ބަންގްލަދޭޝްގެ ބޮޑުވަޒީރު ޝައިޚް ހަސީނާ، ރާއްޖެއަށް ކުރައްވާ ދަތުރުފުޅާއި ގުޅިގެން ސަލާމަތީ ކަންކަން ވަރުގަދަ ކުރުމަށްޓަކައި ވެލާނާ އިންޓަނޭޝަނަލް އެއާޕޯޓުގެ ފަޅުތެރެއާއި މަގުތައް ވަކި ވަގުތުތަކަކަށް ބަންދުކުރަން ނިންމައިފިއެވެ.

އެމްއޭސީއެލް އިން ބުނީ، ރަސްމި ދަތުރުފުޅެއްގައި ޝައިހް ހަސީނާ ބުދަ ދުވަހު ރާއްޖެ ވަޑައިގަންނަވާތީ ވެލާނާ އިންޓަނޭޝަނަލް ޓާމިނަލްގެ އުތުރު ކަންމަތިން ފެށިގެން ކާގޯ ބިލްޑިންގް ދެކުނު ކަންމައްޗާއި ހަމައަށް ހުޅުލޭގެ އެއްގަމުގައާއި، ފަޅުތެރޭގައި ވަކި ގަޑިތަކެއްގައި އެއްވެސް ބާވަތެއްގެ އުޅަނދެއް ދުއްވުން މަނާ ވާނެ ކަމަށެވެ.

ނެރާއި މަގު ބަންދު ކުރާ ވަގުތުގައި ކަނޑު އުޅަނދުފަހަރަށް ބޭނުންކުރެވޭނީ ހަމައެކަނި ހުޅުލޭގެ އެންމެ ދެކުނުގައިވާ ނެރު ކަމަށް އެމްއޭސީއެލުން ބުނެފައިވެއެވެ. ހަމައެހެންމެ އެ ދުވަހު މެންދުރު ފަހު ދެއަކުން ހަވީރު ހަތަރަކަށް މި ސަރަހައްދުގައި އެއްވެސް ބާވަތެއްގެ އުޅަނދެއް ދުއްވުން ވެސް ވަނީ މަނާކޮށްފައެވެ.

Attention: Velana International Airport Road and Lagoon Closure for VVIP Movement. pic.twitter.com/xF4zOsqoeK

— Maldives Airports Company Ltd – MACL (@MACLmedia) December 20, 2021

އެގޮތުން އެ ދުވަހުގެ މެންދުރު 12 އިން ހަވީރު 4 އަށް އެ ސަރަހައްދުގެ ފަޅުތެރެއަށް އެއްވެސް އުޅަނދެއް ވަދެ ނުކުތުން، އަދި ފަޅުތެރޭގައި އުޅަނދު ބެއްވުން މަނާވާނެ ކަމަށް ބުނެފައި ވެއެވެ. މި ވަގުތުގައި ކަނޑު އުޅަނދުފަހަރަށް ބޭނުންކުރެވޭނީ ހަމައެކަނި ހުޅުލޭގެ އެންމެ ދެކުނުގައިވާ ނެރެވެ.

އެމްއޭސީއެލުން އިތުރަށް ބުނީ ހިނގާ ބިނގާވެ އުޅުމާއި، ދުއްވާ އެއްޗެހި ދުއްވުން މުޅިން މަނާ ވަގުތުކޮޅެއް އަންނާނެ ކަމަށާއި އެހެނިހެން ވަގުތުތަކުގައި ފުލުހުން އިރުޝާދު ދޭ ގޮތެއްގެ މަތީން އެ ސަރަހައްދުގައި ހިނގާބިނގާވެ އުޅެވޭނެ ކަމަށެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ދަޢުވަތަކަށް ބަންގްލަދޭޝްގެ ބޮޑުވަޒީރު ޝައިޚް ޙަސީނާ ދިވެހިރާއްޖެއަށް ފުރަމާނަ ދަތުރުފުޅެއް ކުރެއްވުމަށް ހަމަޖެހިފައިވަނީ މި މަހުގެ 22 އިން 23 އަށެވެ.

‎ކަމަނާގެ މި ދަތުރުފުޅުގައި ރައީސުލްޖުމްހޫރިއްޔާއާ ބައްދަލުކުރައްވައި ރަސްމީ ވާހަކަފުޅުތައް ބޭއްވެވުމަށް ވަނީ ހަމަޖެހިފައެވެ. މި ވާހަކަފުޅުތަކުގައި، ދެ ޤައުމުގެ ދެމެދުގައި އެކި ދާއިރާތަކުން އިތުރަށް ގުޅުން ބަދަހި ކުރެއްވުމާއި ބެހޭގޮތުން މަޝްވަރާކުރައްވާނެއެވެ. އަދި ދެ ޤައުމުގެ ދެމެދު އެކި ދާއިރާތަކުން ގުޅުން ބަދަހިކުރުމުގެ ގޮތުން ފަހުމުނާމާތަކެއްގައި ސޮއިކުރުމަށް ވަނީ ހަމަޖެހިފައެވެ.

މިދަތުރުފުޅުގައި ހަސީނާ މަޖިލީހުގައި ތަގުރީރު ކުރެއްވުމަށްވެސް ވަނީ ހަމަޖެހިފައެވެ. މަޖިލީހުގައި ތަގުރީރު ކުރައްވާނީ ބްރާސްފަތި ދުވަހުގެ ހަވީރު 4 ޖަހާއިރުގައެވެ.