ފާއިތިވެދިޔަ 10 ވަރަކަށް އަހަރުތެރޭ ފާސްކުރާ ފުރަތަމަ އަރަނި ބަޖެޓްގެ ގޮތުގައި، 2022 ވަނަ އަހަރުގެ ބަޖެޓް ފާސްކޮށްފައި ވާކަމަށް ސައުދީ އަރަބިއާއިން ބުނެފިއެވެ. އަދި ރައްޔިތުން ދުޅަހެޔޮކަމާއި ދިރިއުޅުމުގެ ފެންވަރު މަތި ކުރުމަށްޓަކާ މިހާރުވެސް ގެންނަމުންދާ އިގްތިސާދީ ހެޔޮ ބަދަލުތައް ކުރިޔަށް އޮތް ތަނުގައިވެސް ގެންނަމުންދާނޭ ކަމަށްވެސް އެގައުމުގެ ސަރުކާރުން ވަނީ ބުނެފައެވެ.
"ބަޖެޓުގައި ޚަރަދު ކުރުމަށް ހިމަނާފައި ވާނީ، 955 ބިލިއަން ސައުދީ ރިޔާލް (254.6 ބިލިއަން އެމެރިކާ ޑޮލަރު)، ލިބޭނެކަމަށް އަންދާޒަ ކޮށްފައިވަނީ 1.045 ޓްރިލިއަން ސައުދީ ރިޔާލް (278.6 ބިލިއަން އެމެރިކާ ޑޮލަރު)، އަދި ބަޖެޓްގެ އަރަނި މިވަނީ 90 ބިލިއަން ސައުދީ ރިޔާލް (24 ބިލިއަން އެމެރިކާ ޑޮލަރު)އަށް އަރާފަ،" ކިންގ ސަލްމާން ބިން އަބުދުލް އަޒީޒު ވިދާޅުވިކަމަށް ސައުދީ ނިއުސް އޭޖެންސީ SPA އިން ރިޕޯޓު ކޮށްފއި ވެއެވެ.
ސައުދީ އަރަބިއާގެ ވަލީ އަހުދު، މުހައްމަދު ބިން ސަލްމާން ވިދާޅުވެފައިވަނީ، "މި ބަޖެޓަކީ، އިގްތިސާދީ އިސްލާހީ ބަދަލުތަކުގެ ތެރެއިން، ހަރުދަނާ މުޖުމަތައެއް އުފައްދާ، އިގްތިސާދީ ދުޅަހެޔޮކަން ކުރިއަރުވާ އަދި ފުއްދުންތެރި އިގްތިސާދެއް ދެމެހުއްޓުމުގައި ލިބިގެންދިޔަ ވަރަށް ބޮޑު ކާމިޔާބެއް،" ކަމުގައެވެ.
ސައުދީ ނިއުސް އޭޖެންސީ SPA އިން ރިޕޯޓު ކޮށްފައިވާ ގޮތުގައި، 2020ވަނަ އަހަރުގެ ބަޖެޓް ދަރަނި ހުރި މިންގަޑު ކަމުގައިވާ ޖީޑީޕީގެ ނިސްބަތުން 11.2 އިންސައްތައާ އަޅާ ބަލާއިރު، މިއަހަރު އެމިންވަރު 2.7 އިންސައްތައަށް ދަށަށް ދާނެކަމަށްވެސް ސައުދީ ސަރުކާރުން ވަނީ ލަފާ ކޮށްފައެވެ.
"އަންނަ އަހަރު ބަޖެޓް އަރަނިވާނެ ކަމަށް ލަފާ ކުރެވިފައި ވާއިރު، މި އަދަދު ޖީޑީޕީގެ މިންގަޑުން 2.5 އިންސައްތައަށްވުރެ މަތިވެދާނެ ކަމަށްވެސް ލަފާކުރެވޭ، އަދި މި އަރަނި ބޭނުން ކުރެވޭނީ ކޯވިޑް ޕެންޑަމިކުން އަރައި ގަނެވުމަށްފަހު، ސައުދީ އަރަބިއާގެ މާލީ ތަސައްވުރު ވަރުގަދަ ކުރުމަށާއި، އަދި ކުރިޔަށް އޮތް ތަނުގައި ދުނިޔެއަށް ކުރިމަތިވާނެ ކާރިސާތަކާއި، ގޮންޖެހުންތަކާ ކުރިމަތި ލުމުގެ ގާބިލްކަން ސައުދީ އަރަބިއާގައި އިތުރު ކުރުމަށްޓަކާ، ގައުމީ ރިޒާވު ވަރުގަދަ ކުރުމަށް،" ވަލީ އަހުދު މުހައްމަދު ބިން ސަލްމާން ވިދާޅުވެފައި ވެއެވެ.
އޭނާ އިތުރަށް ވިދާޅުވި ގޮތުގައި، ސައުދީ އަރަބިއާގެ ސޯވެރިންގ ވެލްތު ފަންޑު (PIF)އިން ވަނީ 2021ވަނަ އަހަރު އެގައުމުގައި 84 ބިލިއަން ރިޔާލް (22.39 މިލިއަން ޑޮލަރު) އިންވެސްޓް ކޮށްފައެވެ. އަދި މި ފަންޑުން އަންނަ އަހަރު 150 ބިލިއަން ރިޔާލް އިންވެސްޓު ކުރުމަށް ހަމަޖެހިފައިވާ ކަމަށްވެސް އޭނާ ވިދާޅުވެފައި ވެއެވެ.
