ބޮޑެތި ބާރުތަކުގެ ކުރިމަތީގައި އެއްވެސް ބިރެއް، ފަސްޖެހުމެއްނެތި މަސައްކަތް ކުރައްވަމުންދާ ހަމައެކަނި ލީޑަރަކީ ރައީސް ޔާމީން ކަމަށާއި، އެމަނިކުފާނުގެ މަސައްކަތަށް ދިވެހި ރައްޔިތުން ސެލިއުޓް ކުރުން ހައްގުކަމަށް އިދިކޮޅު ކޯލިޝަންގެ ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އިދިކޮޅު ކޯލިޝަނުން ފަތުހީގެ ކެމްޕެއިންގައި ރޭ ފޯކައިދޫގައި ބޭއްވި ޖަލްސާގައި އަބްދުއްރަހީމް ވިދާޅުވީ، ރާއްޖޭގެ މިނިވަންކަން ދިފާއުކޮށް، ޤައުމުގެ މުސްތަގުބަލަށްޓަކައި ސާބިތުކަމާއިއެކު ހުންނެވި ހަމައެކަނި ލީޑަރަކީ ރައީސް ޔާމީންކަމަށެވެ. އިންޑިއާގެ އަސްކަރީ ސިފައިން ރާއްޖޭގެ ފަސްގަނޑުގައި ތިބުމާއި ދެކޮޅު ހަދައި، މިނިވަންކަމަށް އޮތް ނުރައްކާ އިހުސާސް ކުރެވި، އެކަމާއި ދެކޮޅަށް ބޮޑެތި ބާރުތަކުގެ ކުރިމަތީގައި ކުޑަކަކޫ ނުޖަހައި، ސާބިތުވެ ހުންނެވި ހަމައެކަނި ލީޑަރަކީ ރައީސް ޔާމީންކަމަށް އަދުރޭ ވިދާޅުވިއެވެ.
އޭނާ ވިދާޅުވީ، މިއަދު ރައީސް ޔާމީނަށްޓަކައި ދިވެހި ކޮންމެ ރައްޔިތަކުވެސް ފަޚުރުވެރިވާންޖެހޭކަމަށެވެ. ނުހައްގު ހުކުމެއްގައި 2 އަހަރެއްހާ ދުވަހު ޖަލުގައި ގެންގުޅުމަށްފަހު ދޫކޮށްލުމުންވެސް އެއްވެސް ޖެހިލުމެއްނެތި އަމިއްލަ ރައްޔިތުންގެ ދިފާއުގައި "އިންޑިއާ މިލިޓަރީ އައުޓް" ކެމްޕެއިންގައި ސާބިތުވެ ނިކުންނެވި ހަމައެކަނި ލީޑަރަކީ ރައީސް ޔާމީންކަމަށެވެ.
ރައީސް ޔާމީނަށްޓަކައި، ކޮންމެ ދިވެހި ރައްޔިތަކު ފަހުރުވެރިވާންޖެހޭ. އަމިއްލަ ފުރާނަފުޅު އަތްމައްޗަށް ލައިގެން ނިކުމެ ހުންނެވީ ޤައުމުގެ ހައްގުގައި. އެމަނިކުފާނަކީ މިއަދު އަޅުގަނޑުމެން ކޮންމެ ރައްޔިތަކުވެސް ސެލިއުޓް ހައްގުވާ ބޭފުޅެއް. ޤައުމަށްޓަކައި ސާބިތުވެ ހުންނެވި އެފަދަ ދެވަނަ ބޭފުޅެއްނެތް.
– އަދުރޭ ވިދާޅުވިއެވެ.
އަދުރޭ ވިދާޅުވީ ކޮމަންޑޫ ދާއިރާގެ ބައި އިލެކްޝަނަކީވެސް ރާއްޖޭގެ މިނިވަންކަމާއި ގުޅިފައިވާ ވޯޓެއް ކަމަށެވެ. މިއިންތިޚާބުން ސަރުކާރު ބަލިކުރުމަކީ ކޮމަންޑޫ ދާއިރާގެ ރައްޔިތުން ދިވެހި ރާއްޖެ އަޅުވެތިވާން ޖާގަ ނުދޭން ތައްޔާރަށް ތިބިކަން ހާމަވާނެ ކަމެއްކަމަށެވެ.
އަދި މިއިންތިޚާބަކީ ކުރިއަށް އޮތް ރިޔާސީ އިންތިޚާބަށް އިދިކޮޅުން ވަމުންދާ ތައްޔާރީގެ ފެށުން ކަމަށާއި، 2023ގައި ރައީސް ޔާމީން ރާއްޖޭގެ ވެރިކަމަށް ގެނައުމަށް ކުރާ މަސައްކަތް މިއިންތިޚާބާއިއެކު ފެށިގެން ދާނެކަމަށެވެ.
