2024 ވަނަ އަހަރުގެ މިހާތަނަށް މަސްތުވާތަކެތި އެތެރެކުރުމުގެ މައްސަލަތަކުގައި ދަޢުވާކުރެވިފައިވާ މިންވަރު 2023 ވަނަ އަހަރާ އަޅާބަލާއިރު 112.5 އިންސައްތަ އިތުރުވެފައިވާ ކަމަށް ޕްރޮސިކިއުޓަރ ޖެނެރަލް އައްބާސް ޝަރީފް ވިދާޅުވެއްޖެއެވެ.
އައްބާސް ޝަރީފް މިހެން ވިދާޅުވެފައިވަނީ އެމެރިކާގެ ޑިޕާޓްމަންޓް އޮފް ޖަސްޓިސްގެ އޮފީސް އޮފް އޯވަރސީސް ޕްރޮސިކިއުޓޯރިއަލް ޑިވަލޮޕްމަންޓް އެސިސްޓެންސް އެންޑް ޓްރެއިނިނިގް (އޯޕީޑީއޭޓީ) އިން ކްރޮސްރޯޑްސްގައި ބޭއްވި "ސައުތް އޭޝިއާ ރީޖަނަލް ކައުންޓަރ ނާކޮޓިކްސް ޓްރެފިކިންގ ޕްރޮގްރާމް" ފައްޓަވައިދެއްވުމުގެ ރަސްމިއްޔާތުގައެވެ. އޭނާ ވިދާޅުވިގޮތުގައި މިހާރު ހުށަހެޅިފައިވާ ގިނަ މައްސަލަތަކަކީ ވައިގެ މަގުން ދިވެހިރާއްޖެއަށް މަސްތުވާތަކެތި އެތެރެކުރުމުގެ މައްސަލަތަކެވެ.
ޕްރޮސިކިއުޓަރ ޖެނެރަލް އިތުރަށް ހާމަކުރެއްވި ގޮތުގައި މިއަހަރުގެ މިހާތަނަށް މަސްތުވާތަކެތި އެތެރެކުރުމުގެ 17 ދަޢުވާއާއި މަސްތުވާތަކެތި ޓްރެފިކްކުރުމުގެ 190 ދަޢުވާ ކޯޓަށް ހުށަހަޅާފައިވެއެވެ. މިއީ 2023 ވަނަ އަހަރުގެ އޮކްޓޫބަރު މަހުގެ ނިޔަލަށް ބަލާއިރު މަސްތުވާތަކެތި އެތެރެކުރުމުގެ މައްސަލަތަކުގައި 112.5 އިންސައްތައިގެ އިތުރުވުމަކާއި، ޓްރެފިކްކުރުމުގެ މައްސަލަތަކުގައި 14 އިންސައްތައިގެ އިތުރުވުމެކެވެ.
މި ތަފާސްހިސާބުތަކުން ދައްކުވައިދެނީ ޤާނޫނު ތަންފީޛުކުރާ އިދާރާތަކުން މަސްތުވާތަކެތި ހިފެހެއްޓުމުގެ މަސައްކަތް އިތުރުވެފައިވާކަމެވެ. މިކަމަށްޓަކައި ޕްރޮސިކިއުޓަރ ޖެނެރަލް ވަނީ ދިވެހި ފުލުހުންގެ ޚިދުމަތާއި މޯލްޑިވްސް ކަސްޓަމްސް ސަރވިސްއާއި އެހެނިހެން ކަމާބެހޭ އިދާރާތަކަށް މަރުޙަބާ ދަންނަވާފައެވެ.
މި ތަމްރީނު ޕްރޮގްރާމްގައި ދިވެހިރާއްޖޭގެ އިތުރުން ނޭޕާލް، ސްރީ ލަންކާ އަދި ބަނގްލަދޭޝްގެ ޕްރޮސިކިއުޓަރުން، އިންވެސްޓިގޭޓަރުން އަދި އެނަލިސްޓުން ބައިވެރިވެ، އެކި ޤައުމުތަކުން މަސްތުވާތަކެއްޗާ ދެކޮޅަށް އަޅާފައިވާ ފިޔަވަޅުތަކާއި ބައިނަލްއަޤްވާމީ އެންމެ ރަނގަޅު އުސޫލުތަކާ ބެހޭ ތަމްރީނުތައް ހިންގިފައިވެއެވެ.
