މީހެއްގެ ސިއްރުތަކާއި އުނިސިފަތައް ހާމަކޮށްފިނަމަ، އޭނާ ގޭތެރޭގައި ފިލާއޮތަސް މާތް ﷲ އެމީހާ ފަޟީހަތްކުރައްވާނެކަމަށް ވިދާޅުވެ އެފަދަ އަމަލުތަކުން ދުރުހެލިވުމަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ. މިއަދު ރާއްޖޭގެ މިސްކިތްތަކުގައި ދެއްވި ހުކުރު ޚުތުބާ ޚާއްޞަކޮށްފައިވަނީ "ތިމާގެ އަޚާ ފަޟީޙަތް ކުރުމުން ދުރުހެލިވުން" މި މަޢުޟޫއަށެވެ.
މިއަދުގެ ހުކުރު ޚުޠުބާގައި އަޚްލާޤަކީ، އިސްލާމް ދީން އެކަމަށް އިސްކަން ދީފައިވާ އަސާސުތަކުގެ ތެރެއިން މަތިވެރި އަސާސްކަމަށާއި، އިންސާނަކު ކުރާ އަލުތަކުން އޭނާއަށް ވާޞިލު ނުވެވޭ ފަދަ މަޤާމުތަކަށް، އޭނާގެ ރިވެތި އަޚްލާޤުގެ ސަބަބުން ވާޞިލު ވެވޭކަން ކީރިތި ރަސޫލާވެސް ބަޔާންކޮށްދެއްވާފައިވާކަމަށް ވިދާޅުވިއެވެ.
މާތް ﷲ ރުއްސުން ލެއްވި އާއިޝަތުގެފާނުގެ އަރިހުން ރިވާވެގެން ވެއެވެ. ރަސޫލާ ގެ ޙަދީޘް ކުރެއްވި އަޑުފުޅު ތިމަން ކަމަނާ އެއްސެވީމެވެ. "ހަމަކަށަވަރުން މުއުމިނާއަށް އޭނާގެ ރިވެތި ޚުލްޤުގެ ސަބަބުން، ރޭ އަޅުކަންކުރާ ރޯދަވެރިޔާގެ ދަރަޖައާ ހަމައަށް ވާޞިލުވެވެއެވެ.
– ހުކުރު ޚުޠުބާ
ޚުޠުބާގައި ވިދާޅުވީ ރިވެތި ސިފަތަކާއި، މާތް އަޚްލާޤުގެ ތެރޭގައި އެހެން މީހުންގެ ޢައިބުތަކާއި، އުނި ސިފަތައް ފޮރުވައި ވަންހަނާކުރުން ވާކަމަށެވެ. އަދި ﷲ އަކީ، އެކަލާނގެ އަޅުތަކުންނަށް، ކުރެވޭ ނުބައި
ޢަމަލުތައް ވަންހަނާކޮށްދެއްވާ ރަސްކަލާނގެކަން ބަޔާންކުރައްވާ ޚުޠުބާގައިވަނީ އިސްލާމް ދީން، މުސްލިމުންނަށް އެމީހުންގެ ޢައުރަ ނިވާކުރުމަށާއި، އެހެން މީހުންގެ ސިއްރުތައް ރައްކައުތެރިކޮށް ސިއްރުކޮށްދިނުމަށް ގޮވައިލާކަމަށް ބަޔާންކުރައްވާފައެވެ.
ﷲ ގެ އަޅުތަކުން ފަޟީޙަތްނުކޮށް، އެމީހުންގެ ނުބައި ޢަމަލުތައް ވަންހަނާކޮށްދޭ މީހަކީ، ﷲ ދެކެ ބިރުގަންނަ، އާޚިރަތް ދުވަހުގެ ރައްކައުތެރިކަމަށް އެދޭ މީހާކަމަށާއި، މީސްމީޑިއާގެ ވަސީލަތްތައް ބޭނުންކޮށްގެން،
ޚަބަރުތަކާއި، ފޮޓޯތަކާއި، ވީޑިއޯތައް ފަތުރަން ފަސޭހަ މިފަދަ ޒަމާނެއްގައި، މުސްލިމުން މި ކަމަށް ވަރަށް ބޮޑަށް ސަމާލުކަން ދޭންޖެހޭނެކަމަށް ޚުޠުބާގައި ވިދާޅުވިއެވެ.
އަތުގައި އޮންނަ މޯބައިލް ފޯނުގެ ޛަރީޢާއިން، މީހުންނަށް ނޭނގޭގޮތަށް، ތަންތަނާއި، މަންޒަރުތަކާއި އަޑުތައް ރެކޯޑްކޮށް، ފިތައިލާ ފިތަކުން އެ ސިއްރުތައް ޢާއްމުކޮށްލާ ހިނދު، އެފަދަ ކަންކަން ކުރާ ކޮންމެ މީހަކުވެސް، ދީނުގައި އައިސްފައިވާ ވަޢީދުތަކާ މެދު ވިސްނައިލާން ޖެހޭނެއެވެ. ﷲ ވަޙީ ކުރައްވާފައި ވެއެވެ. "ހަމަކަށަވަރުން، އީމާންވި މީހުންގެ ތެރޭގައި ހުތުރުކަންބޮޑު ފާފައިގެ ވާހަކައާއި، ޢަމަލު، ފެތުރިގެންދިއުމަށް ލޯބިކުރާމީހުން ވެއެވެ. އެމީހުންނަށް ދުނިޔެއާއި، އާޚިރަތުގައި ވޭންދެނިވި ޢަޛާބު ހުށްޓެވެ. ﷲ ދެނެވޮޑިގެންވެއެވެ. އަދި ތިޔަބައިމީހުންނަކަށް ނޭނގެތެވެ."
– ހުކުރު ޚުޠުބާ
ޚުޠުބާގައިވަނީ ފާހިޝް ޢަމަލުތައް ބޭޒާރުކޮށް ފަތުރާ މީހުންނަށް ހުރި އަޒާބުގެ ބޮޑުކަން ހާމަކުރައްވާ އެކަންކަމުން ދުރުހެލިވުމަށް ގޮވާލައްވާފައެވެ.
