މިދިޔަ އޮކްޓޫބަރ މަހު ރާއްޖޭގެ އެކި ރަށްރަށަށް 41000އަށްވުރެ ގިނަ ބަސްތާގެ ކާޑު ފޮނުވާފައިވާކަމަށް އެސްޓީއޯއިން ބުނެފިއެވެ.
ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯއިން އާންމުކޮށްފައިވާ ތަފާސްހިސާބުތައް ދައްކާގޮތުން މިދިޔަ މަހު އެކި ރަށްރަށުން 506 އޯޑަރު ލިބިފައިވާއިރު އެ ރަށްތަކަށް 41757 ބަސްތާގެ ކާޑު ވަނީ ފޮނުވާފައެވެ. އެއީ 18458 ބަސްތާ ހަނޑުލާއި، 5868 ބަސްތާ ހަކުރާއި، 17431 ބަސްތާ ފުށް ކަމަށް އެސްޓީއޯއިން މަޢުލޫމާތުދެއެވެ.
މީގެ އިތުރުން މާލޭގެ އެކިއެކި ފިހާރަތަކުން ލިބިފައިވާ 2052 އޯޑަރަކަށް 19079 ބަސްތާ ހަނޑުލާއި، 4756 ބަސްތާ ހަކުރާއި، 10748 ބަސްތާ ފުށް ދޫކޮށްފައިވާކަމަށްވެސް އެސްޓީއޯއިން މަޢުލޫމާތުދެއެވެ.
The supply of staples for October 2020. pic.twitter.com/BzNoSwqzre
— STO Plc (@stoplc) November 4, 2020
ކޯވިޑް-19ގެ ޙާލަތާއި ގުޅިގެން ދިމާވެފައިވާ ދަތިތަކާއިއެކުވެސް ރަށްރަށުގައި ކާޑުގެ ބާވަތްތައް ހުސްނުވެ ލިބޭނެ އިންތިޒާމްތައް ހަމަޖެއްސުމުގެ ގޮތުން އެސްޓީއޯއިން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ކާޑުގެ ބާވަތްތައް މަލޭގެ ސުޕަރމާކެޓްތަކަށާއި، ފިހާރަތަކުގެ އިތުރުން، ރަށްރަށަށް މުދާ އުފުލާ އޮޑިދޯނިފަހަރާ ހަމައަށް ގެންގޮސްދިނުމުގެ ޚިދުމަތްވެސް އެސްޓީއޯއިން ދަނީ ފޯރުކޮށްދެމުންނެވެ. މީގެ އިތުރުން އެސްޓީއޯގެ އޮންލައިން ޕޯޓަލް އީސްޓޯ މެދުވެރިކޮށް އޮންލައިންކޮށް ގަންނަ ތަކެތި ޑެލިވަރީކޮށްދިނުމުގެ ޚިދުމަތްވެސް އެ ކުންފުނިން ދަނީ ފޯރުކޮށްދެމުންނެވެ.
