ބަންގްލަދޭޝްއިން ދިވެހިރާއަށް 4 ދާއިރާއަކުން އެހީތެރިކަން ދިނުމުގެ ފަހުމުނާމާތަކުގައި ސޮއިކޮށްފިއެވެ. ފަހުމުނާމާގައި ސޮއިކޮށް، އެކަމުގެ ލިޔުން ހަވާލުކުރުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުއާއި ކެބިނެޓް މެންބަރުންނާއި ބަންގްލަދޭޝް ސަރުކާރުގެ އިސްވެރިން ބައިވެރިވެ ވަޑައިގެންނެވިއެވެ.
ދެ ޤައުމުގެ ދެމެދުގައި ޤާއިމުކުރި 4 ފަހުމުނާމާގެ ތެރެއިން އެންމެ މުހިންމު ފަހުމުނާމާއަކީ ރާއްޖޭގެ ސިއްޙީ ދާއިރާއަށް ބޭނުންވާ ޕްރޮފެޝަނުން ހޯދުމާއި ތަމްރީން ކުރުމުގައި އެހީތެރިކަން ފޯރުކޮށްދިނުމަށް ޤާއިމުކުރި އެއްބަސްވުމެވެ. ރާއްޖޭގެ ސިއްޙީ ދާއިރާއަށް ބަލާއިރު ގިނަ އަދަދެއްގެ ދިވެހި ޑޮކްޓަރުންނާ ޕްރޮފެޝަނަލުންނަކީ، ބަންގްލަދޭޝްއިން ތަމްރީންވެ ރާއްޖެއަށް ޚިދުމަތްކުރަމުންދާ ފަރާތްތަކެވެ. ޚާއްސަކޮށް މި ކުރިމަތިވި ކޯވިޑްގެ ޙާލާތާ ގުޅިގެން ސިއްޙީގޮތުން ރާއްޖެއަށް ބޭނުންވި އިމަރޖެންސީ އެހީތެރިކަން ފޯރުކޮށްދިން ޤައުމުތަކުގެ ތެރޭގައިވެސް ބަންގްލަދޭޝް ހިމެނެއެވެ. އެ ޤައުމުން ރާއްޖެއަށްވަނީ ޑޮކްޓަރުންގެ ޓީމެއް ފޮނުވާފައެވެ.
ރައީސް އޮފީހުގައި ބޭއްވެވި ރަސްމިއްޔާތުގައިވަނީ ބަންގްލަދޭޝްއާ ދިވެހިރާއްޖޭގެ ގާތް ގުޅުން ރަމްޒުކޮށްދިނުމަށް، ރާއްޖޭގެ އަސްކަރިއްޔާއަށް ބަންގްލަދޭޝްއިން ހަދިޔާކުރާ އަސްކަރީ އުޅަނދުތައް ރަމްޒީކޮށް ހަވާލުކުރުން ކުރިއަށްގެންގޮސްފައިއެވެ. މިއީ ރާއްޖޭގެ ސަލާމަތާއި ރައްކާތެރިކަން ހަރުދަނާކުރުމަށް ޤައުމީ ދިފާއީ ބާރުން ކުރައްވާ މަސައްކަތަށް އެހީތެރިވުމަށް ހަދިޔާކުރި އުޅަނދުތަކެވެ.
ބަންގްލަދޭޝްއާ ރާއްޖެއާ ދެމެދުވަނީ ވިޔަފާރީގެ ދާއިރާއިން ޓެކްސްއާ ގުޅޭ އެއްބަސްވުމެއްގައިވެސް ސޮއިކޮށްފައެވެ. މި ފަހުމުނާމާގެ ތެރެއިން ޑަބަލް ޓެކްސޭޝަން ހުއްޓުވުމާ، ޓެކްސްއަށް މަކަރުހެދުމާ ވަގު ވިޔަފާރިތައް ހުއްޓުވުމަށް ދެ ޤައުމު ގުޅިގެން މަސައްކަތްކުރުމަށްވަނީ އެއްބަސްވެފައެވެ.
އަދި މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަމަންޓާއެކުވަނީ، ކުޅިވަރާ ޒުވާނުންގެ ތަރައްޤީއަށް އެކި ދާއިރާތަކުން މަސައްކަތްކުރެއްވުމުގެ އެއްބަސްވުމެއްވެސް ޤާއިމުކޮށްފައެވެ. މި އެއްބަސްވުމުގެދަށުން ކުޅިވަރުގެ ދާއިރާއިން ބޭނުންވާ ތަމްރީނާ އަދި ޒުވާނުން ބާރުވެރިކުރުމާ، ޒުވާނުންގެ ތަރައްޤީއަށް އެކިއެކި ކަންކަންރާވާ ހިންގުން ހިމެނެއެވެ.
1978ވަނަ އަހަރު ރާއްޖެއާ ބަންގްލަދޭޝްއާއެކު ދެމެދު ޚާރިޖީ ގުޅުން ޤާއިމުކުރުމަށްފަހު، އެ ޤައުމުން ރާއްޖެއަށް އަންނަނީ އެކި ގޮތްގޮތުން އެހީތެރިކަން ފޯރުކޮށްދެމުންނެވެ. ރާއްޖެއާ ބަންގްލަދޭޝްއާ ދެމެދު ޚާރިޖީ ގުޅުން ޤާއިމުކުރިތާ 43އަހަރުވަނީ ފުރިފައެވެ.
