ޔަމަނުގެ ހޫތީންނާއި ދެކޮޅަށް ސައުދީން އިސްވެ އެކުލަވާލާފައިވާ ކޯލިޝަނުން ޔަމުނުގެ ސާދާ ސިޓީއަށް ދިން ވައިގެ ހަމަލާގައި 70 މީހުން މަރުވުމާއި ގުޅިގެން މިހަމަލާ ކުށްވެރިކޮށް އަދި ތަހުގީގު ކުރުމަށް ޔޫއެންގެ ސެކެޓްރީ ޖެނެރަލް އެންޓޯނިއޯ ގުޓަރޭސް ގޮވާލައްވައިފިއެވެ.
"ސެކެޓްރީ ޖެނެރަލް ވަނީ، ޒިންމާދާރު ކުރުވެވޭނެ ފަދަ ގޮތަކަށް، މިހަމަލާގެ ދެފުށްފެންނަ ތަހުގީގެއް މިހާރުން މިހާރަށް ހިންގުމަށް ގޮވާލައްވާފަ،" އެންޓީނިއޯ ގުޓަރޭސްގެ ތަރުޖަމާން ސްޓެފަން ޑުޖަރިކް ވިދާޅުވެފައި ވެއެވެ.
ޔަމަނުގެ ސާދާ ސިޓީގައި ހިޖުރަ ކުރާ މީހުން ބޭތިއްބުމަށް ހަދާފައިވާ މި ޑިޓެންޝަން ސެންޓަރވަނީ ހުކުރު ދުވަހުން ފެށިގެން ބަންދު ކޮށްފައެވެ. ޔަމަނުގައި ހަރަކާތްތެރިވާ ރެޑް ކްރޮސްގެ ތަރުޖަމާން ބަޝީރު އުމަރު ވިދާޅުވެފައިވަނީ، މީހުން ސަލާމަތްކުރާ ފަރާތްތަކުން، މިހަމަލާއަށްފަހު އަދިވެސް ދަނީ ދިރިތިބި މީހުން ފެނޭތޯ މަސައްކަތް ކުރަމުން ކަމުގައެވެ.
އޭނާ ވިދާޅުވި ގޮތުގައި، ރެޑް ކޮރޮސްގެ ހިސާބުތަކުން ދައްކާ ގޮތުހައި މިހަމަލާގައި 100 އަށްވުރެ ގިނަ މީހުންވަނީ މަރުވެފައެވެ.
ޔަމަނުގައި ހަގުރާމަ ކުރަމުންދާ ހޫތީ ހަގުރާމަވެރިންނާއި އަދި އެގައުމުގައި ހަރަކާތްތެރިވާ އެހީދޭ ޖަމާއަތްތަކުން ހޮނިހިރު ދުވަހު ރިޕޯޓު ކޮށްފައިވާ ގޮތުގައި މި ވައިގެން ހަމަލާގައި މަރުވި މީހުންގެ އަދަދު މިހާރުވަނީ 82 އަށް އަރާފައެވެ.
ޑޮކްޓަރސް ވިތައުޓް ބޯޑަރސް (Medecins Sans Frontieres, or MSF)އިން ވަނީ މިހަލާގައި ޒަޚަމްވީ މީހުންގެ އަދަދު އެކަނިވެސް 200އަށް އަރާކަމަށް ބުނެފައެވެ. ޔަމަނުގައި ހުންނަވާ MSFގެ ހެޑް އޮފް މިޝަން އަހުމަދު މަހަތު ވިދާޅުވި ގޮތުގައި، މިހަމަލާ ދިން ތަނުގައި އަދިވެސް މަރުވެފައިވާ މީހުންގެ ހަށިތައް ތިބިކަމުގެ މައުލޫމާތުގެ އިތުރުން، މިހަމަލާއަށްފަހު އެތައް ބަޔަކު ގެއްލިފައިވާ ކަމުގެ މައުލުމާތުވެސް އެ ޖަމިއްޔާއަށްވަނީ ލިބިފައެވެ.
މިހަމަލާގެ އިތުރުން، އޭއެފްޕީ ނޫސް އޭޖެންސީން އާންމު ކޮށްފައިވާ ސެޓްލައިޓް ފޮޓޯތަކުން ފެންނަ ގޮތުގައި، މިހަފްތާގެ ހުކުރު ދުވަހު ސައުދީ ކޯލިޝަނުންވަނީ ޔަމަނުގެ މުހިންމު ޓެލެ ކޮމިއުނިކޭޝަން ސެންޓަރއަކަށް ވައިގެ ހަމަލާ ދީފައެވެ. އަދި މި ޓެލެކޮމިއުނިކޭޝަން ސެންޓަރަކީ ޔަމަނުގައި އިންޓަރނެޓްގެ ޚިދުމަތް ފޯރުކޮށް ދިނުމުގައި މުހިންމު ދައުރެއް އަދާކުރާ މަރުކަޒެކެވެ.
މި ހަމަލާތަކަށްފަހު ޔަމަނުގައި ހަގުރާމަ ކުރަމުންދާ ހޫތީ ހަގުރާމަވެރިންގެ ހެލްތު މިނިސްޓަރވަނީ ދުނިޔޭގެ ގައުމުތަކުގެ ސިއްޙީ އެހީތެރިކަމަށް އެދިފައެވެ. އަދި އޭނާވަނީ، ސައުދީ ކޯލިޝަނުން ގަސްތުގައި އާންމު ރައްޔިތުނަށް އަމާޒުކޮށް ހަމަލާ ދެމުންދާ ކަމަށް ތުހުމަތު ކޮށްފައެވެ.
