އިންޑިއާ އައުޓް މޭމަތީގައި ޖައްސަވައިގެން ރައީސް ޔާމީނަށް ރާއްޖޭގެ އެކި ކަންކޮޅުތަކުގައި ނުހިނގޭނެ ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ މިއަދު ބޭއްވި މާލެ ސިޓީގެ ދާއިރާ ބައްދަލުވުމުގައި ވާހަކަ ދައްކަވަމުން ރައީސް ނަޝީދު ވިދާޅުވީ އިންޑިއާ އައުޓް ހަރަކާތަކީ ރައީސް ޔާމީނަށް އިސްކޮށް ހުންވައިގެން ހިންގޭނެ ހަރަކާތެއް ނޫންކަމަށެވެ. ރައީސް ޔާމީން އިސްކޮށް ހުންނަވައިގެން ރާއްޖޭގެ އެކި ކަންކޮޅުތަކުގައި އިންޑިއާ އައުޓް ހަރަކާތް ހިންގަމުންދަނީ ޤާނޫނާއި ޚިލާފަށް ކަމަށާއި، އެކަން ފުލުހުން ނިކުމެ ހުއްޓުވަން ޖެހޭކަމަށެވެ.
މިހަރަކާތަކީ އެއްވެސް ގޮތަކަށް ޤައުމުގެ މަސްލަހަތު އޮތްގޮތެއް ނޫންކަމަށާއި، މިކަމުން ރައީސް ޔާމީނަށްވެސް އަދި އެމަނިކުފާނުގެ ޕާޓީގެ މެމްބަރުންނަށްވެސް ވަނީ ބޮޑު ހުތުރަކަށް ކަމަށެވެ. ރާއްޖޭގެ މަސްލަހަތު ގެއްލުވާލުމަށް އެހެން ޤައުމެއް އައުޓްކަމަށް މޭމަތީގައި ޖަހައިގެން ހަރަކާތް ހިންގުމަށް ޖާގަ ދެވިގެން ނުވާނެކަމަށް ރައީސް ނަޝީދު ވިދާޅުވިއެވެ.
ކުރީގެ ރައީސްކަން ކުރެއްވި ބޭފުޅަކު އިންޑިއާ އައުޓްގެ ނަމުގައި މުޅިމޭމަތި ފުރެންދެން ޖަހައިގެން ނިކުތީމާ ހުތުރުވާނެ. އިންޑިއާ އައުޓް ނުގޮވޭނެ. އެހެން ނޮގޮވޭނެ. އެއީ ރާއްޖޭގެ މަސްލަހަތާއި ޚިލާފްކަމެއް. އެހެން ގޮވަމުން ނުހިނގޭނެ. ރައީސް ޔާމީނަށް އިންޑިއާ އައުޓް ޖަހައިގެން ނުހިނގޭނެ.
– ރައީސް ނަޝީދު ވިދާޅުވިއެވެ.
އިންޑިއާ އައުޓް ހަރަކާތް ރާއްޖޭގައި ވަރަށް ބޮޑަށް ފުޅާވެފައިވާއިރު، މިހަފްތާ ބަންދުގައިވެސް "އިންޑިއާ އައުޓް"ގެ ކެމްޕެއިން ހަރަކާތްތައް އަތޮޅު ތެރޭގައި ރައީސް ޔާމީނާއިއެކު ކުރުމަށް ވަނީ ހަމަޖެހިފައެވެ. މިހަފްތާގައި އޮތީ ފ.އަތޮޅުގެ ރަށްތަކުގައި އިންޑިއާ އައުޓް ހަރަކާތް ހިންގުމެވެ.
އިންޑިއާ މިލިއަޓަރީ އައުޓް ހަރަކާތަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދުވެސް ތާޢީދުކުރައްވާކަމަށް ރައީސް ޔާމީން ވަނީ ވިދާޅުވެފައެވެ. އިދިކޮޅުން ކުރިއަށް ގެންދާ އިންޑިއާ އައުޓް ހަރަކާތް މިހާރު ފުޅަކުރަމުން އަންނައިރު ރައީސް ޔާމީން އަތޮޅުތެރެއަށް ކުރައްވާ ދަތުރުފުޅުގައިވެސް އެ ކެމްޕެއިން ދަނީ ކުރިއަށް ގެންދަވަމުންނެވެ. އެގޮތުން މިއަދު މާލެ އަތޮޅު ތުލުސްދޫއަށް ވަޑައިގެން ވާހަކަފުޅު ދައްވަމަުން ރައީސް ޔާމީން ވަނީ އިންޑިއާ އައުޓާއި ގުޅޭގޮތުން ރައީސް ނަޝީދު މިއަދު ކުރެއްވި ޓްވީޓާއި ގުޅޭގޮތުން ވާހަކަފުޅު ދައްކަވާފައެވެ.
ރައީސް ޔާމިން ވިދާޅުވީ، އިންޑިއާ އައުޓޭ ނުކިޔުނު ނަމަވެސް އިންޑިއާ މިލިޓަރީ އައުޓޭ ކިޔުމަކީ އެމަނިކުފާނަށްވެސް މައްސަލައެއް ނޫންކަންކަމެވެ. އިންޑިއާ ސިފައިން ބޭރުކުރުމަށް ރައީސް އިބްރާހީމް މުޙައްމަދު ޞާލިޙް ތާޢީދު ނުކުރެއްވިނަމަވެސް އެ ގޮވާލުމަށް ރައީސް ނަޝީދު ތާޢީދުކުރައްވާކަމަށް ރައީސް ޔާމީން ވިދާޅުވިއެވެ.
އިންޑިއާ އައުޓެކޭ ނުޖެހޭނެ، މިއީ ރައީސް ނަޝީދު ވިދާޅުވާ ވާހަކަ! މިހެނެއް ނުބުނެވޭނެ! ބުނަން ވާނީ އިންޑިއާ މިލިޓަރީ ބޭރުވާށޭ! އެހެންވީމަ އެމަނިކުފާނު ވެސް ގަބޫލުކުރައްވާ އިންޑިއާ މިލިޓަރީ ބޭރު ވާން ޖެހޭކަން! އެއީ ނޫންތޯ އެބުނި ވާހަކައަކީ!
– ރައީސް ޢަބްދުﷲ ޔާމީން ވިދާޅުވިއެވެ.
ރައީސް ޔާމީން ވިދާޅުވީ ބަރުލަމާނީ ނިޒާމަށް ތާޢީދުކުރައްވާ ބޭފުޅުން އުޅުއްވާއިރު، ބަރުލަމާނީ ނިޒާމް ރާއްޖޭގައި ޤާއިމްކުރުމުގެ ކުރިން އިންޑިއާ އަސްކަރިއްޔާ ރާއްޖޭގައި އޮތުމާއި ގުޅޭގޮތުން ރައްޔިތުންގެ ޝުޢޫރުހުރި ގޮތް ބަލަން ވޯޓެއް ނަގަން ޖެހޭކަމަށެވެ.
އެއް ބޭފުޅަކު އެބަ މަސައްކަތް ކުރައްވާ ނޫންތޯ ބަރުލަމާނީ ނިޒާމާ މެދު ރައްޔިތުންނަށް ފެންނަނީ ކޮން ގޮތެއްތޯ ބަލަން؟ އެހެންވީމަ ބަރުލަމާނީ ނިޒާމާ އެހެން ނިޒާމަކާ މތަނަށް ގެނައުމުގެ ކުރިން އެބަ ބަލައިލަން ޖެހޭ. ރައްޔިތުންގެ ވިސްނުމާ ރައްޔިތުން ޝުއޫރު އޮތީ އިންޑިއާގެ އަސްކަރިއްޔާ މިތާ އޮތުމުގައި ކޮން ގޮތަކަށްތޯ؟ އެހެންވީމަ މި ވޯޓު ނަގަންވީ.
– ރައީސް ޢަބްދުﷲ ޔާމީން ވިދާޅުވިއެވެ.
ރައީސް ޔާމީންގެ ވާހަކަފުޅުގައި އިންޑިއާގެ އަސްކަރިއްޔާއިން ރާއްޖޭގައި ތިބުމާ ގުޅޭ ގޮތުން ރައްޔިތުން ދެކޭ ގޮތް ބެލުމަށް، ރައްޔިތުންގެ ފެންނަ ނުފެންނަ ވޯޓެއް ނަގަން ވަނީ ގޮވާލައްވާފައެވެ. ރައީސް ޔާމީން ވިދާޅުވީ އިންޑިއާއަކީ ރާއްޖޭގެ ބޭނުންތައް ފުއްދުމަށް އެހީތެރިވެދޭ ޤައުމެއް ނަމަވެސް އެއީ ރާއްޖޭގެ މިނިވަންކަމާއި ސިޔާދަތަށް ގެއްލުންވާނެ ގޮތަށް ރާއްޖޭގައި އިންޑިއާގެ އަސްކަރިއްޔާއިން ހަރަކާތްތެރިވާން ޖެހޭ ސަބަބެއް ނޫންކަމަށެވެ.
