ކުރީގެ ރައީސް މުހައްމަދު ނަޝީދުގެ ވެރިކަމުގައި ހުޅުމާލެއިން ފްލެޓާއި ގޯތި ބެހި ގޮތުގެ ތަފްސީލް ހާމަކުރަންވަން ކެރޭނެތޯ އެމްޑީޕީގެ ކުރީގެ ޗެއާޕާސަން މޫސާ މަނިކު އެމްޑީޕީގެ ރައީސް މުހައްމަދު ނަޝީދާއި ސުވާލު ކުރައްވައިފިއެވެ.
މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ނުލިބި އުޅެނިކޮށް، ކުއްލި ގޮތަށް ހުޅުމާލެއިން ބިން ވިއްކުމަށް ސަރުކާރުން ނިންމި ނިންމުމާއި ދެކޮޅަށް އެމްޑީޕީގެ ރައީސް މުހައްމަދު ނަޝީދު ނިކުންނަވައި ދައްކަވަމުންދާ ވާހަކަތަކާއި ގުޅިގެން މޫސަ ވިދާޅުވީ މާލޭ ރައްޔިތުންނަށް މާ ހެޔޮއެދޭ ބަޔަކަށް ވެގެން ވާހަކަ ދައްކަވާ ބޭފުޅުން މާޒީގައި ކަންކަން ކުރައްވާފައިވާ ގޮތް ހާމަކޮށްފިނަމަ މިބޭފުޅުން މާލޭ ރައްޔިތުންނާއި މެދު އަމަލުކޮށްފައިވާ ގޮތް ހާމަވާނެކަމަށެވެ.
ވެރިކަންކުރާ އެމްޑީޕީގެ ރައީސްގެ ވެރިކަމުގައި ހުޅުމާލޭން ފުލެޓާ ގޯތި ބެހިއިރު ބެހިގޮތުގެ ތަފްސީލެއް ހާމަކޮށްލަބައްލަވާ؟ މިއަދުގެ މާލޭގެމޭޔަރުގެ ވަޒީރުކަމުގަ ފުލެޓް ބެހިމީހުންގެ ތަފްސީލުވެސް ހާމަކުރީމަ މިވެރިން މާލެ ރައްޔަތުންނަށް ކުރާއިހްތިރާމް އެނގޭނެ! ސިޔާސީމަޅި.
– މޫސަ ވިދާޅުވިއެވެ.
މޫސަ ވިދާޅުވީ، ނިމިދިޔަ ވެރިކަން ތަކުގައި އެތަކެއް ފްލެޓަކާއި، ބިންތައް ބަހައި ހުސްކުރަމުންދިޔައިރު، މާލޭ ރައްޔިތުންނަށް އޭގެ ތެރެއިން ލިބުނީ ކިތައް ފްލެޓާއި، ކިތައް ބިންތޯ މިއަދު ސުވާލު ކޮށްލުން ރަނގަޅު ކަމަށެވެ.
ވޭތުވި ސަރުކާރުތަކުންވެސް ހާހުން ސަތޭކައިން ފުލެޓް އަޅާފަ ބަހާ ހުސްކުރިއިރު މާލެ އުފަން ރައްޔަތުންނަށް ލިބެނީ ހާހަކުން ދިހަފުލެޓު؟ މިކަން ހުއްޓަންވެއްޖެ. މިކަމުންވެސް އައުޓްވާން ވެއްޖެނު.
– މޫސަ ވިދާޅުވިއެވެ.
މިދިޔަ ހަފްތާގައި މާލޭގެ ރައްޔިތުންނާއި ބައްދަލު ކުރައްވައި ނަޝީދު ވަނީ މާލޭގައި ދިރިއުޅޭ ރައްޔިތުންގެ ތެރެއިން ދަތި ހާލުގައިތިބި މީހުންނަށް ގޯތި ކަނޑާފައި ދޭންޖެހޭކަމަށެވެ. އެދި އެސިޔާސަތަށް ސަރުކާރުން އަމަލު ކުރުމަކީ މުހިންމު ކަމެއްކަމަށް ނަޝީދު ވަނީ ވިދާޅުވެފައެވެ.
ނަޝީދު މިގޮތަށް ވާހަކަ ދައްކަވާފައި ވަނިކޮށް އެޗްޑީސީން ވަނީ 1603.07 އަކަފޫޓުގައި 2633.93 އަކަ ފޫޓާ ދެމެދުގެ 60 ބިން ވިއްކުމަށް ބީލަމަށް ހުށަހެޅުމުގެ ފުރުސަތު ހުޅުވާލާފައެވެ. ބިންތައް ވިއްކަން ނިންމާފައިވަނީ ހުޅުމާލޭގެ އަތިރިމަތީ "ބީޗް ފްރޮންޓު" ސަރަހައްދުންނާއި އަދި އަތިރިމަތި ކައިރިން "ބީޗު ސައިޑު" ނެވެ. މީގެ ތެރެއިން "ބީޗް ފްރޮންޓު" ސަރަހައްދަށް ބީލަށް ފޯމް އަންނަ ފެބްރުއަރީ ހައެއްގެ ކުރިން ހުށަހަޅަން ޖެހޭއިރު "ބީޗު ސައިޑު" އަށް ބީލަން ފޯމް ހުށަހެޅުމުގެ ފުރުސަތު ފެބްރުއަރީ 16އާ ހަމައަށް ވަނީ ހުޅުވާލައިފަ އެވެ.
މިކަމާއި ވަރަށް ބޮޑަށް ދެކޮޅު ހައްދަވައި މިވަގުތު އިނގިރޭސި ވިލާތުގައި ނުރަސްމީ ދަތުރުފުޅެއްގައި ހުންނެވި ރައީސް ނަޝީދު ވިދާޅުވީ މާލޭ ސަރަހައްދުގައި ދިރިއުޅޭ ރައްޔިތުންނަށް ގޯތި ނުލިބި އެހެން ބަޔަކަށް ގޯތި ލިބޭނެހެން ސިޔާސަތު ކަނޑައެޅުމަކީ ބަލައި ގަނެވޭނެ ކަމެއްނޫންކަމަށެވެ.
