ވެލާނާ އިންޓަރނޭޝަނަލް އެއަރޕޯޓް ހިންގާ އެމްއޭސީއެލްގެ ބޯޑު މެންބަރުކަށް، ޖުމްހޫރީ ޕާޓީގެ ލީޑަރު ޤާސިމް އިބްރާހީމްގެ ފަރިކަލުން ސިޔާދު ޤާސިމް އައްޔަންކުރައްވައިފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ބުނީ ސިޔާދު ގާސިމް އައްޔަނުކޮށްފައިވަނީ ނޮން އެގްޒެކެޓިވް މެންބަރެއްގެ ގޮތުގައިކަމަށެވެ. އެމްއޭސީއެލްގެ ބޯޑުގައި މިވަގުތު ތިއްބެވީ 6 މެންބަރުންނެވެ.
އެމްއޭސީއެލްގެ ޗެއާމަނަކީ މުހައްމަދު އުމަރު މަނިކު (އެމްޔޫ މަނިކު)އެވެ. މި ބޯޑުގައި ރައީސް ނަޝީދުގެ ވެރިކަމުގައި އެމްއޭސީއެލްގެ ޗެއަރމަންކަން ކުރެއްވި އިބްރާހީމް ނޫރައްދީންވެސް އިންނަވައެވެ.
އެމްއޭސީއެލްގެ ބޯޑަށް ސިޔާދު އައްޔަންކުރައްވާފައިވާއިރު، އެ ކުންފުނީގެ ސީއީއޯ އަދި މެނޭޖިންގް ޑިރެކްޓަރ ގޯޑަން އެންޑްރިއު ސްޓްވާޓް މަޤާމުން ދުރުކޮށްފައިވަނީ މިދިޔަ މަހުއެވެ.
މައި އެއަރޕޯޓް ހިންގާ އެމްއޭސީއެލްގެ އިސް މަޤާމުތަކަށް ބިދޭސީން އައްޔަންކުރާތީ ސަރުކާރަށް ވަނީ ބޮޑެތި ފާޑުކިޔުންތަކެއްވެސް އަމާޒުވެފައެވެ.
