ކޮމަންޑޫ ދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެނޑިޑޭޓް މުޙައްމަދު ރާޝިދަށް ކެމްޕެއިން ކުރެއްވުމަށް ރައީސުލްޖުމްހޫރިއްޔާގެ ނާއިބު ފައިސަލް ނަސީމް ކޮމަންޑޫއަށް ވަޑައިގަތުމަށް ނިންމަވައިފިއެވެ.
ނާއިބު ރައީސް ކޮމަންޑޫއަށް ވަޑައިގަތުމަށް ނިންމަވާފައިވާއިރު، ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީ (ޖޭޕީ)އިންވެސް ވަނީ އެމްޑީޕީގެ ކެނޑިޑޭޓަށް ތަޢީދުކުރުމަށް ނިންމާފައެވެ. ނާއިބު ރައީސްއަކީވެސް ޖޭޕީގެ ބޭފުޅެކެވެ.
ނާއިބު ރައީސް ކޮމަންޑޫއަށް ވަޑައިގަންނަވާއިރު، އެމަނިކުފާނުގެ އަރިހުގައި ޖޭޕީއަށް ނިސްބަތްވެވަޑައިގަންނަވާ ބައެއް ވަޒީރުންވެސް ވަޑައިގަންނަވާގޮތަށް ވަނީ ނިންމާފައެވެ. ނައިބު ރައީސް އެންމެ ފުރަތަމަ މާދަމާ ހެނދުނު ވަޑައިގަންނަވާނީ ފޯކައިދުއަށެވެ. އެއަށްފަހު އެ ދާއިރާގެ މަރޮއްޓަށް ވަޑައިގެން، އެރަށުގެ ބަނދަރު ހެދުމުގެ މަސައްކަތް ފެށުމުގެ ރަސްމިއްޔާތުގައި ބައިވެރިވެވަޑައިގަންނަވާނެއެވެ. އެއަށްފަހު ކޮމަންޑޫގައި މާދަމާ ރޭ ބާއްވާ ކެމްޕެއިން ޖަލްސާގައިވެސް ބައިވެރިވެވަޑައިގަންނަވާނެއެވެ.
ރާޝިދުގެ ކެމްޕެއިން ހަރަކާތް ފެއްތެވުމަށް ރައިސުލްޖުމްހޫރިއްޔާވެސް މިދިޔަ ހުކުރު ދުވަހު ކޮމަންޑޫއަށް ވަޑައިގެންފައިވެއެވެ. އަދި ދައުލަތުގެ ވަރަށް ގިނަ ވަޒީރުންވެސް އަންނަނީ އެދާއިރާގައި ވަރުގަދަ ކެމްޕެއިނެއް ކުރައްވަމުންނެވެ.
ކޮމަންޑޫ ދާއިރާގެ ބައި އިލެކްޝަންގެ ފޯރި ގަދަވެފައިވާއިރު، މިއިންތިޚާބުގައި އިދިކޮޅުން ވާދަކުރާ ކެނޑިޑޭޓް މޫސާ ފަތުހީގެ ކެމްޕެއިނަށް ޕީޕީއެމްގެ ރައީސް އަދި އިދިކޮޅު ލީޑަރު ރައީސް ޔާމީން އިއްޔެ ކޮމަންޑޫއަށް ވަޑައި ގަތުމަށް ވަނީ ހަމަޖެހިފައެވެ.
ސަރުކާރުގެ ކޯލިޝަންގައި ހިމެނޭ ހުރިހާ ޕާޓީއެއް އެމްޑީޕީއަށް ތާއީދު ކުރަން ނިންމާފައިވާއިރު، މިއިންތިޚާބުގައި ވާދަކުރާ އެމްއެންޕީއާއި ޕީޕީއެމުންދަނީ އެބޭފުޅުންގެ އަމިއްލަ ސިޔާސަތާއިއެކު އިތުރު ޕާޓީއެއްގެ އެހީއައި ނުލައި އިންތިޚާބުގެ މަސައްކަތް ކުރަމުންނެވެ. ކޮމަންޑޫ ދާއިރާގެ އިންތިޚާބާއި ގުޅިގެން ސަރުކާރުން ދަނީ އެދާއިރާގައި ގިނަ މަސައްކަތްތަކެއް ކުރުމަށް ރާވަމުންނެވެ.
އެގޮތުން މަތި ކޮމަންޑޫ-ކޮމަންޑޫ ގުޅާލުލާއި، މަރޮށީގެ ބަނދަރުގެ މަސައްކަތް ފެށުމާއި، ކޮމަންޑޫ ކައިރި ފަޅުރަށެއް ރިސޯޓް ތަރައްގީ ކުރުމަށް ދޫކުރުންފަދަ ކަންތައް ހިމެނެއެވެ. އަދި ކޮމަންޑޫގައި އައިސް ޕްލާންޓެއްގެ މަސައްކަތް ފެށުމަށްވެސް ވަނީ ހަމަޖެހިފައެވެ.
