤާސިމް އިބްރާހިމް ޖަލްސާތަކުގައި ބައިވެރިވާ ފެށީ މިދިޔަ އަހަރުގެ އޮގަސްޓު މަހުގެ ތެރޭގައެވެ. ޤާސިމް މަޖިލީހަށް ހާޒިރުނުވި ސަބަބާއި ގުޅޭގޮތުން ވިދާޅުވީ، އެމަނިކުފާނަކީ ކޯވިޑްގެ ހައިރިސްކު މީހަކަށްވުމުން، މަޖިލީހަށް ވަޑައިތުމަށް އުޒުރު ވެރިވީކަމަށެވެ.
ޤާސިމް މަޖިލީހަށް ދޮޅުއަހަރެއްހާ ދުވަހު ކޯވިޑާއި ގުޅިގެން ވަަޑައި ނުގެންނެވުނު ނަމަވެސް ރާއްޖޭގައި އަނެއްކާވެސް ކޯވިޑްގެ ހާލަތު އެންމެ ބޮޑަށް ގޯސްވެފައިވާ ދަނޑިވަޅެއްގައި ކޮމަންޑޫ ދާއިރާގެ ކެމްޕެއިނަށް ވަޑައިގަތުމަށް ޤާސިމްވަނީ ނިންމަވާފައެވެ.
މިކަމަށް އިޝާރާތް ކުރައްވާ ޝިދާ ވިދާޅުވީ ޤާސިމަކީ ހައިރިސްކު ބޭފުޅަކަށް ވުމުން މަޖިލީހަށް ވަޑައިގެން ޖަލްސާތަކުގައި ބައިވެރި ނުވެވުނު ކަމަށެވެ. ނަމަވެސް ކޯވިޑްގެ ހާލަތު އެންމެ ގޯސްވީ ދަނޑިވަލު ބަލައި ކެމްޕެއިނަށް ކޮމަންޑޫ ދާއިރާއަށް ވަޑައިގަންނަވަން ނިންމެވުމުން އެމަނިކުފާނުގެ އިޚްލާސްތެރި ނިޔަތާއިމެދު ރައްޔިތުން ސުވާލު އުފައްދާ ކަމަށެވެ. އަދި ޤާސިމުގެ މިފަދަ ކަންކަމުގެ ސަބަބުން ރައްޔިތުންނަށް އިޚްލާސްތެރިވެވޭނެ މިންވަރާއިމެދުވެސް ޝިދާތާ ވަނީ ސުވާލު އުފައްދާފައެވެ.
ދެ އަހަރު ވީ ކޯވިޑްގެ ހާލަތާއި ގުޅިގެން ހައި ރިސްކު ބޭފުޅެއްވީމަ މަޖިލީހަށް ވަޑައިނުގަންނަވާ މުސާރަ ނަންގަވާތާ. ކޯވިޑްގެ ހާލަތު އެންމެ ގޯސްވި ދަނޑިވަޅު ބަލާ މިހާރު ކެމްޕެއިނަށް. ރައްޔިތުންނަށް އިޚުލާސްތެރި މަނިކުފާނަށް ވެވޭނީ ތިހާވާރަށް.
– ޝިދާތާ ވިދާޅުވިއެވެ.
ޤާސިމް ކޮމަންޑޫ ދާއިރާއަށް ވަޑައިގަތުމަށް ހަމަޖެހިފައިވަނީ މާދަމާގެ ވަގުތެއްގައެވެ. ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީން ވަނީ ކޮމަންޑޫ ދާއިރާގެ އިންތިހާބުގައި އެ ޕާޓީން ތާއީދުކުރާނީ އެމްޑީޕީގެ ކެންޑިޑޭޓް ރާޝިދަށް ކަމަށް ކުރިން ނިންމާ އެކަން އިއުލާންކޮށްފައެވެ.
ޖުމްހޫރީ ޕާޓީގެ އިތުރުން ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީންވެސް ވަނީ އެމްޑީޕީގެ ކެނޑިޑޭޓަށް ތާއީދު ކުރުމަށް ނިންމާފައެވެ. ނަމަވެސް އެމްއާރުއެމްއިން އެމްޑީޕީގެ ކެނޑިޑޭޓަށް ތާއީދު ނުކުރަން ވަނީ ނިންމާފައެވެ.
One Response
ޝިދާތާބުނީ ވަރަށް ރަނގަޅު ވާހަކައެއް ކުރީގަ ޤާސިމަކީ ރައްޔިތުންގެ ބޮޑު ތާއިދެއް އޮތްބޭފުޅެއް ނަމަވެސް ވަދެވުނު ބައިގަނޑުގެ ސަބަބުން ޤާސިމްގެ ހަނދާން ރައްޔިތުންގެ ހިތުން ގެއްލިއްޖެ. އަދި ނަޝީދު ބުނާނެ. މިހާރަކު ޤާސިމެއްނެތޭ އެޝެހެން ޝާހެއް ޤަދަރެއް ނެތޭ މިއަދަކު ޤާސިމެއްނެތޭ މިވާހަކަ ބުނާނެ ދުވަސް މާދުރަކުނެތް