ހެލްތު އިމަޖަންސީ އޮޕަރޭޝަން ސެންޓަރ (އެޗްއީއޯސީ)ގައި ޕްރޮންޓްލައިންގައި މަސައްކަތްކުރާ މުވައްޒަފުންނަށް އެލަވެންސް ނުދޭ މައްސަލާގައި ބައެއް މުވައްޒަފުން ހެލްތު މިނިސްޓްރީ ކުރިމަތީގައި އިހްތިޖާޖް ކުރަން ފަށައިފިއެވެ.
ކޮވިޑާއި ގުލިގެން ފްރަންޓްލައިންގައި މަސައްކަތްކުރާ މުވަށްޒަފުންނަށް ތިން ކެޓަގަރީއަކުން އެލަވެންސް ދިނުމަށް ސަރުކާރުން ވަނީ ނިންމާފައެވެ. އެގޮތުން ރިސްކު ބޮޑު މުވައްޒަފުންނަށް ދުވާލަކަށް 500 ރުފިޔާ، ހައި ރިސްކު މީހުންނާ ދިމާވާ ދެވަނަ ގިންތީގެ މުވައްޒަފުންނަށް ދުވާލަކަށް 250 ރުފިޔާ އަދި އެޗްއީއޯސީގައި އެހެނިހެން މަސައްކަތް ކުރާ އެންމެ ލޯ ރިސްކް މުވައްޒަފުންނަށް ދުވާލަކަށް 200 ރުފިޔާ ދޭން ނިންމާފައިވެއެވެ.
ސަރުކާރުން ދޭން ބުނި އެލަވެންސް ނުލިވޭ އެތައް ބަޔަކު އެބަތިބިކަމަށާއި، އެލަވެންސް ނުލިބޭތާއްވެސް އެތައް މަހެއް ވެފައިވާކަމަށް ބައެއް މުވައްޒަފުން ބުނެއެވެ.
ހެލްތު މިނިސްޓްރީ ޒިންމާދާރުކުރުވުމަށްކަމަށް ބުނެ ހެލްތު މިނިސްޓްރީގެ ކުރިމަތީގައި އިހްތިޖްޖްކުރަމުންދާ މީހުން ތިބީ އެލަވެންސް ދިނުމަށް ގޮވާލާ ބެނާތައްވެސް ހިފައިގެންނެވެ.
އެލަވެންސް ދިނުން ލަސްވާ މައްސަލާގައި ހެލްތު މިނިސްޓްރީން މުވައްޒަފުންނަށް ފޮނުވި މެސެޖުގައި ވަނީ އެލަވެންސް ލަސްވަނީ ޝީޓްގައި މައްސަލަތަކެއް އުޅޭތީކަމަށް ބުނެފައެވެ. ނަމަވެސް އެ މައްސަލައެއް މިނިސްޓްރިއަށް ސާފުކޮށްދެވިފައިނުވާކަމަށް އެ މުވައްޒަފުން ބުނެއެވެ.
މިކަމާއި ގުޅިގެން ހެލްތު މިނިސްޓްރީން އެއްވެސް އެއްޗެއް ބުނެފައެއް ނުވެއެވެ.
