މާދަމާރޭ ހުޅުމާލޭ ހިޔާ ފްލެޓް ހިމެނޭ ސަރަހައްދުގައި "ކޮތަރުކޮށޮ" ނަމުގައި ބޭއްވުމަށް މަސައްކަތް ކުރި ޖަލްސާއަށް ފުލުހުން މެދުވެރިކޮށް ޖަލްސާއަށް ހުރަސް އެޅުމުން މާލޭ އުސްފަސްގަނޑުގައި ޖަލްސާ ބޭއްވުމަށް ނިންމައިފިއެވެ.
އިދިކޮޅު ކޯލިޝަންގެ ލީޑަރު ރައީސް ޔާމީނާއިއެކު މާދަމާރޭ ބޭއްވުމަށް މަސައްކަތް ކުރި ޖަލްސާއަށް ސަރުކާރުން ހުރަސް އެޅުމުން، އަބްދުއްރަހީމް ވިދާޅުވީ ޖަލްސާ ބާއްވަން އެތައް ބަޔަކު ބޭނުންވާ ކަމަށާއި، ހިޔާ ފްލެޓް ސަރަހައްދުގައި ޖަލްސާ ނުބޭއްވުނު ނަމަވެސް ޖަލްސާ މާދަމާރޭ 9:00ގައި ހިޔާ ފްލެޓް ހިމެނޭ ސަރަހައްދުގައި އޮންނާނެކަމަށެވެ.
ޕީޕީއެމްއިން ޖަލްސާ މާލެއަށް ބަދަލު ކުރީ އެއްވެސް ހާލެއްގައި ގަދަކަމުން ފުލުހުންނާއި ކުރިމަތިލައި ނާތަހުޒީބު އަމަލުތައް ހިންގުމަށް ޖާގަ ނުދިނުމުގެ ގޮތުންކަމަށާއި، ޕީޕީއެމް ޕީއެންސީއަކީ ދުވަހަކުވެސް ފުލުހުންނައި ސިފައިންނާއި ކުރިމަތިލައި އަނިޔާ ދޭނެ ބައެއް ނޫންކަމަށެވެ. އަދި އެއީ ރައީސް ޔާމީންވެސް ތާއީދު ކުރައްވާނެ ކަމެއް ނޫންކަމަށެވެ.
ޖަލްސާ ހިޔާ ފްލެޓް ހިމެނޭ ސަރަހައްދުގައި ނުބޭއްވުނީ ސަރުކާރުން ޤާނޫނީ އިމުން ބޭރުން މާލެ ސިޓީގެ ނިންމުންތަކުގެ ތެރެއަށް ވަދެ ހިންގަމުންދާ އަމަލުތަކުގެ ސަބަބުން ކަމަށާއި، މިކަމުގައި ޤާނޫނު އަރާ ހަމަކުރާނެކަމަށް އަދުރޭ ވިދާޅުވިއެވެ.
މާދަމާރޭގެ ޖަލްސާގައި ރައީސް ޔާމީން ވާހަކަފުޅު ދައްކަވާއިރު މިޖަލްސާގައި ރައީސް ޔާމީންގެ މުހިންމު މެސެޖުތަކެއް ހިޔާ ފްލެޓްގައި ދިރިއުޅުއްވާ ރައްޔިތުންނަށް ޚާއްސަ ކުރައްވާނެކަމަށް އަދުރޭ ވިދާޅުވިއެވެ.
