ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ގުޅޭގޮތުން ރައްޔިތުންގެ އިއްތިހާދުން ހުށަހެޅި މައްސަލަ ނުބަލަން ފުލުހުންގެ އިދާރާއިން ނިންމައިފިއެވެ.
ފުލުހުންގެ މީޑިއާ އޮފިޝަލް މިރޭ ވިދާޅުވީ ޖަމިއްޔަތުލް އިއްތިހާދުގެ ނަމުގައި ދިވެހި ފުލުހުންގެ ހިދުމަތަށް ހުށަހަަޅާފައިވާ ސިޓީގައި ބަޔާންކޮށްފައިވާ ކަންތައްތައް ބެލިބެލުމުން ޖިނާއީ ތަހުގީގެއް ހިންގަން ޖެހޭފަދަކަމެއް ފާހަގަކުރެވިފައި ނުވާ ކަމަށެވެ. އެހެންކަމުން އެސިޓީގައި ބަޔާންކޮށްފައިވާ ކަންކަމާ ގުޅިގެން ތަހުގީގެއް ކުރިއަށް ނުގެންދާ ކަމަށް އޮފިޝަލް ވިދާޅުވިއެވެ.
އެ މައްސަލަ ހުށަހަޅާފައި ވަނީ ރަޖިސްޓްރީކޮށްގެން ހިންގާ ޖަމްއިއްޔާއަކުން ކަމުގައިނުވާތީ، އެ މައްސަލައާ މެދު ނިންމިގޮތް އެފަރާތަށް އަންގާފައިނުވާނެ ކަމަށް ވެސް އޮފިޝަލް ވިދާޅުވިއެވެ.
"އަދި އެސިޓީއާމެދު މިހިދުމަތުން އަމަލުކޮށްފައިވާނީ މިހިދުމަތާ ހިއްސާކުރާ މައުލޫމާތުތަކާމެދު އަމަލުކުރަމުންދާ އުސޫލުންކަމުގައި ދަންނަވަން،" އޮފިޝަލް ވިދާޅުވިއެވެ.
އިސްލާމްދީނާއި ހިލާފަށް ރާއްޖޭގައި ބައެއް ފަރާތްތަކުން ހިންގާ ކަންކަމަކީ ފުލުހުން ވަރަށް އިސްކަމެއްދީގެން ތަހުގީގުކުރަމުންދާ އަދި މުސްތަގުބަލުގައިވެސް ތަހުގީގުކުރާނެ މައްސަލަތަކެެއްކަމަށް ވެސް އޮފިޝަލް ވިދާޅުވިއެވެ.
"ނަމަވެސް އެސިޓީގައި ފާހަގަކޮށްފައިވަނީ މިފަދަ ކަމެއްގެ މައުލޫމާތެއް ނޫންކަންވެސް ފާހަގަކުރަން،" އޮފިޝަލް ވިދާޅުވިއެވެ.
ރައްޔިތުންގެ އިއްތިހާދުން ފުލުހުންނަށް ހުށަހެޅީ 2020 ވަނަ އަހަރު ރައީސް ނަޝީދު ކްރިސްމަސްގެ ތަހުނިޔާ ފާޅުގައި ދިވެހީންނަށް ފޮނުވާފައިވާ މައްސަލައެވެ. އަދި މިދިޔަ އަހަރު ވެސް އަނެއްކާ ކްރިސްމަސްގެ ތަހުނިޔާ ކިޔުން ތަކުރާރުކޮށް ފޮޓޯ އާންމުކޮށްފައިވާ ކަމަށް އެ މައްސަލާގައިވެއެވެ.
One Response
ރެޖިސްޓޤރީ ނުކޮށް ހިންގާ ބަޔަކު ހުށަހެޅި މައްސަލައެއް ބަލައުގަނެވެންޔާ އޭގެ ޖަވާބު ވެސް ދެވެންވާނެ ބޯގޯސް