ރައީސުލްޖުމްހުރިއްޔާ އިބުރާހިމް މުހައްމަދު ސާލިހުގެ ދަތުރުފުޅަކަށް، ބަންގްލަދޭޝްގެ ބޮޑުވަޒީރު ޝެއިޚް ހަސީނާ އިއްޔެވަނީ ރާއްޖެ ވަޑައިގެންފައެވެ.
އެކަމަނާ ރާއްޖެވަޑައިގެންފައިވަނީ އާއަހަރުގެ ޗުއްޓީއާއި ދިމާކޮށް ރާއްޖޭގެ ހަމަހިމޭން ޖައްވުގައި އައުއަހަރުގެ ޗުއްޓީ ހޭދަކޮށްލުމުގެ މަގުސަދުގައި ނަމަވެސް، ޝެއިޚް ހަސީނާގެ މި ދަތުރުފުޅަކީ އެއްގޮތަށްވުރެ ގިނަ ގޮތް ގޮތުން ރާއްޖެއަށް މުހިންމު އަދި އެހާމެ މުހިންމު ދަނޑިވަޅެއްގައި އެކަމަނާ ރާއްޖެ ކުރައްވާ ރަސްމީ ދަތުރުފުޅެއްކަން ފާހަގަ ކޮށްލަން ޖެހެއެވެ.
އަދި ރާއްޖެއަކީ ބަންގްލަދޭޝްގެ ގިނަ އަދަދެއްގެ ލޭބަރުން އަބަދުވެސް ވަޒީފާ އަދާކުރަމުންދާ ގައުމަކަށް ވެފައި، ރައްޖޭގައި ގަވާއިދާ ޚިލާފަށް ތިބެމުންދާ ލޭބަރުންގެ މައްސަލައަކީވެސް ދެގައުމުގެ ދެމެދުގައި އޮންނަ ގާތް ގުޅުމުގެ ތެރެއިން ހައްލު ހޯދަންޖެހިފައި އޮންނަ މައްސަލައަކަށްވާތީ، ބަންގަލްދޭޝްގެ ބޮޑުވަޒީރު ރާއްޖެ ވަޑައިގަތުން އަބަދުވެސް ވެގެން ގޮސްފައިވަނީ ދެގައުމުގެ މީޑިއާތަކާއި ރައްޔިތުންގެ ސަމާލުކަންވެސް އެދަތުފުޅަށް ވަރަށްވެސް ބޮޑަށް ހުއްޓިގެންދާ ދަތުރު ފުޅަކަށެވެ.
ނަތީޖާއެއްގެ ގޮތުން، ޝެއިޚް ހަސީނާގެ ރަސްމީ މިދަތުރުފުޅުގައި އެކަމަނާ ރާއްޖެ ވަޑައިގެންފައިވަނީ، ކެބިނެޓްގެ 3 ވަޒީރެއްގެ އިތުރުން މަތީ ފަންތީގެ ވަފުދަކާއެކީގައެވެ.
މުހިންމު އެއްބަސްވުންތަކެއްގައި ސޮއި ކުރައްވާނެ
ބަންގްލަދޭޝްގެ ބޮޑުވަޒީރު ޝެއިޚް ހަސީނާގެ އިއްޒަތުގައި ރަސްމީ ގާރޑް އޮފް އޮނަރއެއް އެރުވުން އޮންނާނީ މިއަދުއެވެ. އަދި އެއަށްފަހު ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު ރަސްމީކޮށް އެކަމަނާއަށް މަރުހަބާ ވިދާޅުވާނެއެވެ.
އަދި އެއަށްފަހު ދެގައުމުގެ ދެމެދުގައި ރަސްމީ ވާހަތައް ބޭއްވުމަށް ވަނީ ހަމަޖެހިފައެވެ. މިވާހަތަކުގައި ދެގައުމުގެ ދެމުދުގައި ހައްލު ހޯދަންޖެހިފައިހުރި ގިނަ މައްސަލަތަކުގެ އިތުރުން ސަރަހައްދީ ބައެއް މައްސަލަތަކާ ބެހޭގޮތުން މަޝްވަރާ ކުރުމަށްވެސް ވަނީ ހަމަޖެހިފައެވެ.
ޝެއިޚް ހަސީނާ ރާއްޖެއަށް ކުރައްވާ މި ދަތުރުފުޅުގައި މުހިންމު 4 އެއްބަސްވުމެއްގައި ސޮއި ކުރެއްވުމަށްވަނީ ހަމަޖެހިފައެވެ. މީގެތެރޭގައި ބުރާސްފަތިދުވަހު ސޮއިކުރެއްވުމަށް ހަމަޖެހިފައިވާ 2 މެމޮރެންޑަމް އޮފް އަންޑަސްޓޭންޑިންގ އެއް ހިމެނެއެވެ.
މިގޮތުން، މިދަތުރުފުޅުގައި ސޮއިކުރެއްވުމަށް ހަމަޖެހިފައިވާ 4 އެއްބަސްވުމަކީ:
- ޑަބަލް ޓެކްސޭޝަން ހުއްޓުމަކަށް ގެނައުމާއި، ޓެކްސްއާއި އާމްދަނީއާއި ގުޅުންހުރި ވަގު ވިޔަފާރި ހުއްޓުމަކަށް ގެނައުމާގުޅޭ އެއްބަސްވުން
- ގައިދީން ބަދަލުކުރުމާބެހޭ އެއްބަސްވުން
- ސިއްޙީ އެހީތެރިކަމާއި މެޑިކަލް ސައިންސްގެ ރޮގުން އެހީތެރިކަން ފޯރުކޮށް ދިނުމާއި ގުޅޭ މެމޮރެންޑަމް އޮފް އަންޑަރސްޓޭންޑިންގ (އާކުރާ އެއްބަސްވުމެއް)
- ކުޅިވަރާއި ޒުވާނުންގެ ތަރައްގީއާއި ގުޅުންހުރި ކަންކަން ކުރިއެރުވުމަށް ދެގައުމުގެ ދެމެދުގައި ސޮއިކުރާ މެމޮރެންޑަންމް އޮފް އަންޑަރސްޓޭންޑިންގ
އަދި މީގެ އިތުރުން، މަތީ ފެންންވަރުގެ ހެލްތު ޕްރޮފެޝަނަލުން ރެކްރޫޓު ކުރުމުގެ ގޮތުން ދެގައުމުގެ ދެމެދުގައި މިހާރުވެސް އަމަލް ކުރެވެމުންދާ މެމޮރެންޑަމް އޮފް އަންޑަރސްޓޭންޑިންގވެސް ޝެއިޚް ހަސީނާގެ މިދަތުރުފުޅުގައި އަލުން އާކުރުމަށްވެސް ވަނީ ހަމަޖެހިފައެވެ.
ބަންގލދޭޝްގެ ބޮޑުވަޒީރު ޝެއިޚް ހަސީނާގެ މިދަތުރުފުގެ އެންމެ ޚާއްސަ ބައެއްގެ ގޮތުގައި ފާހަގަވެގެން ދާނީ، ދެގައުމުގެ ދެމެދުގައި އޮންނަ ޒަމާންވީ އެކުވެރި ގުޅުމުގެ ރަމްޒެއްގެ ގޮތުން، ބަންލާދޭޝްއިން ރާއްޖެއަށް ހަދިޔާކުރާ އަސްކަރީ 13 އުޅަދު ރައްޖެއަށް ހަދިޔާކުރުމުވެ.
ދަގައުމުގެ ދެމެދުގައި ސޮއިކުރެވޭ އެއްބަސްވުން ތަކަށްފަހު ރައީސުލްޖުމްހޫރިއްޔާ އިބުރާހިމް މުހައްމަދު ސާލިހާއި ޝޭއިޚް ހަސީނާއާއި ދެބޭފުޅުން އެކީ ނޫސްވެރިންނާއި ބައްދަލު ކުރައްވާނެއެވެ. އަދި އެއަށްފަހު މިއަދުގެ މެންދުރު ފަހުގެ ވަގުތެއްގައި ޝެއިޚް ހަސީނާ ރައްޔިތުންގެ މަޖިލިހުގައި ތަގްރީރުކުރައްވާނެއެވެ.
ޝައިޚް ހަސީނާގެ މި ދަތުރުފުޅުގައި، އުއްތަމަ ފަނޑިޔާރާއި، ރައްޔިތުންގެ މަޖިލިހުގެ ރައީސްގެ އިތުރުން ނާއިބު ރައީސްވެސް އެކަމަނާގެ އަރިހަށް އިހުތިރާމްގެ ޒިޔާރަތެއް ކުރައްވާނައެވެ.
ޝައިޚް ހަސީނާއަކީ ކާކު؟
ބަންގްލަދޭޝްގެ މިހާރުގެ ބޮޑުވަޒީރު ޝެއިޚް ހަސީނާ ގެންދަވަނީ 2009ވަނަ އަހަރުނެ ފެށިގެން ބަންގްލަދޭޝްގެ ބޮޑުވަޒީރުކަން ކުރައްވަމުންނެވެ. އޭނާވަނީ 1996 އިން 2001ވަނަ އަހަރާހަމަށްވެސް އެގައުމުގެ ބޮޑުވަޒީރުކަން ކުރައްވާފައެވެ.
ދެފަހަރެއްގެ މަތިން ޖުމްލަ 17 އަހަރު އެގައުމުގެ ބޮޑުވަޒީރުކަން ކުރައްވާ، އޭނާ ވެވަޑައިގެންފައިވަނީ ބަންގްލަދޭޝްގެ ތާރީޚުގައި އެގައުމުގެ ބޮޑުވަޒީރުކަން އެންމެ ދިގުމުއްދަތަކަށް ކުރައްވާފައިވާ ބޭފުޅާކަމުގައެވެ. އަދި މިއަހަރުގެ ޑިސެމްބަރުމަހަށްފަހު އެކަމަނާ ވެވަޑައިގެންފައިވަނީ، ދުނިޔޭގެ ގައުމުތަކުގެ ވެރިކަމުގައި މިހާރު ތިއްބެވި ލީޑަރުންގެ ތެރެއިން އެންމެ ދިގު މުއްދަތަކަށް ގައުމެއްގެ ވެރިކަން ކުރައްވަމުން ގެންދަވާ އަންހެން ލީޑަރު ކަމުގައިވެސް މެއެވެ.
ޝެއިޚް ހަސީނާއަކީ، ބަންގްލަދޭޝްގެ ފުރަތަމަ ރައީސް އަދި އެގައުމުގެ މިނިވަންކަމުގެ ބާނީ ޝެއިޚް މުޖީބުއްރަހުމާންގެ 5 ދަރިންގެ ތެރެއިން އެންމެ ދޮށީ ދަރިފުޅެވެ.
ޝެއިޚް ހަސީނާގެ ބައްޕާފުޅު، ޝެއިޚް މުޖީބުއްރަހުމާން އަވަހާރަ ކޮށްލާފައިވަނީ، އެގައުމުގެ ސިފައިންގެ ތެރޭގައި ގެނެވުނު ބަޢާވާތެއްގައި 1975ވަނަ އަހަރުގެ އޮގަސްޓުމަހުގެ 15ވަނަ ދުވަހުއެވެ.
އޭނާ އަވަހާރަ ކޮށްލާފައިވަނީ ސިފައިންގެ ޑިވިޝަނަކުން އޭނާ ދިރިއުޅުއްވަމުން ގެންދެވި ގެކޮޅަށްވަދެ، އިސްތިއުފާ ދިނުމަށް އަންގާ އިސްތިއުފާ ދެއްވުމަށް ދެކޮޅު ހެއްދެވުމާއިއެކުއެވެ.
މުޖީބުއްރަހުމާން އަވަހާރަ ކޮށްލުމަށް އޭނާގެ ގެއަށް ވަތް ސިފައިން އޭނާއަށް އިސްތިއުފާދިނުމަށް ފުރުސަތު ދިނުމުން، އޭނާ އެގައުމުގެ މިލިޓަރީ ޗީފް އިންޓެލިޖެންސަށް ގުޅުއްވާ އެގެއަށް ވަޑައިގަތުމަށް އެދިވަޑައިގަތެވެ. އަދި މިލިޓަރީ ޗީފް އިންޓެލިޖެންސް ކާނަލް ޖަލީލުއްދީން އަހުމަދު މުޖީބުއްރަހުމާން ގެކޮޅަށް ވަޑައިގެން، އެ ގެކޮޅުގައި ތިބި ސިފައިންނަށް ބެރިކޭޑްތަކަށް އެބުރި ދިއުމަށް އަމުރު ކުރެއްވިއެވެ. އެހެންނަމަވެސް، ސިފައިން އޭނާ މަރާލާ، އަދި މުޖީބުއްރަހުމާން އިސްތިއުފާ ދެއްވުމަށް ދެކޮޅު ހެއްދެވުމާއެކު އެނާވެސް އަވަހާރަ ކޮށްލިއެވެ.
އެއަށްފަހު، އޭނާގެ އަބިކަބަލުންނާއި، ހަގު ދަރިކަލުންނާއި، ދެވަނަ ދަރިކަލުންނާއި، 10 އަހަރުގެ ދަރިކަލުންނާއި، ދެ ދަނބި ދަރިކަލުންނާއި މުޖީބުގެ ކޮއްކޮއާއި، އަދި މުޖީބުއްރަހުމާންގެ ގޭގައި މަސައްކަތް ކުރައްވަމުން ގެންދެވި އެތައް މުވައްޒަފުންނަށް އެދުވަހު މަރާލާފައި ވެއެވެ.
މުޖީބުއްރައްހުމާން އަވަހާރަ ކޮށްލުމުގައި އިސްކޮށް އުޅުއްވި ގިނަ މީހުންގެ މައްޗަށް ފައިތުވެދިޔަ ތަނުގައިވަނީ މަރުގެ އަދަބު ތަންފީޒު ކޮށްފައެވެ. މީގެ ތެރެއިން ގިނަ މީހުންގެ މައްޗަށް މަރުގެ ހުކުމް ތަންފީޒު ކޮށްފައިވަނީ ޝެއިޚް ހަސީނާގެ ވެރިކަމުގައެވެ.
މުޖީބުއްއްރަހުމާން އަވަހާރަ ކޮށްލެވުނު އިރު ޝެއިޚް ހަސީނާ ހުންނެވީ ގައުމުން ބޭރުގައެވެ.
