އެމެރިކާއާއި އަދި މުޅި ދުނިޔެވެސް ވަނީ، ޚުދުމުޚްތާރުކަމާއި ޑިމޮކްރަސީއައި ދެމެދު ކުރެވެމުންދާ ހަގުރާމައެއްގައި ކަމަށް، އެމެރިކާގެ ރައީސް ޖޯ ބައިޑްން ވިދާލުވެއްޖެއެވެ.
ބައިޑްން މިހެން ވިދާޅުވެފައިވަނީ، 2021ވަނަ އަހަރުގެ ޖެނުއަރީމަހުގެ 6 ވަނަ ދުވަހު އެމެރިކާގެ ގާނޫނު ހަދާ މަޖިލިހަށް، އޭރުގެ ރައީސް ޑޮނަލްޑް ޓްރަމްޕްގެ ސަޕޯޓަރުން ދިން ހަމަލާއަށް އެއް އަހަރުފުރުން ފާހަގަ ކުރުމުގެ ގޮތުން، "ގޯޑްސް ޓްރުތު" (ކަނލާގެ ދެއްކެވި ހަގީގަތް) މިނަމުގައި އޭނާ ގައުމާ މުޚާތަބު ކުރައްވާ ދެއްވި ތަގުރީރުގައެވެ.
އެމެރިކާގެ އޭރުގެ ރައީސް ޑޮނަލްޑް ޓްރަމްޕްގެ ވެރިކަން ނިމެމުން ދަނިކޮށް، ޓްރަމްޕް ހިތްވަރު ދެއްވައިގެން އޭނާއަށް ތާއީދުކުރާ ފަރާތްތަކުން، 2021ވަނަ އަހަރުގެ ޖެނުއަރީމަހުގެ 6 ވަނަ ދުވަހު އެމެރިކާގެ ގާނޫނުހަދާ މަޖިލިހަށް ދިން ހަމަލާ ވެގެން ގޮސްފައިވަނީ، ފަހުގެ ތާރީޚެއްގެ އެމެރިކާގެ ޑިމޮކްރަސީއަށް ކުރިމަތިވެގެން ދިޔަ އެންމެ ބޮޑު ގޮންޖެހުމުގެ އިތުރުން، އެމެރިކާގެ ގާނޫނު ހަދާ މަޖިލިސް، ކޮންގްރެސްއަށްވެސް ބޮޑެތި ބަދަލުތަކެއް ގެނުވި ހާދިސާއަކަށެވެ.
މިހާދިސާއަށް އެއް އަހަރުފުރުން ފާހަގަ ކުރުމުގެ ގޮތުގައި ބައިޑްން ދެއްވި ތަގްރީރުގައި އޭނާވަނީ ކުރީގެ ރައީސް ޑޮނަލްޑް ޓްރަމްޕްއަށާއި އޭނާގެ ސަޕޯޓަރުންނަށް ވަރަށް ބޮޑަށް ފާޑުވިދާޅުވެ ވާހަކަފުޅު ދައްކަވާފައެވެ.
"ރައީސަކު ހަމައެކަނި އިންތިޚާބަކުން ބަލިވެގެން ދިޔައީއެއް ނޫން، އެމެރިކާގެ ތާރީޚުގައި ފުރަތަމަފަހަރަށް، އެމެރިކާގެ ގާނުނުހަދާ މަޖިލީހަށް ގޭންގް ހަމަލާތައް ދީ، ސުލްހަވެރިކަމާއެކ، ދައުރު ބަދަލުވެގެން ދިޔަ ނުދިނުމަށް ރައީސަކު މިވަނީ މަސައްކަތް ކޮށްފަ،" ބައިޑްން ވިދާޅުވިއެވެ. "އެހެންނަމަވެސް އެމީހުން މިވަނީ ބަލިވެގެން ގޮސްފަ."
"އަހަރެން މި ފުރުސަތެއް ނުދޭނަން،" އަޑަށް ބާރު ލައްވަމުން ބައިޑްން ވިދާޅުވެފައި ވެއެވެ.
"ހަމަލާ ދިނީ ޑިމޮކްރަސީއަށް،" ގާނޫނުހަދާ މަޖިލިސް ކެޕިޓަހިލްގައި ހުންނަވައިގެން ވާހަކަ ދައްކަވަމުން ބައިޑްން ވިދާޅުވެފައި ވެއެވެ. "އަހަރެމެން ރައްޔިތުން ދުލެއް ނުދޭނަން. އަދި އަހަރެމެން ކާމިޔާބުވެސް ކުރާނަން."
ބައިޑްންއާއި، ޑިމޮކްރަޓިކް ޕާޓީއަށް ނިސްބަތްވާ ކޮންގްރެސްގެ މެމްބަރުން، ދުވަސް އެންމެ ފުރަތަމަ ފާހަގަ ކޮށްފައިވަނީ، ކެޕިޓަލް ހިލް އިމާރާތުގައި ހުންނަ ސްޓޭޗުއަރީ ހޯލްގައި ތިއްބަވައިގެންނެވެ. މިއީ، އޭރު ގާނޫނުހަދާ މަޖިލިހުގައި، އިލެކްޓޯރަލް ވޯޓު ގުނަމުންދިޔަ ޖަލްސާއަށް ހުރަސް އެޅުމަށްޓަކާ، ޓްރަމްޕްގެ ސަޕޯޓަރުން އިމާރާތަށް ވަންނަން ފެށި ދިމާތަކުގެ ތެރެއިން އެއް ދިމާލެވެ.
ބައިޑްންގެ ވާހަކަފުޅުގައި އޭނާވަނީ، 2020ގެ އިންތިޚާބުގައި އޭނާއަށް ކާމިޔާބު ލިބުނުކަން ގަބޫލު ނުކޮށް، ރިޕަބްލިކަން ޕާޓީގެ ބައެއް މެމްބަރުން އަދިވެސް ކަމުގެ ހަގީގަތް އޮޅުވާލުމަށް ކުރަމުންދާ މަސައްކަތްތަކަށާއި، އިންތިޚާބުގައި ކަން ހިގައިދިޔަ ގޮތުގެ މައްޗަށްވެސް ބައްލަވާ ލައްވާފައެވެ.
"ތިބޭފުޅުންނަށާއި، އަހަރެންވެސް، އަދި މުޅި ދުނިޔެވެސް ވަނީ ކަމުގެ ހަގީގަތް ދެކެފަ،" ބައިޑްން ވިދާޅުވިއެވެ.
"މިއީ 2021ވަނަ އަހަރުގެ ޖެނުއަރީމަހުގެ 6 ވަނަ ދުވަހު ކަލާނގެ ދެއްކެވި ހަގީގަތް،" ބައިޑްން ވިދާޅުވިއެވެ. "އެމީހުންގެ މަގްސަދަކަށްވީ، ގާނޫނު އަސާސީ މުގުރާލުން."
"ކަމުގެ ދެތު ދޮގު އަހަރުމެން ކޮންމެ މީހަކަށްވެސް ވަރަށް ރަގަޅަށް ސާފުވާންވާނެ، ހަގީގަތަކީ މިއީ،" ބައިޑްން ވިދާޅުވިއެވެ. "އެމެރިކާގެ ކުރީގެ ރައީސް ވަނީ 2020ވަނަ އަހަރުގެ އިންތިޚާބާ ގުޅޭގޮތުން ގުނާ އަދަދު ނުކުރެވޭހާ ގިނަ ދޮގުތައް ހަދާފަ."
